ਹਰੀਕੇ ਪੱਤਣ, 26 ਸਤੰਬਰ (ਸੰਜੀਵ ਕੁੰਦਰਾ)- ਪਹਿਲਾਂ ਗੱਡੀ ਖਰੀਦਣ ਸਮੇਂ ਰੋਡ ਟੈਕਸ ਅਤੇ ਫਿਰ ਗੱਡੀ ਸੜਕ 'ਤੇ ਚੜ੍ਹਾਉਂਦਿਆਂ ਟੋਲ ਟੈਕਸ ਪਰੰਤੂ ਫਿਰ ਵੀ ਗੱਡੀਆਂ ਚਲਾਉਣ ਲਈ ਸੇਫ ਸੜਕਾਂ ਨਹੀਂ ਅਤੇ ਸੜਕਾਂ ਦੀ ਮਾੜੀ ਹਾਲਤ ਕਾਰਨ ਲੋਕ ਹਾਦਸਿਆਂ ਦਾ ਸ਼ਿਕਾਰ ਹੋ ਰਹੇ ਹਨ ਪਰ ਇੰਨ੍ਹਾਂ ਸੜਕਾਂ ਦੀ ਮਾੜੀ ਹਾਲਤ ਲਈ ਜਿੰਮੇਵਾਰ ਅਧਿਕਾਰੀਆਂ ਨੂੰ ਪੁੱਛਣ ਵਾਲਾ ਕੋਈ ਨਹੀਂ | ਇਸ ਤਰ੍ਹਾਂ ਦੀ ਖਸਤਾ ਹਾਲਤ ਸੜਕ ਦੀ ਉਦਾਹਰਣ ਹੈ, ਹਰੀਕੇ ਪੱਤਣ ਤੋਂ ਖਾਲੜਾ ਸੜਕ ਜੋ ਕਿ ਦਾਣਾ ਮੰਡੀ ਨਜ਼ਦੀਕ ਪਿਛਲੇ ਲੰਮੇ ਸਮੇਂ ਤੋਂ ਟੁੱਟੀ ਹੋਈ ਹੈ ਪਰ ਇਸ ਦੀ ਮੁਰੰਮਤ ਲਈ ਵਿਭਾਗ ਆਪਣੀ ਜਿੰਮੇਵਾਰੀ ਨਹੀਂ ਸਮਝ ਰਿਹਾ | ਜਿਕਰਯੋਗ ਹੈ ਕਿ ਇਹ ਸੜ੍ਹਕ ਜੋ ਕਿ ਪਿਛਲੇ ਸਮੇਂ ਦੌਰਾਨ ਬਣੀ ਸੀ ਅਤੇ ਸੜਕ ਬਣਨ ਤੋਂ ਬਾਅਦ ਇਸ ਸੜਕ ਤੋਂ ਲੰਘਣ ਵਾਲੇ ਲੋਕਾਂ ਨੂੰ ਟੋਲ ਟੈਕਸ ਵੀ ਦੇਣਾ ਪੈਂਦਾ ਹੈ ਅਤੇ ਪਿੰਡ ਭੱਗੂਪੁਰ ਨਜ਼ਦੀਕ ਟੋਲ ਪਲਾਜ਼ਾ ਲਾਇਆ ਗਿਆ ਹੈ ਪਰ ਇਹ ਸੜਕ ਜੋ ਕਿ ਦਾਣਾ ਮੰਡੀ ਹਰੀਕੇ ਨਜ਼ਦੀਕ ਕਈ ਮਹੀਨਿਆਂ ਤੋਂ ਟੁੱਟੀ ਹੋਈ ਹੈ ਤੇ ਅਨੇਕਾਂ ਵਾਰ ਹਾਦਸੇ ਵਾਪਰ ਚੁੱਕੇ ਹਨ ਪਰ ਸੰਬੰਧਿਤ ਵਿਭਾਗ ਮੂਕ ਦਰਸ਼ਕ ਬਣਿਆ ਤਮਾਸ਼ਾ ਦੇਖ ਰਿਹਾ ਹੈ | ਇਸ ਸੜਕ ਤੋਂ ਦਿਨ ਰਾਤ ਅਵਾਜਾਈ ਗੁਜ਼ਰਦੀ ਹੈ ਰਾਤ ਵੇਲੇ ਤਾਂ ਇਹ ਖੱਡੇ ਬਿਲਕੁਲ ਦਿਖਾਈ ਨਹੀਂ ਦਿੰਦੇ, ਜਿਸ ਕਾਰਨ ਇਹ ਖੱਡੇ ਹੋਰ ਖ਼ਤਰਨਾਕ ਹੋ ਜਾਂਦੇ ਹਨ | ਇਲਾਕੇ ਦੇ ਲੋਕਾਂ ਡਾ. ਜੋਗਾ ਸਿੰਘ, ਮਲਕੀਤ ਸਿੰਘ, ਗੁਰਬਖਸ਼ ਸਿੰਘ, ਜਨਕ ਸਿੰਘ, ਅੰਗਰੇਜ਼ ਸਿੰਘ, ਮਨਜੀਤ ਸਿੰਘ ਆਦਿ ਨੇ ਮੰਗ ਕੀਤੀ ਹੈ ਕਿ ਸੜਕ ਦੀ ਮੁਰੰਮਤ ਤਰੁੰਤ ਕਰਵਾਈ ਜਾਵੇ ਤਾਂ ਜੋ ਲੋਕ ਹਾਦਸਿਆਂ ਤੋਂ ਬਚ ਸਕਣ |
