ਚੰਡੀਗੜ੍ਹ 23 ਨਵੰਬਰ (ਅਜਾਇਬ ਸਿੰਘ ਔਜਲਾ)- ਟੈਗੋਰ ਥੀਏਟਰ ਵਿਚ ਥੀਏਟਰ ਫ਼ੋਰ ਥੀਏਟਰ ਅਤੇ ਭਾਰਤ ਸਰਕਾਰ ਦੇ ਸੰਸਕਿ੍ਤੀ ਮੰਤਰਾਲੇ, ਹਰਿਆਣਾ ਕਲਾ ਪਰਿਸ਼ਦ ਦੇ ਸਹਿਯੋਗ ਨਾਲ 20ਵਾਂ ਵਿੰਟਰ ਨੈਸ਼ਨਲ ਥੀਏਟਰ ਫ਼ੈਸਟੀਵਲ 2025 ਕਰਵਾਇਆ ਜਾ ਰਿਹਾ ਹੈ | ਉਤਸਵ ਦੇ ਤੀਸਰੇ ਦਿਨ ਅੱਜ 'ਕੈਨ ਆਈ ਸੇ ਸਮਥਿੰਗ' ਨਾਮਕ ਨਾਟਕ ਦਾ ਮੰਚਨ ਹੋਇਆ, ਜਿਸਨੂੰ ਨਿਊ ਉਤਥਾਨ ਥੀਏਟਰ ਗਰੁੱਪ ਨੇ ਪੇਸ਼ ਕੀਤਾ | ਇਹ ਨਾਟਕ ਅਖ਼ਤਰ ਅਲੀ ਦੁਆਰਾ ਲਿਖਿਆ ਗਿਆ ਹੈ ਅਤੇ ਇਸ ਦਾ ਨਿਰਦੇਸ਼ਨ ਨੌਜਵਾਨ ਡਾਇਰੈਕਟਰ ਵਿਕਾਸ ਸ਼ਰਮਾ ਨੇ ਕੀਤਾ | ਦੋ ਪਾਤਰੀਆਂ ਦਾ ਇਹ ਨਾਟਕ 'ਕੈਨ ਆਈ ਸੇ ਸਮਥਿੰਗ?' ਰੰਗਮੰਚ ਕਲਾਕਾਰ ਪਵਨ ਅਤੇ ਕਿਸ਼ੋਰ ਦੀ ਗੱਲਬਾਤ ਨਾਲ ਸ਼ੁਰੂ ਹੁੰਦਾ ਹੈ | ਰੰਗਗੁਰੂ ਪਵਨ ਯੂਨਾਨ ਦੇ ਮਹਾਨ ਦਰਸ਼ਨਿਕ 'ਸੁਕਰਾਤ ਅਤੇ ਪਲੇਟੋ' ਉੱਤੇ ਨਾਟਕ ਲਿਖ ਰਹੇ ਹਨ, ਜਿਸ ਬਾਰੇ ਸੁਣਨ ਲਈ ਕਿਸ਼ੋਰ ਜਿਗਿਆਸਾ ਦਿਖਾਉਂਦਾ ਹੈ | ਪਵਨ ਸੁਕਰਾਤ ਦੇ ਜੀਵਨ ਨੂੰ ਵਰਤਮਾਨ ਕਾਲ ਨਾਲ ਜੋੜਦਿਆਂ ਵੱਖ-ਵੱਖ ਦਿ੍ਸ਼ਿਆਂ ਰਾਹੀਂ ਦਰਸਾਉਣ ਦੀ ਕੋਸ਼ਿਸ਼ ਕਰਦਾ ਹੈ | ਗਰੀਕ ਯੁੱਗ ਅਤੇ ਆਧੁਨਿਕ ਸਮੇਂ ਨੂੰ ਸਾਂਝਾ ਕਰਦਿਆਂ ਪਵਨ, ਸੁਕਰਾਤ ਦੇ ਰੂਪ ਵਿਚ, ਸਮਾਜ ਦੇ ਕਈ ਚਿਹਰਿਆਂ ਤੋਂ ਪਰਦਾ ਹਟਾਉਣ ਦਾ ਕੰਮ ਕਰਦਾ ਹੈ | ਇਸ ਤਰ੍ਹਾਂ ਸੁਕਰਾਤ ਦੀ ਵਿਲੱਖਣ ਕਹਾਣੀ ਦਾ ਵਰਣਨ ਕਰਦਾ ਨਾਟਕ 'ਕੈਨ ਆਈ ਸੇ ਸਮਥਿੰਗ' ਸਮਾਜ ਦੇ ਕਈ ਅਨਸੁਲਝੇ ਪਹਿਰੂਆਂ ਨੂੰ ਸੁਲਝਾਉਣ ਦੀ ਕੋਸ਼ਿਸ਼ ਕਰਦਾ ਹੈ | ਇਸ ਨਾਟਕ 'ਚ ਸਾਗਰ ਸ਼ਰਮਾ, ਰਾਜਵੀ ਕੁਮਾਰ, ਪਾਰਥ ਸ਼ਰਮਾ, ਗੌਰਵ ਦੀਪਕ ਜਾਂਗੜਾ ਨੇ ਆਪਣੇ ਆਪਣੇ ਕਿਰਦਾਰ ਨੂੰ ਬਾਖ਼ੂਬੀ ਨਿਭਾਇਆ ਜਦ ਕਿ ਨਿਰਦੇਸ਼ਨ ਵਿਕਾਸ ਸ਼ਰਮਾ ਵਲੋਂ ਵੀ ਬਾਖ਼ੂਬੀ ਦਿੱਤਾ ਗਿਆ |
