ਬੇਲਾ, 1 ਸਤੰਬਰ (ਮਨਜੀਤ ਸਿੰਘ ਸੈਣੀ)-ਬੀਤੇ ਦੋ ਤਿੰਨ ਦਿਨਾਂ ਤੋਂ ਹੋ ਰਹੀ ਭਾਰੀ ਬਰਸਾਤ ਲੋਕਾਂ ਦੀਆਂ ਪ੍ਰੇਸ਼ਾਨੀਆਂ ਵਧਾ ਰਹੀ ਹੈ ਉਥੇ ਦੁਜੇ ਪਾਸੇ ਸਤਲੁਜ ਦਰਿਆ ਵਿਚ ਤੇਜੀ ਨਾਲ ਵਗ ਰਿਹਾ ਪਾਣੀ ਪਿੰਡ ਦਾਊਦਪੂਰ ਨੇੜੇ ਜ਼ਮੀਨ ਨੂੰ ਢਾਹ ਲਗਾ ਰਿਹਾ ਹੈ, ਲੋਕਾਂ ਦੀਆਂ ਹੋਰ ਪ੍ਰੇਸ਼ਾਨੀਆਂ 'ਚ ਵਾਧਾ ਕਰ ਰਿਹਾ ਹੈ | ਇਲਾਕੇ ਦੇ ਨੌਜਵਾਨ ਜ਼ਮੀਨ ਨੂੰ ਖੋਰਾ ਲੱਗਣ ਤੋਂ ਬਚਾਉਣ ਲਈ ਦਰੱਖ਼ਤ ਵੱਡ ਕੇ ਸੁੱਟ ਰਹੇ ਹਨ, ਪਰ ਦਰਿਆ ਦਾ ਤੇਜ਼ ਪਾਣੀ ਆਪਣੇ ਨਾਲ ਵਹਾਅ ਕੇ ਲੈ ਜਾ ਰਿਹਾ ਹੈ, ਜਿਸ ਕਰਕੇ ਕਿਸਾਨ ਮਹਿੰਦਰ ਸਿੰਘ ਵਾਸੀ ਮਾਲੇਵਾਲ ਦੀ ਕਰੀਬ ਡੇਢ ਏਕੜ ਤੋਂ ਵੱਧ ਜਮੀਨ ਸੱਤ ਅੱਠ ਸੌ ਦੇ ਕਰੀਬ ਪਾਪੂਲਰ ਦੇ ਦਰਖ਼ਤ ਸਤਲੁਜ ਦਰਿਆ ਦੇ ਪਾਣੀਆਂ ਦੀ ਭੇਟ ਚੜ੍ਹ ਗਏ | ਲਗਾਤਾਰ ਪੈ ਰਹੇ ਮੀਂਹ ਕਾਰਨ ਦਰਿਆ ਦੇ ਬੰਨ੍ਹ ਵਾਲਾ ਰਾਹ ਖਰਾਬ ਹੋਣ ਕਾਰਣ ਉਕਤ ਥਾਂ 'ਤੇ ਮਿੱਟੀ ਦੀਆਂ ਭਰੀਆਂ ਟਰਾਲੀਆਂ ਨਹੀਂ ਜਾ ਸਕਦੀਆਂ, ਜਿਸ ਕਰਕੇ ਮਿੱਟੀ ਦੇ ਥੈਲੇ ਵੀ ਭਰ ਕੇ ਨਹੀਂ ਲਗਾਏ ਜਾ ਸਕਦੇ | ਮੌਕੇ 'ਤੇ ਸਿਵਲ ਤੇ ਪੁਲਿਸ ਪ੍ਰਸ਼ਾਸਨ ਮੁਸਤੈਦੀ ਨਾਲ ਸਾਰੇ ਹਾਲਤਾਂ ਤੇ ਨਿਗਾਹ ਬਣਾਈ ਹੋਈ ਹੈ, ਐਸ. ਡੀ. ਐਮ. ਅਮਰੀਕ ਸਿੰਘ ਸਿੱਧੂ, ਡੀ. ਐਸ. ਪੀ. ਮਨਜੀਤ ਸਿੰਘ ਔਲਖ, ਥਾਣਾ ਮੁਖੀ ਗੁਰਪ੍ਰੀਤ ਸਿੰਘ ਮੌਕੇ 'ਤੇ ਮੌਜੂਦ ਹਨ | ਐਸ. ਡੀ. ਐਮ. ਸਿੱਧੂ ਨੇ ਕਿਹਾ ਕਿ ਪ੍ਰਸ਼ਾਸਨ ਹਰ ਤਰ੍ਹਾਂ ਨਾਲ ਮੁਸਤੈਦ ਹੈ, ਇਲਾਕੇ ਦੇ ਨੌਜਵਾਨਾਂ ਵਲੋਂ ਪ੍ਰਸ਼ਾਸਨ ਦਾ ਹਰ ਤਰ੍ਹਾਂ ਨਾਲ ਸਹਿਯੋਗ ਕੀਤਾ ਜਾ ਰਿਹਾ ਹੈ, ਪਰ ਖ਼ਰਾਬ ਮੌਸਮ ਹਰ ਨਾਲ ਅੜਿੱਕਾ ਹੈ, ਜਿਵੇਂ ਹੀ ਮੌਸਮ ਸਾਫ਼ ਹੁੰਦਾ ਹੈ, ਮਿੱਟੀ ਦੇ ਥੈਲੇ ਲਗਾ ਕੇ ਪਾਣੀ ਦਾ ਰੁੱਖ ਮੋੜਨ ਦੇ ਉਪਰਾਲੇ ਕੀਤੇ ਜਾਣਗੇ |
