ਤਾਰਾਗੜ੍ਹ, 4 ਨਵੰਬਰ (ਸੋਹਨ ਲਾਲ)-ਦੀਨਾਨਗਰ-ਪਰਮਾਨੰਦ ਤੋਂ ਨਰੋਟ ਜੈਮਲ ਸਿੰਘ ਸੜਕ 'ਤੇ ਵਾਇਆ ਤਾਰਾਗੜ੍ਹ ਵਿਖੇ ਪੁਲ ਨੂੰ ਬਣੇ ਤਕਰੀਬਨ ਤਿੰਨ ਸਾਲ ਹੋ ਗਏ ਹਨ | ਪਰ ਇੰਨ੍ਹੇ ਥੋੜੇ੍ਹ ਸਮੇਂ ਵਿਚ ਹੀ ਪੁਲ ਜਗ੍ਹਾ-ਜਗ੍ਹਾ ਤੋਂ ਟੁੱਟ ਗਿਆ ਹੈ | ਇਹ ਪੁਲ ਸੀਮਾ ਸੜਕ ਸੰਗਠਨ (ਬੇਗਲ ਸੇਤੂ) ਕੇਂਦਰੀ ਮੰਤਰੀ ਰਾਜਨਾਥ ਸਿੰਘ ਵਲੋਂ ਸਤੰਬਰ 2022 ਨੂੰ ਲੋਕ ਸਮਰਪਿਤ ਕੀਤਾ ਗਿਆ ਸੀ | ਇਸ ਪੁਲ ਨੂੰ ਬਣੇ ਤਿੰਨ ਸਾਲ ਹੀ ਹੋਏ ਹਨ | ਪਰ ਇਸ ਪੁਲ ਦੀ ਹਾਲਤ ਬਹੁਤ ਹੀ ਨਾਜ਼ੁਕ ਅਤੇ ਤਰਸਯੋਗ ਬਣੀ ਹੋਈ ਹੈ | 'ਅਜੀਤ' ਨਾਲ ਗੱਲਬਾਤ ਦੌਰਾਨ ਇਲਾਕਾ ਨਿਵਾਸੀ ਰਾਜੇਸ਼ ਕੁਮਾਰ ਘੁੱਦਾ, ਠਾਕੁਰ ਸਰਬਜੀਤ ਸਿੰਘ, ਸ਼ੇਰ ਸਿੰਘ, ਫ਼ੌਜੀ ਸਤੀਸ਼ ਕੁਮਾਰ, ਜੋਗਿੰਦਰ ਸਿੰਘ, ਬਾਲ ਕਿ੍ਸ਼ਨ ਸੈਣੀ, ਫ਼ੌਜੀ ਰਜਿੰਦਰ ਕੁਮਾਰ, ਰਿਤੂ ਸੈਣੀ, ਠਾਕੁਰ ਬੰਦਨਾ, ਰਾਜ ਰਾਣੀ, ਸਵਰਨ ਕੌਰ, ਸੁਦੇਸ਼ ਕੁਮਾਰੀ ਆਦਿ ਨੇ ਦੱਸਿਆ ਕਿ ਪਹਿਲਾਂ ਵੀ ਇਸ ਪੁਲ ਬਾਰੇ ਅਖ਼ਬਾਰ ਮਾਧਿਅਮ ਪ੍ਰਸ਼ਾਸਨ ਅਤੇ ਸਰਕਾਰ ਨੂੰ ਜਾਣਕਾਰੀ ਦਿੱਤੀ ਗਈ ਸੀ | ਪਰ ਪ੍ਰਸ਼ਾਸਨ ਅਤੇ ਨਾ ਹੀ ਸਰਕਾਰ ਨੇ ਇਸ ਬਾਰੇ ਕੋਈ ਠੋਸ ਕਦਮ ਪੁੱਟੇ | ਪਰ ਪੁਲ ਬਣਾਉਣ ਵਾਲੇ ਠੇਕੇਦਾਰਾਂ ਨੇ ਇਸ ਪੁਲ ਨੂੰ ਦੋ ਤਿੰਨ ਵਾਰੀ ਰੋੜੇ ਆਦਿ ਪਾ ਕੇ ਠੀਕ ਕਰਨ ਦੀ ਨਾਕਾਮ ਕੋਸ਼ਿਸ਼ ਕੀਤੀ | ਪਰ ਫਿਰ ਵੀ ਇਸ ਪੁਲ ਦੀਆਂ ਤਾਰਾਂ, ਸਰੀਏ ਆਦਿ ਬਾਹਰ ਨਿਕਲ ਗਏ ਹਨ ਅਤੇ ਆਉਣ ਜਾਣ ਵਾਲੀਆਂ ਗੱਡੀਆਂ, ਮੋਟਰਸਾਈਕਲ, ਸਕੂਟਰੀਆਂ ਆਦਿ ਨੂੰ ਭਾਰੀ ਦਿੱਕਤ ਦਾ ਸਾਹਮਣਾ ਕਰਨਾ ਪੈਂਦਾ ਹੈ | ਉਨ੍ਹਾਂ ਦਾ ਕਹਿਣਾ ਹੈ ਕਿ ਪੁਲ ਦੀ ਹਾਲਤ ਇੰਨ੍ਹੀ ਖ਼ਰਾਬ ਹੋ ਚੁੱਕੀ ਹੈ ਕਿ ਕਦੇ ਵੀ ਕੋਈ ਦੁਰਘਟਨਾ ਹੋ ਸਕਦੀ ਹੈ | ਉਨ੍ਹਾਂ ਪ੍ਰਸ਼ਾਸਨ ਅਤੇ ਸਰਕਾਰ ਤੋਂ ਫਿਰ ਤੋਂ ਪੁਰਜ਼ੋਰ ਮੰਗ ਕੀਤੀ ਹੈ ਕਿ ਇਸ ਪੁਲ ਨੂੰ ਬਣਾਉਣ ਵਾਲਿਆਂ ਦੀ ਇੰਨਕੁਆਰੀ ਕੀਤੀ ਜਾਵੇ ਅਤੇ ਬਣਦੀ ਕਾਰਵਾਈ ਕੀਤੀ ਜਾਵੇ ਤੇ ਪੁਲ 'ਤੇ ਲੱਗੇ ਮਟੀਰੀਅਲ ਦੀ ਮੁਕੰਮਲ ਜਾਂਚ ਕੀਤੀ ਜਾਵੇ ਤਾਂ ਜੋ ਇਲਾਕੇ ਦੇ ਲੋਕਾਂ ਨੂੰ ਇਸ ਤੋਂ ਰਾਹਤ ਮਿਲ ਸਕੇ |
