ਪੋਜੇਵਾਲ ਸਰਾਂ, 1 ਸਤੰਬਰ (ਨਵਾਂਗਰਾਈ)-ਪਿਛਲੇ ਦੋ ਤਿੰਨ ਦਿਨਾਂ ਤੋਂ ਲਗਾਤਾਰ ਪੈ ਰਹੇ ਪੀਂਹ ਨਾਲ ਇਲਾਕੇ ਦੇ ਵੱਖ-ਵੱਖ ਪਿੰਡਾਂ ਵਿਚ ਮੀਂਹ ਦੇ ਪਾਣੀ ਨੇ ਤਬਾਹੀ ਮਚਾਈ ਹੋਈ ਹੈ ਹਰ ਪਾਸੇ ਪਾਣੀ ਹੀ ਪਾਣੀ ਹੋਇਆ ਹੈ | ਪਿੰਡ ਕਟਾਵਾਰਾ ਵਿਖੇ ਹੜ੍ਹ ਵਰਗੇ ਹਲਾਤ ਪੈਦਾ ਹੋਏ ਹਨ ਕਿਉਂਕਿ ਇਥੇ ਜੰਗਲ ਵਾਲੇ ਪਾਸੇ ਤੋਂ ਇਕ ਖੱਡ ਦਾ ਪਾਣੀ ਟੁੱਟ ਕੇ ਆ ਗਿਆ ਹੈ, ਜਿਸ ਨਾਲ ਪਿੰਡ ਕਟਵਾਰਾਂ ਵਿਖੇ ਪਾਣੀ ਹੀ ਪਾਣੀ ਹੋ ਗਿਆ ਤੇ ਹੜ੍ਹ ਵਰਗੇ ਹਾਲਤਾ ਬਣ ਗਏ ਹਨ | ਭਾਰੀ ਮੀਂਹ ਪੈਣ ਨਾਲ ਵੱਖ-ਵੱਖ ਪਿੰਡਾਂ ਦੇ ਰਸਤੇ ਬੰਦ ਹੋ ਰਹੇ ਹਨ | ਪਿੰਡ ਕਟਵਾਰਾਂ ਕਲਾਂ ਦਾ ਲਿੰਕ ਕਸਬਾ ਪੋਜੇਵਾਲ ਨਾਲੋਂ ਟੁੱਟ ਗਿਆ ਹੈ ਤੇ ਪੋਜੇਵਾਲ ਸਿਆਣਾ ਸੜਕ ਦੇ ਵਿਚਕਾਰ ਵੱਡਾ ਪਾੜ ਪੈ ਗਿਆ ਹੈ | ਪਿੰਡ ਕਰੀਮਪੁਰ ਚਾਹਵਾਲਾ ਵਿਖੇ ਛੱਪੜ ਭਰਨ ਨਾਲ ਲੋਕਾਂ ਦੇ ਘਰਾਂ ਵਿੱਚ ਪਾਣੀ ਆ ਗਿਆ ਹੈ ਤੇ ਪਿੰਡ ਵਿਚ ਵੜਨ ਵਾਲਾ ਮੁੱਖ ਰਸਤਾ ਬੰਦ ਹੋ ਗਿਆ ਹੈ | ਇਸੇ ਤਰ੍ਹਾਂ ਪਿੰਡ ਪੋਜੇਵਾਲ ਦੇ ਛੱਪੜ ਵਿਚ ਪਾਣੀ ਭਰਨ ਨਾਲ ਪਾਣੀ ਪਿੰਡ ਦੀਆਂ ਗਲੀਆਂ ਨਾਲੀਆਂ ਵਿਚ ਭਰ ਗਿਆ ਹੈ | ਇਸ ਇਲਾਕੇ ਦੀ ਮੁੱਖ ਬਛੋਅ ਖੱਡ (ਚੋਅ) ਵਿਚ ਵੀ ਬਹੁਤ ਮਾਤਰਾਂ ਵਿਚ ਪਾਣੀ ਆਉਣ ਨਾਲ ਕਾਫੀ ਨੁਕਾਸਨ ਹੋਣ ਦਾ ਸਮਾਚਾਰ ਹੈ | ਇਸ ਖੱਡ ਦੇ ਆਉਣ ਨਾਲ ਮੰਦਰ ਬਾਬਾ ਰੋੜੀ ਵਾਲਾ ਦੀ ਫੈਸਿੰਗ ਤੇ ਗੇਟ ਹੜ੍ਹ ਗਿਆ ਹੈ ਤੇ ਇਥੇ ਸੜਕ ਦਾ ਕਾਫੀ ਨੁਕਸਾਨ ਹੋਇਆ ਹੈ | ਇਸ ਸੰਬੰਧੀ ਲੋਕਾਂ ਦੀ ਮੰਗ ਹੈ ਕਿ ਇਸ ਮੀਂਹ ਨਾਲ ਹੋਏ ਭਾਰੀ ਨੁਕਸਾਨ ਦਾ ਸਰਕਾਰ ਤਰੁੰਤ ਮੁਆਵਜਾ ਦੇ ਕੇ ਲੋਕਾਂ ਦੇ ਨੁਕਾਸਨ ਦੀ ਭਰਪਾਈ ਕਰੇ | ਇਲਾਕੇ ਦੇ ਵੱਖ-ਵੱਖ ਪਿੰਡਾਂ ਵਿਚ ਪਾਣੀ ਭਰ ਗਿਆ ਹੈ |
