ਭੁੱਚੋ ਮੰਡੀ, 23 ਦਸੰਬਰ (ਪਰਵਿੰਦਰ ਸਿੰਘ ਜੌੜਾ)- ਸੀਵਰੇਜ ਦੀ ਲੀਕੇਜ ਤੋਂ ਅੱਕੇ ਚੱਕ ਫਤਿਹ ਸਿੰਘ ਵਾਲਾ ਦੀਆਂ ਦੋਵੇਂ ਪੰਚਾਇਤਾਂ ਵਲੋਂ ਨਗਰ ਕੌਂਸਲ ਭੁੱਚੋ ਮੰਡੀ ਨੂੰ ਲਿਖਤੀ ਚਿਤਾਵਨੀ ਦਿੱਤੀ ਗਈ ਹੈ ਕਿ ਗੁਰੂ ਅਰਜਨ ਦੇਵ ਨਗਰ ਕੋਲ ਹੁੰਦੀ ਸੀਵਰੇਜ ਦੀ ਲੀਕੇਜ ਨੂੰ ਖ਼ਤਮ ਕਰੋ, ਨਹੀਂ ਤਾਂ ਪਿੰਡ ਵਿਚ ਦੀ ਲੰਘਦੀ ਭੁੱਚੋ ਮੰਡੀ ਦੇ ਸੀਵਰੇਜ ਦੀ ਪਾਈਪ ਨੂੰ ਬੰਦ ਕਰ ਦਿੱਤਾ ਜਾਵੇਗਾ | ਦੱਸ ਦਈਏ ਕਿ ਭੁੱਚੋ ਮੰਡੀ ਤੋਂ 'ਆਪ' ਦੇ ਮੌਜੂਦਾ ਵਿਧਾਇਕ ਮਾ. ਜਗਸੀਰ ਸਿੰਘ ਦੇ ਜੱਦੀ ਪਿੰਡ ਚੱਕ ਫਤਿਹ ਸਿੰਘ ਵਾਲਾ ਨੂੰ ਜਾਂਦੀ ਮੁੱਖ ਸੜਕ 'ਤੇ ਗੁਰੂ ਅਰਜਨ ਦੇਵ ਨਗਰ ਕੋਲ ਪਿਛਲੇ 5/6 ਮਹੀਨਿਆਂ ਤੋਂ ਭੁੱਚੋ ਮੰਡੀ ਦੇ ਸੀਵਰੇਜ ਦੀ ਪਾਈਪ ਲਗਾਤਾਰ ਲੀਕ ਹੋ ਰਹੀ ਹੈ, ਕਾਰਨ ਇੱਥੇ ਇਕ ਤਾਂ ਗੰਦੀ ਬਦਬੂ ਨਾਲ ਜ਼ਿੰਦਗੀ ਨਰਕ ਬਣੀ ਹੋਈ ਹੈ, ਦੂਜਾ ਸੜਕ ਨੇ ਗੰਦੀ ਝੀਲ ਦਾ ਰੂਪ ਧਾਰ ਲਿਆ ਹੈ | ਸੜਕ ਦਾ ਉਕਤ ਹਿੱਸਾ ਬਿਖਰ ਕੇ ਖ਼ਤਮ ਹੋ ਚੁੱਕਾ ਹੈ ਅਤੇ ਲੋਕਾਂ ਲਈ ਇਹ ਸੜਕ ਲੰਘ ਕੇ ਜਾਣਾ ਸੰਭਵ ਹੀ ਨਹੀਂ ਰਿਹਾ ਹੈ | ਜਿਹੜੇ ਘਰ ਇਸ ਸੜਕ ਦੇ ਕਿਨਾਰੇ ਵਸੇ ਹਨ, ਉਨ੍ਹਾਂ ਦੀ ਹਾਲਤ ਵੀ ਨਰਕ ਵਰਗੀ ਬਣੀ ਹੋਈ ਹੈ | ਮਹਿਲਾ ਪੰਚ ਦੇ ਪਤੀ ਅਮਨਦੀਪ ਸਿੰਘ ਦਾ ਕਹਿਣਾ ਸੀ ਕਿ ਹਰ ਵੇਲੇ ਖੜ੍ਹੇ ਗੰਦੇ ਪਾਣੀ ਦੀ ਸੜ੍ਹਾਂਦ ਕਾਰਨ 2 ਡੰਗ ਦੀ ਰੋਟੀ ਨਿਗਲਣ ਵੇਲੇ ਕਾਲਜਾ ਬਾਹਰ ਨੂੰ ਆਉਂਦਾ ਹੈ | ਚੱਕ ਫਤਿਹ ਸਿੰਘ ਵਾਲਾ ਦੇ ਅਧਿਕਾਰਤ ਪੰਚ ਬਲਤੇਜ ਸਿੰਘ ਅਤੇ ਭਾਈ ਹਰਜੋਗਿੰਦਰ ਸਿੰਘ ਨਗਰ ਦੀ ਸਰਪੰਚ ਹਰਪ੍ਰੀਤ ਕੌਰ ਦੇ ਪਤੀ ਇਕਬਾਲ ਸਿੰਘ ਦਾ ਕਹਿਣਾ ਸੀ ਕਿ ਦੋਵੇਂ ਪਿੰਡਾਂ ਦੀਆਂ ਪੰਚਾਇਤਾਂ ਵਲੋਂ ਕਰੀਬ ਅੱਧੀ ਦਰਜਨ ਵਾਰ ਨਗਰ ਕੌਂਸਲ ਦੇ ਪ੍ਰਬੰਧਕਾਂ ਨੂੰ ਮਾਮਲੇ ਦੇ ਹੱਲ ਲਈ ਬੇਨਤੀਆਂ ਕੀਤੀਆਂ ਜਾ ਚੁੱਕੀਆਂ ਹਨ, ਪ੍ਰੰਤੂ ਸਥਿਤੀ ਸੁਧਰਨੀ ਤਾਂ ਦੂਰ, ਸਗੋਂ ਦਿਨੋਂ-ਦਿਨ ਗੰਭੀਰ ਹੁੰਦੀ ਜਾਂਦੀ ਹੈ ਅਤੇ ਨਗਰ ਕੌਂਸਲ ਪ੍ਰਬੰਧਕਾਂ ਵਲੋਂ ਇਸ ਦਾ ਕੋਈ ਹੱਲ ਨਹੀਂ ਕੀਤਾ ਜਾ ਰਿਹਾ | ਉਨ੍ਹਾਂ ਕਿਹਾ ਕਿ ਪਿੰਡ ਵਾਸੀਆਂ ਨੂੰ ਆਉਣ-ਜਾਣ ਲਈ ਹੋਰਨਾਂ ਰਸਤਿਆਂ ਦੀ ਵਰਤੋਂ ਕਰਨੀ ਪੈਂਦੀ ਹੈ, ਕਾਰਨ ਵੱਡੀ ਪ੍ਰੇਸ਼ਾਨੀ ਆਉਂਦੀ ਹੈ | ਉਨ੍ਹਾਂ ਨਗਰ ਕੌਂਸਲ ਦੇ ਪ੍ਰਬੰਧਕਾਂ ਨੂੰ ਲਿਖਤੀ ਪੱਤਰ ਦਿੰਦਿਆਂ ਚਿਤਾਵਨੀ ਦਿੱਤੀ ਕਿ ਜੇਕਰ ਜਲਦੀ ਇਸ ਸਮੱਸਿਆ ਦਾ ਪੱਕਾ ਹੱਲ ਨਾ ਕੀਤਾ ਗਿਆ ਤਾਂ ਭੁੱਚੋ ਮੰਡੀ ਦੇ ਸੀਵਰੇਜ ਦੀ ਚੱਕ ਫਤਿਹ ਸਿੰਘ ਵਾਲਾ 'ਚੋਂ ਦੀ ਲੰਘਦੀ ਪਾਈਪ ਨੂੰ ਬੰਦ ਕਰ ਦਿੱਤਾ ਜਾਵੇਗਾ ਤੇ ਇਸ ਦੀ ਸਾਰੀ ਜ਼ਿੰਮੇਵਾਰੀ ਨਗਰ ਕੌਂਸਲ ਭੁੱਚੋ ਦੀ ਹੋਵੇਗੀ | ਇਸ ਮੌਕੇ ਸਾਬਕਾ ਪੰਚ ਬੂਟਾ ਸਿੰਘ, ਰਮਨਦੀਪ ਸਿੰਘ, ਫਤਿਹ ਸਿੰਘ ਅਤੇ ਗੱਗੀ ਸਿੰਘ ਵੀ ਮੌਜੂਦ ਸਨ | ਮਾਮਲੇ ਸਬੰਧੀ ਗੱਲ ਕਰਨ 'ਤੇ ਸਥਾਨਕ ਨਗਰ ਕੌਂਸਲ ਦੇ ਕਾਰਜ ਸਾਧਕ ਅਫ਼ਸਰ ਨਰਿੰਦਰ ਕੁਮਾਰ ਨੇ ਕਿਹਾ ਕਿ ਉਹ ਭਲਕੇ ਹੀ ਜੇ. ਸੀ. ਬੀ. ਵਗ਼ੈਰਾ ਮੰਗਵਾ ਕੇ ਇਸ ਸਮੱਸਿਆ ਦਾ ਹੱਲ ਕਰਵਾਉਣਗੇ |
