ਚੰਡੀਗੜ੍ਹ, 2 ਨਵੰਬਰ (ਕਪਿਲ ਵਧਵਾ)-ਚੰਡੀਗੜ੍ਹ ਪੁਲਿਸ ਨੇ ਗੈਰ ਕਾਨੂੰਨੀ ਖੁਦਾਈ ਤੇ ਸਰਕਾਰੀ ਮਿੱਟੀ ਦੀ ਚੋਰੀ ਦੇ ਮਾਮਲੇ 'ਚ ਤਿੰਨ ਵਿਅਕਤੀਆਂ ਨੂੰ ਗਿ੍ਫ਼ਤਾਰ ਕੀਤਾ ਹੈ | ਇਹ ਕਾਰਵਾਈ ਇੰਸਪੈਕਟਰ ਊਸ਼ਾ ਰਾਣੀ, ਐੱਸ. ਐੱਚ. ਓ. ਆਈ. ਟੀ. ਪਾਰਕ ਨੇ ਐਸ. ਡੀ. ਓ. ਦੀ ਸ਼ਿਕਾਇਤ 'ਤੇ ਕੀਤੀ ਹੈ | ਗਿ੍ਫਤਾਰ ਮੁਲਜ਼ਮਾਂ ਦੀ ਪਛਾਣ ਆਲਮ (37) ਵਾਸੀ ਅੰਬਵਾਲਾ ਪੰਚਕੂਲਾ, ਜਸਵੀਰ ਉਰਫ ਜੱਸਾ (21) ਵਾਸੀ ਅਲੀਪੁਰ ਪੰਚਕੂਲਾ ਤੇ ਰਾਹੁਲ ਕੁਮਾਰ ਉਰਫ ਰਾਣਾ (34) ਵਾਸੀ ਗੜ੍ਹਸ਼ੰਕਰ ਜ਼ਿਲ੍ਹਾ ਹੁਸ਼ਿਆਰਪੁਰ ਵਜੋਂ ਹੋਈ ਹੈ | ਜਾਣਕਾਰੀ ਮੁਤਾਬਕ 1 ਨਵੰਬਰ ਨੂੰ ਐਮਰਜੰਸੀ ਅਫ਼ਸਰ ਏ. ਐੱਸ. ਆਈ. ਰੁਬਨੀਨ ਕੌਰ ਡਿਊਟੀ 'ਤੇ ਸੀ, ਜਦੋਂ ਚੰਡੀਗੜ੍ਹ ਹਾਊਸਿੰਗ ਬੋਰਡ ਦੇ ਐੱਸ. ਡੀ. ਓ. ਨਵਨੀਤ ਸ਼ਰਮਾ ਨੇ ਜਾਣਕਾਰੀ ਦਿੱਤੀ ਕਿ ਆਈ. ਟੀ. ਹੈਬਿਟੈਟ ਪ੍ਰਾਜੈਕਟ ਦੇ ਤਹਿਤ ਲਾਲਿਤ ਹੋਟਲ ਤੇ ਭਗਵਾਨਪੁਰਾ ਦੇ ਦਰਮਿਆਨ 123.79 ਏਕੜ ਜ਼ਮੀਨ 'ਤੇ ਤਾਜ਼ਾ ਖੁਦਾਈ ਹੋਈ ਹੈ | ਇਸ 'ਤੇ ਤੁਰੰਤ ਕਾਰਵਾਈ ਕਰਦਿਆਂ ਪੁਲਿਸ ਨੇ ਮੌਕੇ 'ਤੇ ਛਾਪਾ ਮਾਰ ਕੇ ਤਿੰਨ ਮੁਲਜ਼ਮਾਂ ਨੂੰ ਕਾਬੂ ਕੀਤਾ | ਪੁਲਿਸ ਨੇ ਦੋ ਟਿੱਪਰ ਤੇ ਇਕ ਪੋਕਲੇਨ ਮਸ਼ੀਨ ਜੋ ਮਿੱਟੀ ਦੀ ਖੁਦਾਈ 'ਚ ਵਰਤੀ ਜਾ ਰਹੀ ਸੀ, ਨੂੰ ਵੀ ਕਬਜ਼ੇ 'ਚ ਲੈ ਲਿਆ ਹੈ | ਇਸ ਸੰਬੰਧੀ ਧਾਰਾ 21 ਮਾਈਨਜ਼ ਐਂਡ ਮਿਨਰਲਜ਼ ਐਕਟ ਅਤੇ 303(2) ਬੀ. ਐੱਨ. ਐੱਸ. ਤਹਿਤ ਪੁਲਿਸ ਸਟੇਸ਼ਨ ਆਈ. ਟੀ. ਪਾਰਕ 'ਚ ਐੱਫ. ਆਈ. ਆਰ. ਦਰਜ ਹੈ | ਪੁਲਿਸ ਜਾਂਚ ਮੁਤਾਬਕ, ਤਿੰਨਾਂ ਮੁਲਜ਼ਮਾਂ ਦਾ ਪਹਿਲਾਂ ਕੋਈ ਅਪਰਾਧਿਕ ਰਿਕਾਰਡ ਨਹੀਂ ਮਿਲਿਆ | ਅਦਾਲਤ ਵਿਖੇ ਪੇਸ਼ ਕੀਤੇ ਜਾਣ ਤੇ ਮੁਲਜ਼ਮਾਂ ਨੂੰ ਨਿਆਂਇਕ ਹਿਰਾਸਤ ਵਿਚ ਭੇਜ ਦਿੱਤਾ ਗਿਆ ਹੈ | ਇਸ ਮਾਮਲੇ ਦੀ ਜਾਂਚ ਜਾਰੀ ਹੈ ਤੇ ਪੁਲਿਸ ਵਲੋਂ ਮਾਈਨਿੰਗ ਮਾਫੀਆ ਦੇ ਹੋਰ ਸੰਬੰਧਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ |
