ਨੱਥੂਵਾਲਾ ਗਰਬੀ, 1 ਸਤੰਬਰ (ਨਵਦੀਪ ਸਿੰਘ)-ਪਿਛਲੇ ਇਕ ਹਫ਼ਤੇ ਤੋਂ ਲਗਾਤਾਰ ਹੋ ਰਹੀ ਭਾਰੀ ਬਾਰਸ਼ ਲੋਕਾਂ ਲਈ ਆਫ਼ਤ ਬਣ ਗਈ ਹੈ | ਡੈਮ, ਦਰਿਆ, ਨਦੀਆਂ ਸਭ ਨੱਕੋਂ ਨੱਕ ਭਰੇ ਦਿਸ ਰਹੇ ਹਨ | ਪੰਜਾਬ ਚ ਫ਼ਸਲਾਂ ਬਰਬਾਦ ਹੋ ਚੁੱਕੀਆਂ ਹਨ | ਇਹ ਬਾਰਿਸ਼ ਖ਼ਾਸ ਕਰਕੇ ਗਰੀਬ ਪਰਿਵਾਰਾਂ ਵਾਸਤੇ ਕਿਸੇ ਕਹਿਰ ਤੋਂ ਘੱਟ ਨਹੀਂ ਹੈ | ਬੀਤੀ ਰਾਤ ਪਿੰਡ ਭਲੂਰ ਵਿਚ ਹੋਈ ਤੇਜ਼ ਬਾਰਸ਼ ਦੇ ਕਾਰਨ ਗਰੀਬ ਪਰਿਵਾਰ ਸੁਖਜੀਤ ਸਿੰਘ ਪੁੱਤਰ ਪੂਰਨ ਸਿੰਘ ਵਾਸਤੇ ਕਿਆਮਤ ਬਣ ਕੇ ਆਈ | ਗਰੀਬ ਪਰਿਵਾਰ ਦੇ ਇਕ ਕਮਰੇ ਦੀ ਛੱਤ ਡਿੱਗ ਪਈ | ਪਰ ਪਰਿਵਾਰ ਦੂਸਰੇ ਕਮਰੇ ਵਿਚ ਸੁੱਤਾ ਪਿਆ ਹੋਣ ਦੇ ਕਾਰਨ ਜਾਨੀ ਨੁਕਸਾਨ ਹੋਣ ਤੋਂ ਬਚਾ ਹੋ ਗਿਆ | ਸੁਖਜੀਤ ਸਿੰਘ ਦਾ ਪਿਤਾ ਅਪਾਹਜ ਹੋਣ ਕਾਰਨ ਕੋਈ ਕੰਮਕਾਰ ਨਹੀਂ ਕਰ ਸਕਦਾ, ਮਾਤਾ ਵੀ ਬਿਰਧ ਹੈ | ਸੁਖਜੀਤ ਸਿੰਘ ਆਪ ਕਿਸੇ ਦੀ ਦੁਕਾਨ 'ਤੇ ਕੰਮ ਕਰ ਕੇ ਪਰਿਵਾਰ ਦਾ ਗੁਜ਼ਾਰਾ ਬੜੀ ਮੁਸ਼ਕਿਲ ਨਾਲ ਕਰਦਾ ਹੈ | ਇਸ ਮੌਕੇ ਪਰਿਵਾਰ ਨੇ ਦਾਨੀ ਵੀਰਾਂ ਨੂੰ ਮਦਦ ਦੀ ਗੁਹਾਰ ਲਗਾਈ ਹੈ |
