ਰਾਏਕੋਟ, 1 ਜੂਨ (ਸੁਸ਼ੀਲ)-ਰਾਏਕੋਟ ਸ਼ਹਿਰ ਤੋਂ ਜਗਰਾਉਂ ਨੂੰ ਜਾਂਦੀ ਰੋਡ 'ਤੇ ਟੁੱਟਾ ਹੋਇਆ ਮੇਨ ਹੋਲ ਦਾ ਢੱਕਣ ਅਤੇ ਸੜਕ 'ਤੇ ਪਏ ਵੱਡੇ ਵੱਡੇ ਟੋਏ ਕਿਸੇ ਸਮੇਂ ਵੀ ਵੱਡੇ ਹਾਦਸੇ ਦਾ ਕਾਰਨ ਬਣ ਸਕਦਾ ਹੈ | ਜਿਕਰਯੋਗ ਹੈ ਕਿ ਇਹ ਰੋਡ ਬੁਰੀ ਤਰ੍ਹਾਂ ਖਸਤਾਹਾਲ ਹੋਣ ਕਾਰਨ ਪਹਿਲਾਂ ਹੀ ਸੁਰਖੀਆਂ ਵਿਚ ਹੈ, ਸੜਕ 'ਤੇ ਪਏ ਵੱਡੇ-ਵੱਡੇ ਟੋਇਆਂ ਵਿਚ ਸੀਵਰੇਜ ਦਾ ਪਾਣੀ ਹਰ ਵੇਲੇ ਜਮ੍ਹਾਂ ਰਹਿੰਦਾ ਹੈ, ਜਿਸ ਕਾਰਨ ਇਸ ਰੋਡ 'ਤੇ ਜਿੱਥੇ ਸੜਕੀ ਹਾਦਸੇ ਵੀ ਹੁੰਦੇ ਰਹਿੰਦੇੇ ਹਨ ਉੱਥੇ ਸੜਕ 'ਤੇ ਫੈਲੇ ਸੀਵਰੇਜ ਦੇ ਗੰਦੇ ਪਾਣੀ ਦੀ ਬਦਬੂ ਕਾਰਨ ਇਲਾਕਾ ਨਿਵਾਸੀਆਂ ਦਾ ਜੀਣਾ ਵੀ ਦੁੱਭਰ ਹੋ ਚੁੱਕਾ ਹੈ | ਇਸ ਸੜਕ ਦੀ ਮੁਰੰਮਤ ਨੂੰ ਲੈ ਕੇੇ ਇਲਾਕਾ ਨਿਵਾਸੀਆਂ ਵਲੋਂ ਪ੍ਰਸ਼ਾਸਨ ਵਿਰੁੱਧ ਰੋਸ ਧਰਨੇ ਵੀ ਲਗਾਏ ਜਾ ਚੁੱਕੇ ਹਨ, ਪ੍ਰੰਤੂ ਇਸ ਦੇ ਬਾਵਜੂਦ ਸੜਕ ਵਿਚ ਮੇਨਹੋਲ ਦੇ ਢੱਕਣ ਦਾ ਟੁੱਟਣਾ ਅਤੇ ਇਸ ਨੂੰ ਠੀਕ ਨਾ ਕਰਵਾਉਣਾ ਵਿਭਾਗੀ ਲਾਪਰਵਾਹੀ ਨੂੰ ਦਰਸਾਉਂਦਾ ਹੈ | ਇਸ ਸੜਕ 'ਤੇ ਵਾਹਨਾਂ ਦੀ ਕਾਫ਼ੀ ਆਵਾਜਾਈ ਹੋਣ ਕਾਰਨ ਮਨੇਹੋਲ ਦਾ ਟੁੱਟਾ ਹੋਇਆ ਢੱਕਣ ਕਿਸੇ ਵੱਡੇ ਹਾਦਸੇ ਨੂੰ ਅੰਜ਼ਾਮ ਦੇ ਸਕਦਾ ਹੈ | ਇਸ ਤੋਂ ਇਲਾਵਾ ਥੋੜੀ ਜਿਹੀ ਬਰਸਾਤ ਤੋਂ ਬਾਅਦ ਇਹ ਇਲਾਕਾ ਪੂਰੀ ਤਰ੍ਹਾਂ ਜਲ-ਥਲ ਹੋ ਜਾਂਦਾ ਹੈ, ਇਸ ਹਾਲਾਤ ਵਿਚ ਜਾਂ ਰਾਤ ਮੌਕੇ ਇਹ ਮੇਨਹੋਲ ਕਿਸੇ ਪੈਦਲ ਜਾਣ ਵਾਲੇ ਲਈ ਵੀ ਖਤਰਾ ਸਾਬਤ ਹੋ ਸਕਦਾ ਹੈ | ਇਲਾਕਾ ਨਿਵਾਸੀਆਂ ਦੀ ਮੰਗ ਹੈ ਕਿ ਇਸ ਮੇਨਹੋਲ ਦਾ ਢੱਕਣ ਤੁਰੰਤ ਬਦਲਿਆ ਜਾਵੇ ਅਤੇ ਸੜਕ ਦੀ ਮੁਰੰਮਤ ਕਰਵਾਈ ਜਾਵੇ ਤਾਂ ਜੋ ਇਸ ਰੋਡ 'ਤੇ ਹੋਣ ਵਾਲੇ ਹਾਦਸਿਆਂ ਤੋਂ ਬਚਿਆ ਜਾ ਸਕੇ |
