ਘੁੰਮਣਾ, 1 ਸਤੰਬਰ (ਮਹਿੰਦਰਪਾਲ ਸਿੰਘ)-ਪਿੰਡ ਮੇਹਲੀਆਣਾ 'ਚ ਭਾਰੀ ਬਾਰਿਸ਼ ਤੇ ਤੇਜ਼ ਹਵਾਵਾਂ ਨੇ ਝੋਨੇ ਦੀ ਫ਼ਸਲ ਦਾ ਭਾਰੀ ਨੁਕਸਾਨ ਕੀਤਾ | ਝੋਨੇ ਦੀ ਫ਼ਸਲ ਨਿਸਾਰੇ 'ਤੇ ਸੀ ਉਪਰੋ ਪਾਂਸਟਾ ਵਾਲਾ ਚੋਅ ਤੇ ਚੇਤੇ ਵਲੋਂ ਆਏ ਚੋਅ ਦੇ ਪਾਣੀ ਨਾਲ ਹੜ੍ਹ ਵਰਗੀ ਸਥਿਤੀ ਪੈਦਾ ਹੋ ਗਈ ਹੈ | ਸੜਕਾਂ 'ਤੇ ਪਾਣੀ ਹੋਣ ਕਰਕੇ ਆਵਾਜਾਈ ਠੱਪ ਹੋ ਗਈ ਹੈ | ਰਾਹਗੀਰਾਂ ਨੂੰ ਕਈ ਪਿੰਡਾਂ ਵਿਚੋਂ ਘੁੰਮ ਕੇ ਜਾਣਾ ਪੈਂਦਾ ਹੈ | ਝੋਨੇ ਦੀ ਫ਼ਸਲ ਨੂੰ ਭਾਰੀ ਨੁਕਸਾਨ ਪਹੁੰਚਣ 'ਤੇ ਕਿਸਾਨ ਚਿੰਤਾ 'ਚ ਹਨ | ਪਾਂਸਟੇ ਵਾਲੇ ਚੋਅ ਨੇ ਪਿੰਡ ਮਲਕਪੁਰ ਤੇ ਮੇਹਲੀਆਣਾਂ ਵਿਚਕਾਰ ਪੈਂਦੇ ਵੇਈ ਦੇ ਪੱੁਲ ਨੂੰ ਪਾਣੀ ਲੱਗ ਜਾਣ 'ਤੇ ਬੂਟੀ ਪੁੱਲ ਵਿਚ ਫਸ ਗਈ, ਜਿਸ ਨੂੰ ਮਲਕਪੁਰ ਦੀ ਪੰਚਾਇਤ ਨੇ ਜੇ. ਸੀ. ਬੀ. ਮਸ਼ੀਨ ਦੀ ਮਦਦ ਨਾਲ ਵੇਈ ਦੇ ਪੁੱਲ ਨੂੰ ਸਾਫ ਕੀਤਾ | ਮੌਕੇ 'ਤੇ ਪਿੰਡ ਮੇਹਲੀਆਣਾਂ ਦੇ ਸਰਪੰਚ ਰਾਜ ਕੁਮਾਰ, ਸਾਬਕਾ ਚੇਅਰਮੈਨ ਤੀਰਥ ਸਿੰਘ, ਦਲਬਾਰ ਸਿੰਘ ਮਲਕਪੁਰ ਨੇ ਹੜ੍ਹ ਵਾਲੇ ਖੇਤਾਂ ਦਾ ਦੌਰਾ ਕੀਤਾ | ਬਿਜਲੀ ਦੇ ਖੰਭੇ ਡਿੱਗੇ ਲੋਕਾਂ ਨੂੰ ਵੇਈ ਵੱਲ ਜਾਣ ਤੋਂ ਪ੍ਰਹੇਜ਼ ਕਰਨ ਲਈ ਕਿਹਾ ਤਾਂ ਕਿ ਕੋਈ ਜਾਨੀ ਮਾਲੀ ਨੁਕਸਾਨ ਨਾ ਹੋਵੇ | ਕਿਸਾਨਾਂ ਨੇ ਸਰਕਾਰ ਤੋਂ ਮੰਗ ਕੀਤੀ ਹੈ ਕਿ ਪਾਣੀ ਉੱਤਰ ਜਾਣ 'ਤੇ ਸਪੈਸ਼ਲ ਗਿਰਦਾਵਰੀ ਕਰਕੇ ਝੋਨੇ ਦੀ ਖਰਾਬ ਹੋਈ ਫ਼ਸਲ ਦਾ ਮੁਆਵਜ਼ਾ ਦਿੱਤਾ ਜਾਵੇ |
