ਮਾਲ ਮੰਤਰੀ ਦੇ ਹਲਕੇ 'ਚ ਕੱਟੀਆਂ ਜਾ ਰਹੀਆਂ ਅਣਅਧਿਕਾਰਤ ਕਾਲੋਨੀਆਂ ਸਵਾਲਾਂ ਦੇ ਘੇਰੇ 'ਚ <br/>

ਅ

ਅਜੀਤ ਡੈਸਕ 22-11-2025

ਲੁਧਿਆਣਾ, 21 ਨਵੰਬਰ (ਜਤਿੰਦਰ ਭੰਬੀ)-ਵਿਧਾਨ ਸਭਾ ਹਲਕਾ ਸਾਹਨੇਵਾਲ ਅਧੀਨ ਧੜਾਧੜ ਕੱਟੀਆਂ ਜਾ ਰਹੀਆਂ ਅਣਅਧਿਕਾਰਤ ਕਾਲੋਨੀਆਂ ਕਈ ਤਰ੍ਹਾਂ ਦੇ ਸਵਾਲ ਖੜੇ ਕਰ ਰਹੀਆਂ ਹਨ, ਜਿਸ ਨੂੰ ਲੈ ਕੇ 'ਆਪ' ਵਿਰੋਧੀਆਂ ਵਲੋਂ ਇਹ ਆਖ ਕੇ ਚੁਟਕੀਆਂ ਲਈਆਂ ਜਾ ਰਹੀਆਂ ਹਨ ਕਿ ਮਾਲ ਮੰਤਰੀ ਦੇ ਹਲਕੇ ਵਿਚ ਕੱਟੀਆਂ ਜਾ ਰਹੀਆਂ ਕਾਲੋਨੀਆਂ ਬਾਰੇ ਮਾਲ ਮੰਤਰੀ ਤੋਂ ਲੈ ਕੇ, ਕੀ ਸਬੰਧਿਤ ਵਿਭਾਗ ਦੇ ਉਚ ਅਧਿਕਾਰੀ ਬੇਖ਼ਬਰ ਹਨ ਜਾਂ ਗਲਾਡਾ ਅਧਿਕਾਰੀ ਗੂੜ੍ਹੀ ਨੀਂਦ ਵਿਚ ਹਨ, ਜਿਸ ਕਰਕੇ ਇਨ੍ਹਾਂ ਕਾਲੋਨੀਆਂ 'ਤੇ ਕਾਰਵਾਈ ਕਰਨ ਤੋਂ ਢਿੱਲਮੱਠ ਕੀਤੀ ਜਾ ਰਹੀ ਹੈ | ਹਾਲਾਂਕਿ ਇਸ ਬਾਰੇ ਕੁੱਝ ਵੀ ਕਿਹਾ ਜਾਣਾ ਪਾਣੀ ਵਿਚ ਡਾਂਗਾਂ ਮਾਰਨ ਵਾਲੀ ਗੱਲ ਹੈ, ਪਰ ਹਰ ਪਾਸੇ ਇਨ੍ਹਾਂ ਕੱਟੀਆਂ ਜਾਣ ਵਾਲੀਆਂ ਕਾਲੋਨੀਆਂ ਨੂੰ ਲੈ ਕੇ ਹਰ ਕੋਈ ਆਪੋ ਆਪਣੇ ਅੰਦਾਜ਼ੇ ਲਗਾ ਰਿਹਾ ਹੈ, ਜਦਕਿ ਇਕ ਪਾਸੇ ਦਬਵੀਂ ਜ਼ੁਬਾਨ ਨਾਲ ਹਰ ਇਕ ਕਲੋਨਾਈਜਰ ਵਲੋਂ ਇਹ ਦੁਹਾਈ ਦਿੱਤੀ ਜਾ ਰਹੀ ਹੈ ਕਿ ਸਰਕਾਰ ਵਲੋਂ ਬੰਦ ਕੀਤੀਆਂ ਰਜਿਸਟਰੀਆਂ ਕਾਰਨ ਪ੍ਰਾਪਰਟੀ ਕਾਰੋਬਾਰ ਦਾ ਭੱਠਾ ਬੈਠ ਗਿਆ ਹੈ | ਦੂਜੇ ਪਾਸੇ ਹਲਕਾ ਸਾਹਨੇਵਾਲ ਦੇ ਨੁਰਵਾਲ ਪਿੰਡ ਦੇ ਆਸ-ਪਾਸ ਦੀਆਂ ਜ਼ਮੀਨਾਂ 'ਚ ਧੜਾਧੜ ਕੱਟੀਆਂ ਜਾ ਰਹੀਆਂ ਅਣਅਧਿਕਾਰਤ ਕਾਲੋਨੀਆਂ ਵਿਚ ਜੰਗੀ ਪੱਧਰ 'ਤੇ ਕੰਮ ਚੱਲ ਰਿਹਾ ਹੈ | ਜੇਕਰ ਦੇਖਿਆ ਜਾਵੇ ਤਾਂ ਕੁੱਝ ਦਿਨਾਂ ਵਿਚ ਹੀ ਮਿੱਟੀ ਪਾ ਕੇ ਜ਼ਮੀਨ ਪੱਧਰ ਕਰਕੇ ਸੜਕਾਂ ਅਤੇ ਪਲਾਟਾਂ ਦੀ ਨਿਸ਼ਾਨਦੇਹੀ ਤੱਕ ਕਰ ਦਿੱਤੀ ਗਈ ਹੈ | ਬਹੁਤੇ ਲੋਕਾਂ ਦਾ ਤਾਂ ਇਹ ਵੀ ਕਹਿਣਾ ਹੈ ਕਿ ਗਲਾਡਾ ਅਧਿਕਾਰੀਆਂ ਨੰੂ ਇਹ ਸਖ਼ਤ ਨਿਰਦੇਸ਼ ਦਿੱਤੇ ਗਏ ਹੋਣ ਕਿ ਜਿਸ ਇਲਾਕੇ ਵਿਚ ਕਿਸੇ ਕਾਲੋਨੀ ਦਾ ਕੰਮ ਚੱਲਦਾ ਹੋਵੇ, ਤੁਸੀਂ ਉਸ ਖੇਤਰ ਤੋਂ ਦੂਰੀ ਬਣਾ ਕੇ ਰੱਖਣੀ ਹੈ, ਜਿੰਨਾ ਚਿਰ ਤੱਕ ਕਾਲੋਨੀ ਦਾ ਕੰਮ ਨੇਪਰੇ ਨਹੀਂ ਚੜ ਜਾਂਦਾ | ਨੁਰਵਾਲ ਦੇ ਨਜ਼ਦੀਕ ਬਹੁਤੀਆਂ ਕਾਲੋਨੀਆਂ ਤਾਂ ਅਜਿਹੀਆਂ ਹਨ, ਜਿਨ੍ਹਾਂ ਵਿਚ ਪਿਛਲੇ ਕਈ ਦਿਨਾਂ ਤੋਂ ਚੱਲ ਰਹੇ ਕੰਮ ਨੇ ਪੂਰੀ ਰਫ਼ਤਾਰ ਫੜੀ ਹੋਈ ਹੈ ਅਤੇ ਸੜਕਾਂ ਪਾਉਣ ਦਾ ਕੰਮ ਲਗਭਗ ਮੁਕੰਮਲ ਹੋ ਚੁੱਕਿਆ ਹੈ | ਇਸ ਤਰ੍ਹਾਂ ਦੀ ਕਾਕੋਵਾਲ ਨੇੜੇ ਵਿਕਸਿਤ ਕੀਤੀ ਜਾ ਰਹੀ ਕਾਲੋਨੀ ਵੀ ਚਰਚਾ ਦਾ ਵਿਸ਼ਾ ਬਣੀ ਹੋਈ ਹੈ, ਪਰ ਜਮਾਲਪੁਰ ਲੇਲੀ ਵਾਲੀ ਸੜਕ 'ਤੇ ਕੱਟੀ ਗਈ ਕਾਲੋਨੀ ਵਿਚ ਤਾਂ ਲੱਗਦਾ ਹੈ ਕਿ ਪਲਾਟਾਂ ਦੀ ਵਿੱਕਰੀ ਵੀ ਸ਼ੁਰੂ ਹੋ ਗਈ ਹੈ, ਕਿਉਂਕਿ ਇੱਥੇ ਵੱਡੇ ਪੱਧਰ 'ਤੇ ਉਸਾਰੀ ਦਾ ਕੰਮ ਵੀ ਚੱਲ ਰਿਹਾ ਹੈ | ਜਦ ਇਸ ਸਬੰਧੀ ਸਬੰਧਿਤ ਵਿਭਾਗ ਦੇ ਅਧਿਕਾਰੀਆਂ ਨਾਲ ਗੱਲ ਕਰਨੀ ਚਾਹੀ ਤਾਂ ਸੰਪਰਕ ਨਹੀਂ ਹੋ ਸਕਿਆ |
ਤਰ੍ਹਾਂ-ਤਰ੍ਹਾਂ ਦੇ ਸਬਜ਼ਬਾਗ ਦਿਖਾ ਕੇ ਖ਼ਰੀਦਦਾਰਾਂ ਨੂੰ ਕੀਤਾ ਜਾ ਰਿਹਾ ਗੁੰਮਰਾਹ
ਸਹੂਲਤਾਂ ਤੋਂ ਸੱਖਣੀਆਂ ਇਨ੍ਹਾਂ ਕਾਲੋਨੀਆਂ ਵਿਚ ਕਲੋਨਾਈਜਰਾਂ ਵਲੋਂ ਤਰ੍ਹਾਂ-ਤਰ੍ਹਾਂ ਦੇ ਸਬਜ਼ਬਾਗ ਦਿਖਾ ਕੇ ਖ਼ਰੀਦਦਾਰਾਂ ਨੂੰ ਗੁੰਮਰਾਹ ਹੀ ਨਹੀਂ ਕੀਤਾ ਜਾ ਰਿਹਾ, ਸਗੋਂ ਉਨ੍ਹਾਂ ਦੀ ਦੋਨੋਂ ਹੱਥਾਂ ਲੁੱਟ ਵੀ ਕੀਤੀ ਜਾ ਰਹੀ ਹੈ | ਦੇਖਿਆ ਜਾਵੇ ਤਾਂ 2-2 ਏਕੜ ਵਿਚ ਕੱਟੀਆਂ ਇਨ੍ਹਾਂ ਕਾਲੋਨੀਆਂ ਵਿਚ ਮਕਾਨ ਬਣਾਉਣ ਲਈ ਮੁੱਢਲੀਆਂ ਸਹੂਲਤਾਂ ਤੋਂ ਵੀ ਵਾਂਝੇ ਹਨ ਖ਼ਰੀਦਦਾਰ, ਜਿਨ੍ਹਾਂ ਨੂੰ ਬਿਜਲੀ-ਪਾਣੀ ਦੀ ਸਮੱਸਿਆ ਆਉਣ ਕਰਕੇ ਲਾਗਲੇ ਟਰਾਂਸਫ਼ਾਰਮਰ ਤੋਂ ਸਿੱਧੀਆਂ ਕੁੰਢੀਆਂ ਲਗਾ ਕੇ ਹੁਣ ਤਾਂ ਡੰਗ ਟਪਾਇਆ ਜਾ ਰਿਹਾ ਹੈ, ਪਰ ਇਨ੍ਹਾਂ ਨੂੰ ਇੱਥੇ ਰਿਹਾਇਸ਼ ਕਰਨ ਉਪਰੰਤ ਮੀਟਰ ਲਗਾਉਣ ਵੇਲੇ ਕਈ ਤਰ੍ਹਾਂ ਦੀਆਂ ਸਮੱਸਿਆਵਾਂ ਨਾਲ ਦੂਜੀਆਂ ਅਣਅਧਿਕਾਰਤ ਕਾਲੋਨੀਆਂ ਦੇ ਵਸਨੀਕਾਂ ਵਾਂਗ ਜੂਝਣਾ ਪਵੇਗਾ |

ਮਾਲ ਮੰਤਰੀ ਦੇ ਹਲਕੇ 'ਚ ਕੱਟੀਆਂ ਜਾ ਰਹੀਆਂ ਅਣਅਧਿਕਾਰਤ ਕਾਲੋਨੀਆਂ ਸਵਾਲਾਂ ਦੇ ਘੇਰੇ 'ਚ <br/>

ਸੰਬੰਧਿਤ ਖ਼ਬਰਾਂ