ਪੱਤਰਕਾਰ ਅਤੇ ਉਸ ਦੇ ਪਰਿਵਾਰ 'ਤੇ ਜਾਨਲੇਵਾ ਹਮਲਾ
ਅਜੀਤ ਡੈਸਕ
03-06-2025
ਮਾਧੋਪੁਰ 2 ਜੂਨ( ਮਹਿਰਾ)-ਜ਼ਿਲ੍ਹਾ ਪਠਾਨਕੋਟ ਦੇ ਹਲਕਾ ਸੁਜਾਨਪੁਰ ਦੇ ਪਿੰਡ ਮੁਤਫਰਕਾ ਵਾਸੀ ਸੁਭਾਸ਼ ਸਿੰਘ ਜੋ ਕਿ ਇਕ ਨਿੱਜੀ ਅਖ਼ਬਾਰ ਦੇ ਮਾਧੋਪੁਰ ਤੋਂ ਪੱਤਰਕਾਰ ਹਨ, ਉੱਪਰ ਕੁਝ ਲੋਕਾਂ ਵਲੋਂ ਹਮਲਾ ਕਰਕੇ ਉਸ ਨੂੰ ਜ਼ਖ਼ਮੀ ਕਰ ਦਿੱਤਾ ਗਿਆ | ਪੱਤਰਕਾਰ ਸੁਭਾਸ਼ ਸਿੰਘ ਨੇ ਦੱਸਿਆ ਕਿ ਉਸ ਦੇ ਦੋ ਗੁਆਂਢੀ ਕੁਝ ਅਣਪਛਾਤੇ ਲੋਕਾਂ ਨੂੰ ਨਾਲ ਲੈ ਕੇ ਉਨ੍ਹਾਂ ਦੇ ਘਰ ਆਏ ਤੇ ਉਨ੍ਹਾਂ ਉੱਪਰ ਹਮਲਾ ਕਰ ਦਿੱਤਾ | ਉਸ ਨੇ ਦੱਸਿਆ ਕਿ ਹਮਲਾਵਰਾਂ ਕੋਲ ਇਕ ਦੇਸੀ ਰਿਵਾਲਵਰ ਵਰਗੀ ਕੋਈ ਚੀਜ਼ ਸੀ, ਨੇ ਉਸ ਦੇ ਸਿਰ ਵਿਚ ਮਾਰ ਕੇ ਉਸ ਨੂੰ ਜ਼ਖ਼ਮੀ ਕੀਤਾ | ਉਸ ਦੱਸਿਆ ਕਿ ਉਸ ਦਾ ਛੋਟਾ ਭਰਾ ਪਲਾਈ ਫ਼ੈਕਟਰੀ ਵਿਚ ਕੰਮ ਕਰਦਾ ਹੈ, ਜਿੱਥੇ ਉਸ ਦੇ ਭਰਾ ਦੀ ਗੁਆਂਢੀ ਨਾਲ ਤਕਰਾਰ ਹੋਈ ਸੀ | ਜਿਸ ਦੀ ਰੰਜਿਸ਼ ਦੇ ਬਾਅਦ ਗੁਆਂਢੀ ਕਿਸੇ ਅਣਪਛਾਤੇ ਹਥਿਆਰਬੰਦ ਲੋਕਾਂ ਨੂੰ ਲੈ ਕੇ ਉਨ੍ਹਾਂ ਦੇ ਘਰ ਹਮਲਾ ਕਰਨ ਆਏ ਸਨ | ਜਦ ਇਸ ਸੰਬੰਧ ਵਿਚ ਐੱਸ. ਐੱਚ. ਓ. ਸ਼ਾਹਪੁਰ ਕੰਢੀ ਅਮਨਪ੍ਰੀਤ ਕੌਰ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਦੱਸਿਆ ਕਿ ਪੁਲਿਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ ਤੇ ਜਾਂਚ ਤੋਂ ਬਾਅਦ ਬਣਦੀ ਕਾਰਵਾਈ ਕੀਤੀ ਜਾਵੇਗੀ |
