ਚੌਂਕੀਮਾਨ, 24 ਸਤੰਬਰ (ਤੇਜਿੰਦਰ ਸਿੰਘ ਚੱਢਾ)-ਲੁਧਿਆਣਾ-ਫਿਰੋਜ਼ਪੁਰ ਮੁੱਖ ਮਾਰਗ (ਕਿਲੋਮੀਟਰ 105 ਤੋਂ 123.700 ਤੱਕ) ਵਾਤਾਵਰਨ ਨੂੰ ਸਾਫ਼-ਸੁਥਰਾ ਤੇ ਹਰਿਆ-ਭਰਿਆ ਰੱਖਣ ਦੇ ਮਕਸਦ ਨਾਲ ਪ੍ਰੋਜੈਕਟ ਅਫ਼ਸਰ ਨੈਸ਼ਨਲ ਹਾਈਵੇ ਕੁਲਦੀਪ ਕੁਮਾਰ, ਵਣ ਮੰਡਲ ਅਫ਼ਸਰ ਲੁਧਿਆਣਾ ਰਾਜੇਸ਼ ਕੁਮਾਰ ਗੁਲਾਟੀ, ਵਣ ਰੇਜ ਅਫ਼ਸਰ ਜਗਰਾਉਂ ਸੁਖਪਾਲ ਸਿੰਘ, ਵਣ ਰੇਂਜ ਅਫ਼ਸਰ ਦੋਰਾਹਾ ਬਹੋੜ ਸਿੰਘ ਤੇ ਵਣ ਬਲਾਕ ਅਫ਼ਸਰ ਜਗਰਾਉਂ ਸੁਖਜਿੰਦਰ ਸਿੰਘ ਵਲੋਂ ਬੂਟੇ ਲਗਾਏ ਗਏ | ਇਸ ਮੌਕੇ ਪ੍ਰੋਜੈਕਟ ਅਫ਼ਸਰ ਨੈਸ਼ਨਲ ਹਾਈਵੇ ਕੁਲਦੀਪ ਕੁਮਾਰ ਤੇ ਵਣ ਮੰਡਲ ਅਫ਼ਸਰ ਲੁਧਿਆਣਾ ਰਾਜੇਸ਼ ਕੁਮਾਰ ਗੁਲਾਟੀ ਨੇ ਲੁਧਿਆਣਾ-ਫਿਰੋਜ਼ਪੁਰ ਮੁੱਖ ਮਾਰਗ 'ਤੇ ਬੂਟੇ ਲਗਾਉਣ ਦੀ ਸ਼ੁਰੂਆਤ ਕਰਦਿਆਂ ਕਿਹਾ ਕਿ ਪੰਜ ਹਾਜ਼ਰ ਬੂਟੇ ਲਗਾਏ ਜਾਣਗੇ | ਜਿਸ ਨਾਲ ਲੁਧਿਆਣਾ-ਫਿਰੋਜ਼ਪੁਰ ਮੁੱਖ ਮਾਰਗ ਹਰਿਆ-ਭਰਿਆ ਬਣ ਜਾਵੇਗਾ ਤੇ ਵਾਤਾਵਰਨ ਸਾਫ਼-ਸੁਥਰਾ ਰਹੇਗਾ | ਉਨ੍ਹਾਂ ਕਿਹਾ ਕਿ ਸਾਡਾ ਸਾਰਿਆਂ ਦਾ ਫਰਜ਼ ਬਣਦਾ ਹੈ ਕਿ ਅਸੀਂ ਵਾਤਾਵਰਨ ਨੂੰ ਸਾਫ਼-ਸੁਥਰਾ ਤੇ ਹਰਿਆ-ਭਰਿਆ ਰੱਖਣ ਲਈ ਵੱਧ ਤੋਂ ਵੱਧ ਬੂਟੇ ਲਗਾਈਏ | ਇਸ ਮੌਕੇ ਵਣ ਗਾਰਡ ਕੁਲਵੰਤ ਸਿੰਘ, ਮੈਡਮ ਜਸਨਪ੍ਰੀਤ ਕੌਰ, ਮੈਡਮ ਪੂਨਮ ਦੇਵੀ, ਬੇਲਦਾਰ ਹਰਦਿਆਲ ਸਿੰਘ, ਐੱਨ.ਐੱਚ.ਏ. ਆਈ ਦੇ ਅਧਿਕਾਰੀ ਰਮਨਦੀਪ ਸਿੰਘ ਹਾਜ਼ਰ ਸਨ |
