ਰਾਜਪੁਰਾ, 31 ਮਈ (ਰਣਜੀਤ ਸਿੰਘ)-ਰਾਜਪੁਰਾ ਸ਼ਹਿਰ ਅਤੇ ਆਲੇ ਦੁਆਲੇ ਦਾ ਖੇਤਰ ਸਵੇਰ ਤੋਂ ਭੱਠ ਵਾਂਗ ਤਪ ਰਿਹਾ ਸੀ ਪਰ ਸ਼ਾਮ ਸਮੇਂ ਇਕ ਦਮ ਤੇਜ਼ ਹਵਾ ਹਨੇਰੀ ਬਣ ਗਈ | ਇਸ ਤੋਂ ਬਾਅਦ ਭਰਵੀਂ ਬਾਰਸ਼ ਹੋਈ | ਭਾਵੇਂ ਕਿ ਇਸ ਨਾਲ ਆਮ ਲੋਕਾਂ ਨੇ ਗਰਮੀ ਤੋਂ ਰਾਹਤ ਮਹਿਸੂਸ ਕੀਤੀ ਪਰ ਅਨਾਜ ਮੰਡੀ ਵਿਚ ਆਈ ਕਿਸਾਨਾਂ ਦੀ ਸੂਰਜਮੁਖੀ ਦੀ ਫ਼ਸਲ ਭਿੱਜ ਗਈ | ਇਸ 'ਤੇ ਕਿਸਾਨ ਆਪਣੀ ਕਿਸਮਤ ਅਤੇ ਕੁਦਰਤ ਤੇ ਗਿੱਲੇ ਸ਼ਿਕਵੇ ਕਰਦੇ ਨਜਰੀ ਆਏ | ਅਨਾਜ ਮੰਡੀ ਵਿਚ ਕਿਸਾਨਾਂ ਦੀ ਸੂਰਜ ਮੁਖੀ ਦੀ ਫ਼ਸਲ ਬਾਰਿਸ਼ ਵਿਚ ਬੁਰੀ ਤਰ੍ਹਾਂ ਨਾਲ ਭਿੱਜਦੀ ਵੀ ਵੇਖੀ ਗਈ | ਇਸ ਸੰਬੰਧੀ 'ਅਜੀਤ' ਨੰੂ ਜਾਣਕਾਰੀ ਦਿੰਦੇ ਹੋਏ ਮੁਖ਼ਤਿਆਰ ਸਿੰਘ, ਕਸ਼ਮੀਰ ਸਿੰਘ, ਤੇਜਪਾਲ ਸਿੰਘ, ਲਛਮਣ ਸਿੰਘ ਅਤੇ ਹੋਰ ਕਿਸਾਨਾਂ ਨੇ ਦੱਸਿਆ ਕਿ ਅੱਜ ਮੰਡੀ ਵਿਚ ਕਈ ਕਿਸਾਨ ਸੂਰਜਮੁਖੀ ਦੀ ਫ਼ਸਲ ਲੈ ਕੇ ਆਏ ਸਨ | ਅਚਾਨਕ ਆਈ ਬਾਰਸ਼ ਕਾਰਨ ਕਿਸਾਨਾਂ ਦੀ ਸੂਰਜ ਮੁਖੀ ਦੀ ਫ਼ਸਲ ਭਿੱਜ ਗਈ ਹੈ | ਉਨ੍ਹਾਂ ਦਾ ਕਹਿਣਾ ਹੈ ਕਿ ਹੁਣ ਮੁੜ ਤੋਂ ਸੂਰਜਮੁਖੀ ਦੀ ਭਿੱਜੀ ਹੋਈ ਫ਼ਸਲ ਨੂੰ ਸੁਕਾਉਣਾ ਪਵੇਗਾ ਤਾਂ ਕਿਤੇ ਜਾ ਕੇ ਕਿਸਾਨ ਦੇ ਪੱਲੇ ਚਾਰ ਪੈਸੇ ਪੈਣਗੇ |
