ਜੰਮੂ, 17 ਅਕਤੂਬਰ (ਪੀ. ਟੀ. ਆਈ.)-ਜੰਗ ਦੀਆਂ ਨਵੀਆਂ ਰਣਨੀਤੀਆਂ ਸਿੱਖਣ ਦੇ ਨਾਲ ਭਾਰਤ ਦੀ ਅਗਲੀ ਪੀੜ੍ਹੀ ਦੀ ਯੁੱਧਕਲਾ ਦੀ ਤਿਆਰੀ ਦੇ ਨਵੇਂ ਮਿਆਰ ਸਥਾਪਤ ਕਰਨ ਦੇ ਲਈ ਫੌਜ ਦੀ ਉੱਤਰੀ ਕਮਾਨ ਦੇ ਤਹਿਤ ਆਯੋਜਿਤ ਇਕ ਬਹੁ-ਪੱਖੀ ਅਭਿਆਸ ਸਫਲਤਾਪੂਰਵਕ ਪੂਰਾ ਕੀਤਾ ਗਿਆ | ਫ਼ੌਜ ਦੇ ਅਨੁਸਾਰ, ਇਸ ਅਭਿਆਸ ਦੌਰਾਨ ਕਮਾਂਡਰਾਂ, ਸਟਾਫ਼ ਤੇ ਸੈਨਿਕਾਂ ਨੂੰ ਸਾਇਬਰ, ਪੁਲਾੜ, ਇਲੈਕਟ੍ਰੋਮੇਗਨੈਟਿਕ ਤੇ ਬੋਧਿਕ ਪੱਖ 'ਚ ਉਭਰ ਰਹੇ ਖਤਰਿਆਂ ਨਾਲ ਨਜਿੱਠਣ ਲਈ ਚੁਣੌਤੀਆਂ ਦਾ ਅਭਿਆਸ ਕਰਵਾਇਆ ਗਿਆ ਹੈ | ਇਸ 'ਚ ਕੇਂਦਰੀ ਸਸ਼ਤਰ ਪੁਲਿਸ ਬਲਾਂ, ਤਿੰਨੋ ਫੌਜਾਂ, ਕੇਂਦਰੀ ਏਜੰਸੀਆਂ ਤੇ ਨਿੱਜੀ ਖੇਤਰ ਦੇ ਪ੍ਰਤੀਨਿਧੀਆਂ ਨੇ ਸਾਂਝੇ ਤੌਰ 'ਤੇ ਭਾਗ ਲਿਆ | ਜਿਸ ਨਾਲ ਸਪੱਸ਼ਟ ਹੋਇਆ ਕਿ ਅੱਜ ਦੀਆਂ ਮੁਸ਼ਕਿਲ ਸੁਰੱਖਿਆ ਸਥਿਤੀਆਂ 'ਚ 'ਰਾਸ਼ਟਰ-ਪੱਧਰੀ ਸਹਿਯੋਗਮਈ ਦਿ੍ਸ਼ਟੀਕੋਣ' ਬਹੁਤ ਜ਼ਰੂਰੀ ਹੈ | ਇਸ ਮÏਕੇ 'ਤੇ ਲੈਫਟੀਨੈਂਟ ਜਨਰਲ ਪ੍ਰਤੀਕ ਸ਼ਰਮਾ ਨੇ ਅਧਿਕਾਰੀਆਂ ਤੇ ਸੈਨਿਕਾਂ ਨਾਲ ਗੱਲਬਾਤ ਕੀਤੀ ਤੇ ਕਿਹਾ ਕਿ ਆਧੁਨਿਕ ਯੁੱਧ 'ਚ ਵੱਖ-ਵੱਖ ਖੇਤਰਾਂ ਵਿਚਕਾਰ ਸੀਮਾਵਾਂ ਧੁੰਦਲੀਆਂ ਹੋ ਗਈਆਂ ਹਨ | ਇਸ ਲਈ, ਸਾਨੂੰ ਨਵੀਨਤਾਕਾਰੀ ਸੋਚ ਨਾਲ ਨਵੀਂ ਤਕਨਾਲੋਜੀ ਦੀ ਵੱਧ ਤੋਂ ਵੱਧ ਵਰਤੋਂ ਕਰਨੀ ਚਾਹੀਦੀ ਹੈ | ਇਹ ਫ਼ੌਜੀ ਅਭਿਆਸ 4 ਅਕਤੂਬਰ ਨੂੰ ਮਥੁਰਾ 'ਚ 'ਸੰਵਾਦ' ਪ੍ਰੋਗਰਾਮ 'ਚ ਹੋਏ ਵਿਚਾਰ-ਵਟਾਂਦਰੇ ਤੋਂ ਬਾਅਦ ਸ਼ੁਰੂ ਕੀਤਾ ਗਿਆ ਸੀ | ਇਸ ਅਭਿਆਸ ਨੇ ਦਿਖਾਇਆ ਕਿ ਭਵਿੱਖ ਦੇ ਯੁੱਧਾਂ ਦੀ ਤਿਆਰੀ ਸਿਰਫ ਖੁੱਲ੍ਹੇ ਦਿਮਾਗ, ਸਮੂਹਿਕ ਸਹਿਯੋਗ ਤੇ ਚੰਗੀ ਤਰ੍ਹਾਂ ਸੰਗਠਿਤ ਟੀਮ ਵਰਕ ਨਾਲ ਹੀ ਸੰਭਵ ਹੈ |
