ਪਟਿਆਲਾ, 5 ਸਤੰਬਰ (ਧਰਮਿੰਦਰ ਸਿੰਘ ਸਿੱਧੂ)-ਪਟਿਆਲਾ ਦੇ ਨੇੜਲੇ ਪਿੰਡ ਬਰਸਟ ਜਿਥੋਂ ਦੇ ਮੰਡੀ ਬੋਰਡ ਦੇ ਚੇਅਰਮੈਨ ਹਰਚੰਦ ਸਿੰਘ ਬਰਸਟ ਹਨਉੱਥੇ ਜਲਦ ਹੀ ਦੋ ਵੱਡੀਆਂ ਸਬਜ਼ੀ ਅਤੇ ਦਾਣਾ ਮੰਡੀਆਂ ਬਣੀਆਂ ਵੇਖਣ ਨੂੰ ਮਿਲਣਗੀਆਂ ਅਤੇ ਇਸ ਤੋਂ ਇਲਾਵਾ ਬਰਸਟ ਤੋਂ ਨਾਭੇ ਨੂੰ ਜਾਂਦੀ 18 ਫੁਟੀ ਸੜਕ ਜੋ ਕਿ ਥਾਵਾਂ ਤੋਂ ਖਸਤਾ ਹਾਲਤ ਵਿਚ ਹੋ ਗਈ ਹੈ ਦੇ ਦੁਬਾਰਾ ਬਣਨ ਦੀ ਗੱਲ ਵੀ ਸਾਹਮਣੇ ਆ ਰਹੀ ਹੈ | ਦੱਸਣਯੋਗ ਹੈ ਕਿ ਪਟਿਆਲਾ-ਸੰਗਰੂਰ ਰੋਡ ਤੋਂ ਨਾਭੇ ਨੂੰ ਜਾਣ ਲਈ ਬਰਸਟ-ਨਾਭਾ ਸੜਕ ਦੀ ਹੁਣ ਵਰਤੋਂ ਪਹਿਲਾਂ ਨਾਲੋਂ ਕਾਫੀ ਵੱਧ ਗਈ ਹੈ ਕਿਉਂਕਿ ਇਸ 'ਤੇ ਟ੍ਰੈਫਿਕ ਘੱਟ ਅਤੇ ਸਮੇਂ ਦੀ ਬੱਚਤ ਹੋਣ ਕਾਰਨ ਨਾਭੇ ਜਾਣ ਵਾਲੇ ਰਾਹਗੀਰਾਂ ਵਲੋਂ ਇਸ ਨੂੰ ਹੀ ਮੁੱਖ ਸੜਕ ਦੇ ਤੌਰ 'ਤੇ ਵਰਤਿਆ ਜਾਂਦਾ ਹੈ | ਲੰਘੇ ਦਿਨੀਂ ਬਰਸਾਤਾਂ ਦੇ ਚੱਲਦਿਆਂ ਬਰਸਟ ਤੋਂ ਪਟਿਆਲਾ ਵੱਲ ਨੂੰ ਆਉਂਦੀ ਸੜਕ ਉਤੇ ਫ਼ੌਜੀ ਏਰੀਏ ਵਿਚੋਂ ਲੰਘਣਾ ਝਾੜੀਆਂ ਦੇ ਸੜਕ ਦੇ ਦੋਵੇਂ ਪਾਸੇ ਡਿਗਣ ਨਾਲ ਇੰਨਾ ਮੁਸ਼ਕਿਲ ਹੋ ਗਿਆ ਸੀ ਕਿਸੇ ਨਾ ਕਿਸੇ ਵੱਡੇ ਹਾਦਸੇ ਦੇ ਵਾਪਰਨ ਦਾ ਖ਼ਦਸ਼ਾ ਹੈ | ਪ੍ਰੰਤੂ ਹੁਣ ਪਿੰਡ ਬਰਸਟ ਦੇ ਸਰਪੰਚ ਨਰਿੰਦਰ ਸਿੰਘ ਦੇ ਦੱਸਣ ਮੁਤਾਬਿਕ ਇਨ੍ਹਾਂ ਝਾੜੀਆਂ ਨੂੰ ਜਲਦ ਤੋਂ ਜਲਦ ਸਾਫ਼ ਕਰਵਾਇਆ ਜਾਵੇਗਾ ਤਾਂ ਜੋ ਰਾਹਗੀਰਾਂ ਨੂੰ ਕਿਸੇ ਸਮੱਸਿਆ ਦਾ ਸਾਹਮਣਾ ਨਾ ਕਰਨਾ ਪਵੇ | ਇਸ ਮੌਕੇ 'ਅਜੀਤ' ਨਾਲ ਗੱਲਬਾਤ ਕਰਦਿਆਂ ਸਰਪੰਚ ਨਰਿੰਦਰ ਸਿੰਘ ਨੇ ਦੱਸਿਆ ਕਿ ਚੇਅਰਮੈਨ ਹਰਚੰਦ ਸਿੰਘ ਬਰਸਟ ਉਨ੍ਹਾਂ ਦੇ ਵੱਡੇ ਭਰਾ ਹਨ ਅਤੇ ਬਰਸਟ ਪਿੰਡ ਦੀ ਨੁਹਾਰ ਬਦਲਣ ਵਿਚ ਅਸੀਂ ਕੋਸ਼ਿਸ਼ ਕਰਦੇ ਆ ਰਹੇ ਹਾਂ | ਉਨ੍ਹਾਂ ਕਿਹਾ ਕਿ ਚੇਅਰਮੈਨ ਹਰਚੰਦ ਸਿੰਘ ਬਰਸਟ ਵਲੋਂ ਆਪਣੇ ਪਿੰਡ ਵਾਸੀਆਂ ਲਈ ਮਹਿਮਦਪੁਰ ਅੱਡੇ ਨਾਲ ਲੱਗਦੀ 100 ਵਿੱਘੇ ਜ਼ਮੀਨ ਵਿਚ ਦੋ ਮੰਡੀਆਂ ਦਾ ਕੰਮ ਚਾਲੂ ਕਰਵਾਇਆ ਗਿਆ ਹੈ | ਜਿਸ ਵਿਚੋਂ 40 ਵਿੱਘੇ ਵਿਚ ਸਬਜ਼ੀ ਮੰਡੀ ਅਤੇ 60 ਵਿੱਘੇ ਵਿਚ ਦਾਣਾ ਮੰਡੀ ਹੋਵੇਗੀ |