ਰਾਮਗੜ੍ਹ ਸੀਕਰੀ, 2 ਜੂਨ (ਕਟੋਚ)- ਤਲਵਾੜਾ-ਊਨਾ ਮੁੱਖ ਸੜਕ 'ਤੇ ਪੰਜਾਬ-ਹਿਮਾਚਲ ਪ੍ਰਦੇਸ਼ ਦੀ ਸੀਮਾ 'ਤੇ ਪੈਂਦੇ ਮਰਬਾੜੀ ਵਿਖੇ ਹਿਮਾਚਲ ਸਰਕਾਰ ਵਲੋਂ ਲਗਾਇਆ ਟੋਲ ਟੈਕਸ (ਐਂਟਰੀ ਟੈਕਸ) ਬੈਰੀਅਰ ਤੇ ਐਂਟਰੀ ਟੈਕਸ ਵਸੂਲੀ ਤੋਂ ਪ੍ਰੇਸ਼ਾਨ ਬਲਾਕ ਤਲਵਾੜਾ ਦੇ ਕਰੀਬ ਇੱਕ ਦਰਜਨ ਪਿੰਡਾਂ ਦੇ ਲੋਕਾਂ 'ਚ ਜ਼ੋਰਦਾਰ ਰੋਸ ਪਾਇਆ ਜਾ ਰਿਹਾ ਹੈ | ਉਕਤ ਪਿੰਡਾਂ ਦੇ ਲੋਕਾਂ ਅਤੇ ਵਾਹਨ ਚਾਲਕਾਂ ਨੇ ਐਂਟਰੀ ਟੈਕਸ ਦੇ ਨਾਂਅ 'ਤੇ ਪ੍ਰਤੀ ਵਾਹਨ ਵਸੂਲੇ ਜਾ ਰਹੇ 70 ਰੁਪਏ ਦੀ ਛੋਟ ਦੇਣ ਦੀ ਮੰਗ ਕੀਤੀ ਹੈ | ਸਮਾਜ ਸੇਵੀ ਨੌਜਵਾਨ ਅੰਕਿਤ ਰਾਣਾ ਦੀ ਅਗਵਾਈ ਵਿਚ ਸਥਾਨਕ ਲੋਕਾਂ ਨੇ ਇੱਕਜੁੱਟ ਹੋ ਕੇ ਇਸ ਟੋਲ ਟੈਕਸ ਦਾ ਵਿਰੋਧ ਪ੍ਰਗਟ ਕਰਦਿਆਂ ਤਰਕ ਦਿੱਤਾ ਹੈ ਕਿ ਬਲਾਕ ਤਲਵਾੜਾ ਦੇ ਉਕਤ ਪਿੰਡਾਂ ਦੇ ਲੋਕਾਂ ਦੀਆਂ ਕਰੀਬ 80 ਫ਼ੀਸਦੀ ਰਿਸ਼ਤੇਦਾਰੀਆਂ ਹਿਮਾਚਲ ਪ੍ਰਦੇਸ਼ ਦੇ ਲਾਗਲੇ ਪਿੰਡਾਂ 'ਚ ਪੈਂਦੀਆਂ ਹਨ | ਇਸ ਤੋਂ ਇਲਾਵਾ ਦੌਲਤਪੁਰ ਚੌਕ ਮਾਰਕੀਟ ਅਤੇ ਸਿਹਤ ਸਹੂਲਤਾਂ ਲਈ ਵੀ ਲੋਕਾਂ ਦਾ ਆਉਣਾ-ਜਾਣਾ ਹਿਮਾਚਲ ਪ੍ਰਦੇਸ਼ ਵਿਖੇ ਆਮ ਰਹਿੰਦਾ ਹੈ ਅਤੇ ਮਜਬੂਰਨ ਲੋਕਾਂ ਨੂੰ ਅਤੇ ਵਾਹਨ ਚਾਲਕਾਂ ਨੂੰ 70 ਰੁਪਏ ਐਂਟਰੀ ਫ਼ੀਸ ਅਦਾ ਕਰਨੀ ਪੈਂਦੀ ਹੈ ਜੋ ਇਲਾਕੇ ਨਾਲ ਸਰਾਸਰ ਧੱਕਾ ਹੈ | ਬੀਤੇ ਦਿਨ ਸਮਾਜ ਸੇਵੀ ਅੰਕਿਤ ਰਾਣਾ ਦੀ ਅਗਵਾਈ ਵਿਚ ਹੋਈ ਬੈਠਕ ਵਿਚ ਸਰਪੰਚ ਅਸ਼ਵਨੀ ਸ਼ਰਮਾ, ਅਸ਼ਵਨੀ ਪੱਪੀ, ਸੁਮਿੰਦਰਜੀਤ ਸਿੰਘ, ਸੰਜੇ ਕਟੋਚ, ਅਸ਼ੋਕ ਕੁਮਾਰ, ਅਮਿਤ ਰਾਣਾ, ਸੁਨੀਲ ਪਰਮਾਰ, ਕੁਲਵਿੰਦਰ ਪਰਮਾਰ, ਵਿਨੇ ਕੁਮਾਰ ਆਦਿ ਹਾਜ਼ਰ ਲੋਕਾਂ ਨੇ ਮੰਗ ਕੀਤੀ ਹੈ ਕਿ ਬਲਾਕ ਤਲਵਾੜਾ ਦੇ ਸਥਾਨਕ ਪਿੰਡਾਂ ਭਟੋਲੀ, ਖੱਮਤਾ ਪੱਤੀ, ਭਵਨੌਰ, ਝਰੋੜਾ, ਖੂੰਡਿਆਲਾ, ਕਰਟੋਲੀ, ਰਾਮਗੜ੍ਹ ਸੀਕਰੀ, ਨੰਗਲ ਖਨੌੜਾਂ, ਅਮਰੋਹ, ਅਲੇਰਾ, ਧਰਮਪੁਰ ਦੇਵੀ, ਬਟਵਾੜਾ, ਮੰਗੂ ਮੈਰਾ, ਭੋਲ ਕਲੋਤਾ, ਪਲਾਹੜ ਆਦਿ ਦੇ ਲੋਕਾਂ ਅਤੇ ਵਾਹਨ ਚਾਲਕਾਂ ਨੂੰ ਟੋਲ ਟੈਕਸ (ਐਂਟਰੀ ਟੈਕਸ) ਤੋਂ ਛੋਟ ਦਿੱਤੀ ਜਾਵੇ | ਉਕਤ ਮੰਗ ਨਾ ਮੰਨਣ ਦੇ ਵਿਰੋਧ ਵਿਚ 5 ਜੂਨ ਨੂੰ ਵਿਰੋਧ ਪ੍ਰਦਰਸ਼ਨ ਕਰਨ ਦਾ ਵੀ ਫ਼ੈਸਲਾ ਲਿਆ ਗਿਆ ਹੈ |
