ਫਿੱਕੀ ਫਲੋ ਵਲੋਂ ਦੂਨ ਸਕੂਲ ਦੇ ਸਹਿਯੋਗ ਨਾਲ ਐੈੱਸ. ਟੀ. ਈ. ਐੱਮ. ਪ੍ਰੋਜੈਕਟ ਦੀ ਸ਼ੁਰੂਆਤ

ਅੰਮਿ੍ਤਸਰ, 2 ਜੂਨ (ਸੁਰਿੰਦਰਪਾਲ ਸਿੰਘ ਵਰਪਾਲ)-ਔਰਤਾ ਦੀ ਪ੍ਰਮੁੱਖ ਸੰਸਥਾ ਫਿੱਕੀ ਫਲੋ ਅੰਮਿ੍ਤਸਰ ਨੇ ਪ੍ਰਧਾਨ ਮੋਨਾ ਸਿੰਘ ਦੀ ਅਗਵਾਈ 'ਚ ਦੂਨ ਸਕੂਲ ਦੇ ਸਹਿਯੋਹ ਨਾਲ ਸਟੈਮ-ਵਰਸ਼ ਪ੍ਰੋਜੈਕਟ ਦੀ ਸ਼ੁਰੂਆਤ ਕੀਤੀ ਗਈ, ਜਿਸਦਾ ਉਦੇਸ਼ ਨੌਜਵਾਨਾਂ 'ਚ ਵਿਗਿਆਨ, ਤਕਨਾਲੋਜੀ, ਇੰਜੀਨੀਅਰਿੰਗ ਅਤੇ ਗਣਿਤ ਪ੍ਰਤੀ ਉਤਸੁਕਤਾ ਅਤੇ ਮੁੱਖ ਵਿਸ਼ਵਾਸ ਪੈਦਾ ਕਰਨਾ ਹੈ | ਇਸ ਸਬੰਧੀ ਕਰਵਾਏ ਗਏ ਸਮਾਗਮ ਦੌਰਾਨ ਮੁੱਖ ਮਹਿਮਾਨ ਵਜੋਂ ਸ਼ਾਮਿਲ ਹੋਏ ਕੌਂਸਲਰ ਮਨਦੀਪ ਸਿੰਘ ਨੇ ਭਵਿੱਖ-ਮੁੱਖੀ ਸਮਾਜ ਦੇ ਨਿਰਮਾਣ 'ਚ ਸਟੈਮ ਸਿੱਖਿਆ ਦੀ ਭੂਮਿਕਾ ਤੇ ਅਜਿਹੀਆਂ ਪਹਿਲਕਦਮੀਆਂ ਦੀ ਜ਼ਰੂਰਤ 'ਤੇ ਜ਼ੋਰ ਦਿੱਤਾ | ਪ੍ਰਧਾਨ ਮੋਨਾ ਸਿੰਘ ਨੇ ਸੀਮਾਵਾਂ ਤੋਂ ਪਾਰ ਬੱਚਿਆਂ ਤੱਕ ਪਹੁੰਚਣ ਵਾਲੇ ਸਮਾਵੇਸ਼ੀ ਵਿਦਿਅਕ ਅਨੁਭਵਾਂ ਨੂੰ ਉਤਸ਼ਾਹਿਤ ਕਰਨ ਦੇ ਮਿਸ਼ਨ ਨੂੰ ਉਜਾਗਰ ਕੀਤਾ | ਉਨ੍ਹਾਂ ਦੂਨ ਸਕੂਲ ਦੀ ਸਿੱਖਿਆ ਸ਼ਾਸਤਰ?ਇੱਕ ਅਜਿਹਾ ਦਿ੍ਸ਼ਟੀਕੋਣ ਜੋ ਕਠੋਰਤਾ ਅਤੇ ਕਲਪਨਾ ਦੋਵਾਂ ਦੀ ਕਦਰ ਕਰਦਾ ਹੈ ਦੀ ਸ਼ਲਾਘਾ ਕੀਤੀ ਅਤੇ ਸਟੈਮ ਵਰਸ਼ ਨੂੰ ਹਕੀਕਤ ਬਣਾਉਣ 'ਚ ਉਨ੍ਹਾਂ ਦੇ ਮਹੱਤਵਪੂਰਨ ਯੋਗਦਾਨ ਨੂੰ ਸਵੀਕਾਰ ਕੀਤਾ | ਦੂਨ ਸਕੂਲ ਦੀ ਨੁਮਾਇੰਦਗੀ ਕਰਦੇ ਹੋਏ, ਡਾਇਰੈਕਟਰ ਮੇਘਨਾ ਸ਼ਰਮਾ ਤੇ ਪਿ੍ੰ: ਧਵਨੀ ਨੇ ਅਰਥਪੂਰਨ ਸਿੱਖਿਆ ਅਤੇ ਅਨੁਭਵੀ ਸਿੱਖਿਆ ਪ੍ਰਤੀ ਆਪਣੀ ਵਚਨਬੱਧਤਾ ਨੂੰ ਦੁਹਰਾਇਆ | ਇਸ ਦੌਰਾਨ ਮੁੱਖ ਆਕਰਸ਼ਣ ਦੂਨ ਸਕੂਲ ਦੇ ਤਜਰਬੇਕਾਰ ਅਧਿਆਪਕਾਂ ਦੁਆਰਾ ਆਯੋਜਿਤ ਸਟੈਮ ਵਰਕਸ਼ਾਪ ਸੀ, ਜਿਸ ਨੇ ਮਿਸ਼ਨ ਦੀਪ ਦੇ ਵਿਦਿਆਰਥੀਆਂ ਨੂੰ ਵਿਹਾਰਕ ਗਤੀਵਿਧੀਆਂ ਰਾਹੀਂ ਵਿਗਿਆਨਕ ਸੰਕਲਪਾਂ ਨੂੰ ਸਮਝਣ ਦਾ ਇੱਕ ਦੁਰਲੱਭ ਮੌਕਾ ਪ੍ਰਦਾਨ ਕੀਤਾ | ਇਹ ਪ੍ਰੋਗਰਾਮ ਮਿਸ਼ਨ ਦੀਪ ਦੇ ਸਾਰੇ ਭਾਗੀਦਾਰ ਵਿਦਿਆਰਥੀਆਂ ਨੂੰ ਸਟੈਮ ਕਿੱਟਾਂ ਦੀ ਵੰਡ ਨਾਲ ਸਮਾਪਤ ਹੋਇਆ, ਤਾਂ ਜੋ ਇਹ ਯਕੀਨੀ ਬਣਾਇਆ ਜਾ ਸਕੇ ਕਿ ਸਿੱਖਿਆ ਜਾਰੀ ਰਹੇ |