ਮੌਜਲੀਪੁਰ ਵਾਸੀਆਂ ਨੇ ਸਰਪੰਚ 'ਤੇ ਅਦਾਲਤ ਵਲੋਂ ਸਟੇਅ ਹੋਈ ਪੰਚਾਇਤੀ ਜ਼ਮੀਨ 'ਚੋਂ ਪਾਪੂਲਰ ਵੱਢਣ ਦੇ ਲਗਾਏ ਦੋਸ਼ <br/>

ਅ

ਅਜੀਤ ਡੈਸਕ 03-06-2025

ਬੇਲਾ, 2 ਜੂਨ (ਮਨਜੀਤ ਸਿੰਘ ਸੈਣੀ)-ਨੇੜਲੇ ਪਿੰਡ ਮੌਜਲੀਪੁਰ ਦੇ ਸਾਬਕਾ ਪੰਚ ਤੇ ਸਾਬਕਾ ਸਰਪੰਚ ਦੇ ਪਤੀ ਦਵਿੰਦਰ ਸਿੰਘ ਪੁੱਤਰ ਗੁਰਚਰਨ ਸਿੰਘ, ਹਰਪ੍ਰੀਤ ਸਿੰਘ, ਰਾਮ ਲੋਕ, ਪ੍ਰਮਿੰਦਰ ਸਿੰਘ ਆਦਿ ਨੇ ਕਿਹਾ ਕਿ ਮੌਜੂਦਾ ਸਰਪੰਚ ਹਰਭਾਗ ਸਿੰਘ ਪੁੱਤਰ ਕਿ੍ਸ਼ਨ ਸਿੰਘ ਤੇ ਵਾਰਡ ਨੰਬਰ 2 ਦੇ ਮੈਂਬਰ ਪੰਚਾਇਤ ਗੁਰਪ੍ਰੀਤ ਸਿੰਘ ਵਲੋਂ ਪੰਚਾਇਤੀ ਜ਼ਮੀਨ ਜਿਸ 'ਤੇ ਕਿ ਅਦਾਲਤ ਵਲੋਂ ਸਟੇਅ ਲਗਾਈ ਹੋਈ ਹੈ 'ਚੋਂ ਪਾਪੂਲਰ ਦੇ ਦਰੱਖਤ ਵੱਢ ਕੇ ਵੇਚ ਰਹੇ ਹਨ | ਦਵਿੰਦਰ ਸਿੰਘ ਨੇ ਦੱਸਿਆ ਕਿ 31 ਮਈ ਨੂੰ ਉਕਤ ਜ਼ਮੀਨ 'ਚੋਂ ਪਾਪੂਲਰ ਵੱਢ ਕੇ ਗੱਡੀ ਨੰਬਰ ਪੀਬੀ 08 ਐਫ ਐਲ 5611 ਭਰ ਕੇ ਲੈ ਗਏ, ਜਿਸ ਦੀ ਉਨ੍ਹਾਂ ਬਲਾਕ ਵਿਕਾਸ ਅਫ਼ਸਰ ਸ੍ਰੀ ਚਮਕੌਰ ਸਾਹਿਬ ਤੇ ਪੁਲਿਸ ਚੌਕੀ ਬੇਲਾ ਵਿਖੇ ਸ਼ਿਕਾਇਤ ਦਰਜ ਕਰਵਾਈ | ਉਕਤ ਵਿਅਕਤੀਆਂ ਵਿਰੁੱਧ ਕਾਰਵਾਈ ਤਾਂ ਕੀ ਹੋਣੀ ਸੀ ਸਗੋ ਉਸ ਤੋਂ ਬਾਅਦ 1 ਜੂਨ ਨੂੰ ਫੇਰ ਤੋਂ ਟਰਾਲੀਆਂ ਭਰ ਕੇ ਪਾਪੂਲਰ ਵੱਢ ਕੇ ਲੈ ਗਏ | ਮੈਂ ਮੌਕੇ ਦੀਆਂ ਤਸਵੀਰਾਂ, ਵੀਡੀਓ ਸੰਬੰਧਿਤ ਬਲਾਕ, ਜ਼ਿਲ੍ਹੇ ਅਫ਼ਸਰਾਂ, ਪੁਲਿਸ ਨੂੰ ਭੇਜੀਆਂ ਪਰ ਕੋਈ ਕਾਰਵਾਈ ਨਹੀਂ ਹੋਈ ਉਲਟਾ ਅਫ਼ਸਰਾਂ ਨੇ ਮੇਰੇ ਹੀ ਫੋਨ ਚੱਕਣੇ ਹੀ ਬੰਦ ਕਰ ਦਿੱਤੇ | ਦਵਿੰਦਰ ਸਿੰਘ ਨੇ ਦੱਸਿਆ ਕਿ 43 ਕਨਾਲਾਂ ਪੰਚਾਇਤੀ ਜ਼ਮੀਨ 'ਚ 34 ਵਿਅਕਤੀਆਂ ਵਲੋਂ ਨਾਜਾਇਜ਼ ਕਬਜ਼ੇ ਕੀਤੇ ਹੋਏ ਹਨ | ਕਬਜ਼ਾ ਛਡਾਉਣ ਲਈ 2 ਨਵੰਬਰ 2021 ਨੂੰ ਉਸ ਵੇਲੇ ਦੇ ਸਰਪੰਚ ਪਰਮਜੀਤ ਕੌਰ ਵਲੋਂ ਬਾ ਅਦਾਲਤ ਹਰਦਿਆਲ ਸਿੰਘ ਚੱਠਾ ਬਾ - ਅਖਤਿਆਰ ਕੁਲੈਕਟਰ (ਪੰਚਾਇਤ ਲੈਂਡ) ਰੂਪਨਗਰ ਦੀ ਅਦਾਲਤ 'ਚ ਪੰਜਾਬ ਪਬਲਿਕ ਪਿ੍ਮਿਸਜ ਐਂਡ ਲੈਂਡ (ਇਵਿਕਸਨ ਐਂਡ ਰੇਟ ਰਿਕਵਰੀ) ਐਕਟ 1973 ਦੀ ਧਾਰਾ 4 ਦੀ ਉਪ ਧਾਰਾ (1) ਅਧੀਨ ਅਣ- ਅਧਿਕਾਰਿਤ ਤੌਰ 'ਤੇ ਕਾਬਜ਼ਕਾਰਾਂ ਨੂੰ ਉਕਤ ਜਾਇਦਾਦ ਤੋਂ ਬੇਦਖਲ ਕੀਤੇ ਜਾਣ ਦੇ ਨਾਲ-ਨਾਲ ਬਣਦਾ ਰੇਟ ਵੀ ਵਸੂਲ ਕੀਤੇ ਜਾਣ ਦੇ ਹੁਕਮ ਕੀਤੇ ਗਏ ਸਨ ਅਤੇ 5 ਜੂਨ 2023 ਨੂੰ ਹੋਈ ਸੁਣਵਾਈ ਦੌਰਾਨ ਉਕਤ ਜ਼ਮੀਨ 'ਚੋਂ ਸਟੇਅ ਹੁਕਮਾਂ ਦੀ ਇੰਨ ਬਿੰਨ ਪਾਲਣਾ ਕਰਨ ਕਿਸੇ ਕਿਸਮ ਦੀ ਦਖਲਅੰਦਾਜ਼ੀ, ਬਹਾਈ ਕਟਾਈ, ਬਿਜਾਈ ਤੇ ਅਗਲੇ ਹੁਕਮਾਂ ਤੱਕ ਰੋਕ ਲਗਾਈ ਗਈ ਹੋਈ ਹੈ ਪਰ ਇਸ ਦੇ ਬਾਵਜੂਦ ਵੀ ਮੌਜੂਦਾ ਸਰਪੰਚ ਹਰਭਾਗ ਸਿੰਘ, ਜਿਸ ਦੀ ਪੰਚਾਇਤੀ ਜ਼ਮੀਨ ਜਾਇਦਾਦ ਦੀ ਰਾਖੀ ਕਰਨ ਦੀ ਜ਼ਿੰਮੇਵਾਰੀ ਹੈ ਉਹ ਆਪ ਹੀ ਕਾਨੂੰਨ ਦੀਆਂ ਧੱਜੀਆਂ ਉਡਾਉਂਦੇ ਹੋਏ ਝਗੜੇ ਵਾਲੀ ਜ਼ਮੀਨ 'ਚੋਂ ਅਧਿਕਾਰੀਆਂ ਤੇ ਪੁਲਿਸ ਦੀ ਮਿਲੀਭੁਗਤ ਨਾਲ ਪਾਪੂਲਰ ਚੋਰੀ ਕਰਕੇ ਵੇਚ ਰਿਹਾ ਹੈ | ਪਰ ਸਥਾਨਕ ਅਧਿਕਾਰੀਆਂ ਤੋਂ ਲੈ ਕੇ ਮੁੱਖ ਮੰਤਰੀ ਪੰਜਾਬ ਨੂੰ ਸ਼ਿਕਾਇਤਾਂ ਕਰਨ ਦੇ ਬਾਵਜੂਦ ਕੋਈ ਕਾਰਵਾਈ ਨਹੀਂ ਹੋ ਰਹੀ | ਇਸ ਮੌਕੇ ਦਵਿੰਦਰ ਸਿੰਘ ਪੁੱਤਰ ਗੁਰਚਰਨ ਸਿੰਘ, ਹਰਪ੍ਰੀਤ ਸਿੰਘ, ਰਾਮ ਲੋਕ, ਪ੍ਰਮਿੰਦਰ ਸਿੰਘ ਆਦਿ ਨੇ ਮੁੱਖ ਮੰਤਰੀ ਪੰਜਾਬ ਭਗਵੰਤ ਸਿੰਘ ਮਾਨ, ਹਲਕਾ ਵਿਧਾਇਕ ਡਾ. ਚਰਨਜੀਤ ਸਿੰਘ, ਡਿਪਟੀ ਕਮਿਸ਼ਨਰ, ਡੀ. ਡੀ. ਪੀ. ਓ., ਬੀ. ਡੀ. ਪੀ. ਓ. ਸ੍ਰੀ ਚਮਕੌਰ ਸਾਹਿਬ ਤੋਂ ਮੰਗ ਕੀਤੀ ਕਿ ਸਰਪੰਚ ਹਰਭਾਗ ਸਿੰਘ, ਪੰਚ ਗੁਰਪ੍ਰੀਤ ਸਿੰਘ ਤੇ ਠੇਕੇਦਾਰ ਇੰਦਰਜੀਤ ਸਿੰਘ ਵਾਸੀ ਪਿੰਡ ਬਾਮਾਕੁਲੀਆ ਵਿਰੁੱਧ ਸਖਤ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇ |
ਕੀ ਕਹਿਣਾ ਹੈ ਸਰਪੰਚ ਹਰਭਾਗ ਸਿੰਘ ਦਾ
ਇਸ ਸੰਬੰਧੀ ਮੌਜਲੀਪੁਰ ਦੇ ਮੌਜੂਦਾ ਸਰਪੰਚ ਹਰਭਾਗ ਸਿੰਘ ਨੇ ਆਪਣੇ 'ਤੇ ਲੱਗੇ ਦੋਸ਼ਾਂ ਨੂੰ ਨਕਾਰਦਿਆਂ ਕਿਹਾ ਕਿ ਪਿਛਲੀ ਪੰਚਾਇਤ ਵਲੋਂ ਉਨ੍ਹਾਂ ਨੂੰ ਕੇਸ ਸੰਬੰਧੀ ਕੋਈ ਕਾਗਜ਼ਾਤ ਵਗੈਰਾ ਨਹੀਂ ਦਿੱਤੇ ਅਤੇ ਨਾ ਈ ਉਨ੍ਹਾਂ ਨੂੰ ਇਹ ਪਤਾ ਹੈ ਕਿ ਇਹ ਜ਼ਮੀਨ ਪੰਚਾਇਤ ਦੀ ਹੈ ਜਾਂ ਨਹੀਂ ਸਿਰਫ਼ ਸਟੇਅ ਦੀ ਕਾਪੀ ਦਿੱਤੀ ਸੀ | ਉਨ੍ਹਾਂ ਨੇ ਪੰਚਾਇਤ ਵਲੋਂ ਮਤਾ ਪਾ ਕੇ ਪਾਪੂਲਰ ਪੁੱਟਣ ਵਾਲੇ ਇੰਦਰਜੀਤ ਸਿੰਘ ਵਾਸੀ ਪਿੰਡ ਬਾਮਾਕੁਲੀਆ ਵਿਰੁੱਧ ਪੁਲਿਸ ਚੌਕੀ ਬੇਲਾ ਤੇ ਬੀ. ਡੀ. ਪੀ. ਓ. ਸ੍ਰੀ ਚਮਕੌਰ ਸਾਹਿਬ ਨੂੰ ਸ਼ਿਕਾਇਤਾਂ ਕੀਤੀਆਂ ਹੋਈਆਂ ਹਨ ਪਰ ਕੋਈ ਕਾਰਵਾਈ ਨਹੀਂ ਹੋਈ | ਉਨ੍ਹਾਂ ਨੇ ਝਗੜੇ ਵਾਲੀ ਜ਼ਮੀਨ ਸੰਬੰਧੀ ਪਿੰਡ ਵਿਚ ਵੀ ਅਨਾਊਸਮੈਂਟ ਕਰਵਾਈ ਸੀ ਕਿ ਕੋਈ ਵੀ ਪਿੰਡ ਵਾਸੀ ਉਸ ਜ਼ਮੀਨ 'ਚ ਕੋਈ ਦਖਲਅੰਦਾਜ਼ੀ ਨਾ ਕਰੇ ਤੇ ਕੰਡਾ ਤਾਰ ਵੀ ਲਗਾ ਦਿੱਤੀ ਸੀ ਪਰ ਸ਼ਿਕਾਇਤਕਰਤਾ ਸਾਬਕਾ ਪੰਚ ਦਵਿੰਦਰ ਸਿੰਘ ਵਲੋਂ ਦੂਜੇ ਹੀ ਦਿਨ ਤਾਰਾ ਪੁੱਟ ਕੇ ਆਪਣੇ ਘਰ ਲੈ ਗਿਆ | ਸਰਪੰਚ ਹਰਭਾਗ ਸਿੰਘ ਨੇ ਬਲਾਕ ਵਿਕਾਸ ਅਫ਼ਸਰ ਸ੍ਰੀ ਚਮਕੌਰ ਸਾਹਿਬ 'ਤੇ ਦੋਸ਼ ਲਗਾਉਂਦੇ ਹੋਏ ਕਿਹਾ ਕਿ ਉਹ ਤੇ ਦਵਿੰਦਰ ਸਿੰਘ ਵਲੋਂ ਉਨ੍ਹਾਂ ਨੂੰ ਜਾਣ ਬੁੱਝ ਕੇ ਤੰਗ ਪ੍ਰੇਸ਼ਾਨ ਕੀਤਾ ਜਾ ਰਿਹਾ ਹੈ | ਇਸ ਸੰਬੰਧੀ ਉਨ੍ਹਾਂ ਨੇ ਹਲਕੇ ਦੇ ਵਿਧਾਇਕ ਡਾ. ਚਰਨਜੀਤ ਸਿੰਘ ਨੂੰ ਵੀ ਸਾਰੀ ਸਥਿਤੀ ਬਾਰੇ ਜਾਣਕਾਰੀ ਦੇ ਚੁੱਕੇ ਹਨ |

ਮੌਜਲੀਪੁਰ ਵਾਸੀਆਂ ਨੇ ਸਰਪੰਚ 'ਤੇ ਅਦਾਲਤ ਵਲੋਂ ਸਟੇਅ ਹੋਈ ਪੰਚਾਇਤੀ ਜ਼ਮੀਨ 'ਚੋਂ ਪਾਪੂਲਰ ਵੱਢਣ ਦੇ ਲਗਾਏ ਦੋਸ਼ <br/>

ਸੰਬੰਧਿਤ ਖ਼ਬਰਾਂ