ਬਟਾਲਾ, 5 ਸਤੰਬਰ (ਸਤਿੰਦਰ ਸਿੰਘ)-ਪੰਜਾਬ ਦੇ ਬਹੁਤਾਤ ਖੇਤਰਾਂ 'ਚ ਦਰਿਆਵਾਂ ਦੀ ਮਾਰ ਨਾਲ ਲੱਖਾਂ ਏਕੜ ਫ਼ਸਲ ਬਰਬਾਦ ਹੋ ਗਈ ਹੈ, ਤਕਰੀਬਨ 1500 ਪਿੰਡ ਹੜ੍ਹਾਂ ਦੇ ਪਾਣੀ ਦੀ ਮਾਰ ਹੇਠ ਆਉਣ ਨਾਲ ਜਾਨੀ-ਮਾਲੀ ਨੁਕਸਾਨ ਬਹੁਤ ਹੋਇਆ ਹੈ | ਬਾਬਾ ਸੁਖਦੀਪ ਸਿੰਘ ਬੇਦੀ ਅੰਸ-ਬੰਸ ਸ੍ਰੀ ਗੁਰੂ ਨਾਨਕ ਦੇਵ ਜੀ ਮਹਾਰਾਜ ਅਤੇ ਉੱਘੇ ਸਮਾਜ ਸੇਵੀ ਸ: ਰੁਪਿੰਦਰ ਸਿੰਘ ਸ਼ਾਮਪੁਰਾ (ਚੇਅਰਮੈਨ) ਨਾਨਕ-ਸਾਈਾ ਫਾਉਂਡੇਸ਼ਨ ਸ੍ਰੀ ਹਜ਼ੂਰ ਸਾਹਿਬ (ਮਹਾਂਰਾਸ਼ਟਰ) ਨੇ ਕਿਹਾ ਕਿ ਪੰਜਾਬ ਭਰ ਤੋਂ ਇਲਾਵਾ ਚੰਡੀਗੜ੍ਹ, ਹਰਿਆਣਾ, ਦਿੱਲੀ ਤੱਕ ਤੋਂ ਸੰਗਤਾਂ, ਸਮਾਜ ਸੇਵੀ ਜਥੇਬੰਦੀਆਂ, ਸੰਤ-ਮਹਾਂਪੁਰਖ ਵੱਡੀ ਗਿਣਤੀ ਵਿਚ ਹੜ੍ਹ ਪ੍ਰਭਾਵਿਤ ਇਲਾਕਿਆਂ 'ਚ ਦਿਨ-ਰਾਤ ਸੇਵਾਵਾਂ ਨਿਭਾਅ ਰਹੇ ਹਨ | ਬਾਬਾ ਬੇਦੀ ਅਤੇ ਸ: ਸ਼ਾਮਪੁਰਾ ਨੇ ਸੰਗਤਾਂ ਨੂੰ ਅਪੀਲ ਕੀਤੀ ਕਿ ਉਹ ਕਾਫ਼ੀ ਦਿਨਾਂ ਤੋਂ ਸੇਵਾ ਕਾਰਜਾਂ ਵਿਚ ਜੁਟੇ ਹੋਏ ਹਨ | ਦੇਖਣ ਵਿਚ ਆ ਰਿਹਾ ਹੈ ਕਿ ਕੁਝ ਲੋਕ ਸਾਮਾਨ ਇਕਤਰ ਕਰਨ 'ਚ ਲੱਗੇ ਹੋਏ ਹਨ | ਇਸ ਲਈ ਸਭ ਨੂੰ ਹੱਥ ਜੋੜ ਕੇ ਬੇਨਤੀ ਹੈ ਕਿ ਦਾਨੀ ਸੱਜਣ ਆਪ ਘਰ-ਘਰ ਜਾ ਕੇ ਹਾਲਾਤ ਦੇਖ ਕੇ, ਫਿਰ ਸਹਾਇਤਾ ਕਰਨ ਤਾਂ ਕਿ ਦਸਾਂ ਨਹੁੰਆਂ ਦੀ ਕਿਰਤ ਸਹੀ ਜਗ੍ਹਾ 'ਤੇ ਲੱਗ ਸਕੇ | ਇਸ ਮੌਕੇ ਸ: ਮਨਬੀਰ ਸਿੰਘ ਰੰਧਾਵਾ (ਮੀਤ ਪ੍ਰਧਾਨ) ਆੜ੍ਹਤੀ ਯੂਨੀਅਨ ਪੰਜਾਬ, ਗੁਰਭਿੰਦਰ ਸਿੰਘ ਸ਼ਾਹ ਉੱਘੇ ਕਾਰੋਬਾਰੀ ਸਮਾਜ ਸੇਵਕ ਮਾਸਟਰ ਜੋਗਿੰਦਰ ਸਿੰਘ ਅੱਚਲੀ ਗੇਟ, ਸੁਰਿੰਦਰ ਸਿੰਘ ਸੋਢੀ ਸ਼ਾਸਤਰੀ ਨਗਰ, ਹਰਪਾਲ ਸਿੰਘ ਖਾਨਫੱਤਾ ਹਾਜ਼ਰ ਸਨ |