ਟੱਲੇਵਾਲ, 24 ਸਤੰਬਰ (ਸੋਨੀ ਚੀਮਾ)-ਥਾਣਾ ਟੱਲੇਵਾਲ ਅਧੀਨ ਆਉਂਦੇ ਪਿੰਡ ਭੋਤਨਾ ਵਿਖੇ ਇਕ ਛੋਟੀ ਕਿਸਾਨੀ ਨਾਲ ਸਬੰਧਿਤ ਨੌਜਵਾਨ ਦੀ ਖੇਤ ਵਿਚ ਕੀਟਨਾਸ਼ਕ ਦਾ ਛਿੜਕਾਅ ਕਰਦੇ ਹੋਏ ਦਵਾਈ ਚੜ੍ਹਨ ਕਾਰਨ ਮੌਤ ਹੋ ਗਈ | ਜਾਣਕਾਰੀ ਅਨੁਸਾਰ ਸਤਨਾਮ ਸਿੰਘ ਪੱੁਤਰ ਸੁਖਦੇਵ ਸਿੰਘ 33 ਸਾਲ ਜੋ ਕਿ ਆਪਣੇ ਖੇਤ ਵਿਚ ਝੋਨੇ ਦੀ ਫ਼ਸਲ 'ਤੇ ਕੀਟਨਾਸ਼ਕ ਦਵਾਈ ਦਾ ਛਿੜਕਾਅ ਕਰ ਰਿਹਾ ਸੀ, ਨੂੰ ਉਕਤ ਕੀਟਨਾਸ਼ਕ ਦਵਾਈ ਚੜ੍ਹ ਗਈ ਅਤੇ ਉਕਤ ਨੌਜਵਾਨ ਨੂੰ ਜਦ ਘਰ ਦੇ ਮੈਂਬਰ ਲੁਧਿਆਣਾ ਵਿਖੇ ਇਲਾਜ ਲਈ ਲਿਜਾ ਰਹੇ ਸਨ, ਤਾਂ ਮੱੁਲਾਂਪੁਰ ਨਜ਼ਦੀਕ ਸਤਨਾਮ ਸਿੰਘ ਦੀ ਮੌਤ ਹੋ ਗਈ | ਜ਼ਿਕਰਯੋਗ ਹੈ ਕਿ ਸਤਨਾਮ ਸਿੰਘ ਜੋ ਕਿ ਇਕ ਪੱੁਤਰ ਦਾ ਪਿਤਾ ਸੀ ਅਤੇ ਉਸ ਸਿਰ ਕਰਜ਼ਾ ਵੀ ਸੀ, ਪਰ ਸਤਨਾਮ ਸਿੰਘ ਆਪਣੀ ਕੁੱਝ ਏਕੜ ਫ਼ਸਲ ਨਾਲ ਕਦੇ ਝੋਨਾ ਅਤੇ ਸਬਜ਼ੀ ਆਦਿ ਬੀਜ ਕੇ ਘਰ ਦਾ ਗੁਜ਼ਾਰਾ ਚਲਾ ਰਿਹਾ ਸੀ, ਪਰ ਇਹ ਅਣਹੋਣੀ ਵਾਪਰ ਗਈ |
