ਜਲੰਧਰ, 22 ਸਤੰਬਰ (ਡਾ.ਜਤਿੰਦਰ ਸਾਬੀ)-ਕੋਰੀਆ ਦੇ ਸ਼ਹਿਰ ਮੰਗਯੌਗ ਵਿਖੇ ਕਰਵਾਈ ਗਈ ਏਸ਼ੀਅਨ ਸਾਫਟ ਟੈਨਿਸ ਚੈਂਪੀਅਨਸ਼ਿੱਪ ਭਾਰਤੀ ਸਾਫਟ ਟੈਨਿਸ ਟੀਮ ਦੇ ਖਿਡਾਰੀਆਂ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ | ਪੰਜਾਬ ਦੀ ਮਹਿਲਾ ਕੋਚ ਅਮਰਜੀਤ ਕੌਰ ਦੀ ਅਗਵਾਈ 'ਚ ਗਈ ਇਸ ਟੀਮ ਦੇ ਖਿਡਾਰੀਆਂ ਨੇ ਪਹਿਲੀ ਵਾਰ ਤਗਮਾ ਜਿੱਤ ਕੇ ਮਾਣਮੱਤੀ ਪ੍ਰਾਪਤੀ ਕੀਤੀ | ਇਹ ਜਾਣਕਾਰੀ ਦਿੰਦੇ ਹੋਏ ਭਾਰਤੀ ਸਾਫਟ ਟੈਨਿਸ ਐਸੋਸੀਏਸ਼ਨ ਦੇ ਸਹਾਇਕ ਸਕੱਤਰ ਨਰਿੰਦਰਪਾਲ ਸਿੰਘ ਨੇ ਦੱਸਿਆ ਕਿ ਭਾਰਤੀ ਟੀਮ ਦੇ ਕੋਚ ਕਾਰਤਿਕ ਤੇ ਮਹਿਲਾ ਕੋਚ ਅਮਰਜੀਤ ਕੌਰ ਦੀ ਅਗਵਾਈ ਹੇਠ ਟੀਮ ਦੇ ਖਿਡਾਰੀਆਂ ਨੇ ਮਰਦਾਂ ਦੇ ਵਰਗ 'ਚ ਜੈ ਮੀਣਾ, ਤਿਵਾਰੀ ਨੇ ਸਿੰਗਲ ਵਰਗ 'ਚ ਤੇ ਡਬਲਜ਼ ਵਰਗ ਤੇ ਮਿਸ਼ਰਤ ਟੀਮ ਵਰਗ 'ਚ ਰਾਜਵੀਰ, ਅਨੀਕੇਤ, ਆਰੀਅਨ, ਜੈ ਮੀਣਾ, ਓਮ ਯਾਦਵ ਤੇ ਮਹਿਲਾ ਟੀਮ ਦੇ ਵਿਚ ਤਨੂੰਸ਼੍ਰੀ, ਤਿਵਾੜੀ, ਅਨੁਸ਼ਕਾ ਦੀ ਟੀਮ ਨੇ ਕਾਂਸੀ ਦਾ ਤਗਮਾ ਹਾਸਲ ਕੀਤਾ | ਜੇਤੂ ਟੀਮ ਨੂੰ ਪੰਜਾਬ ਸਾਫਟ ਟੈਨਿਸ ਐਸੋਸੀਏਸ਼ਨ ਦੇ ਸਹਾਇਕ ਸਕੱਤਰ ਡਾ. ਪ੍ਰਦੀਪ ਕੁਮਾਰ ਸਿੰਘ ਨੇ ਵਧਾਈ ਦਿੱਤੀ ਹੈ |
