ਧਨੌਲਾ, 24 ਸਤੰਬਰ (ਜਤਿੰਦਰ ਸਿੰਘ ਧਨੌਲਾ)-ਅਗਰਵਾਲ ਸਭਾ ਧਨੌਲਾ ਵਲੋਂ ਸ੍ਰੀ ਆਦਿ ਸ਼ਕਤੀ ਰਾਮਲੀਲਾ ਕਲੱਬ ਵਿਖੇ ਸਥਿਤ ਸ੍ਰੀ ਰਾਮ ਮੰਦਿਰ ਵਿਖੇ ਅਗਰਸੈਨ ਜੈਅੰਤੀ ਸ਼ਰਧਾ ਅਤੇ ਉਤਸ਼ਾਹ ਨਾਲ ਮਨਾਈ ਗਈ | ਬਾਜ਼ਾਰ ਦੇ ਸਮੁੱਚੇ ਕਾਰੋਬਾਰੀਆਂ ਨੇ ਇਕ ਮੰਚ 'ਤੇ ਇਕੱਠਿਆਂ ਹੋ ਕੇ ਪੂਜਾ ਅਰਾਧਨਾ ਕੀਤੀ | ਇਸ ਮੌਕੇ ਬੋਲਦਿਆਂ ਉੱਘੇ ਕਾਰੋਬਾਰੀ ਰਜਨੀਸ਼ ਬਾਂਸਲ, ਅਗਰਵਾਲ ਸਭਾ ਦੇ ਪ੍ਰਧਾਨ ਅਰੁਣ ਬਾਂਸਲ, ਗਊਸ਼ਾਲਾ ਕਮੇਟੀ ਦੇ ਪ੍ਰਧਾਨ ਜੀਵਨ ਬਾਂਸਲ, ਗਊਸ਼ਾਲਾ ਕਮੇਟੀ ਦੇ ਸਰਪ੍ਰਸਤ ਜਨਕ ਰਾਜ ਬਾਂਸਲ ਨੇ ਇਕ ਸੁਰ ਹੰੁਦਿਆਂ ਆਖਿਆ ਕਿ ਮਹਾਰਾਜਾ ਅਗਰਸੈਨ ਨੇ ਮਾਨਵਤਾ ਨੂੰ ਸਖ਼ਤ ਮਿਹਨਤ ਕਰਨ ਅਤੇ ਲੋੜਵੰਦਾਂ ਦੀ ਬਾਂਹ ਫੜਨ ਦਾ ਮਾਰਗ ਦਰਸ਼ਨ ਕੀਤਾ | ਉਨ੍ਹਾਂ ਆਖਿਆ ਕਿ ਮਹਾਰਾਜਾ ਅਗਰਸੈਨ ਸੱਚੀ ਸੁੱਚੀ ਕਿਰਤ ਵਿਚ ਭਰੋਸਾ ਰੱਖਦੇ ਸਨ ਜਿਸ ਕਰ ਕੇ ਉਨ੍ਹਾਂ ਦੇ ਸਮੇਂ ਵਿਚ ਅੰਨ-ਧਨ ਦੀ ਕਦੇ ਘਾਟ ਨਹੀਂ ਆਈ | ਇਕੱਤਰ ਪ੍ਰਬੰਧਕਾਂ ਵਲੋਂ ਕਾਰੋਬਾਰੀਆਂ ਨੂੰ ਨਸੀਹਤ ਕਰਦਿਆਂ ਆਖਿਆ ਗਿਆ ਕਿ ਉਹ ਬੇਝਿਜਕ ਦੱਬ ਕੇ ਮਿਹਨਤ ਕਰਨ ਅਤੇ ਸਮਾਜ ਦੇ ਦੱਬੇ ਕੁੱਝ ਲੋਕਾਂ ਦੀ ਬਾਂਹ ਫੜਨ | ਉਨ੍ਹਾਂ ਇਹ ਵੀ ਆਖਿਆ ਕਿ ਪ੍ਰਮਾਤਮਾ ਦੀ ਸੱਚੀ ਸੁੱਚੀ ਭਗਤੀ ਮਾਨਵਤਾ ਦੀ ਭਲਾਈ ਸਦਕਾ ਹੀ ਸੰਭਵ ਹੈ | ਇਸ ਮੌਕੇ ਵਪਾਰ ਮੰਡਲ ਦੇ ਪ੍ਰਧਾਨ ਰਮਨ ਵਰਮਾ, ਸ਼ੈਲਰ ਐਸੋਸੀਏਸ਼ਨ ਦੇ ਆਗੂ ਅਨਿੱਲ ਕੁਮਾਰ ਸੇਠੀ, ਰਾਮਲੀਲਾ ਕਲੱਬ ਦੇ ਪ੍ਰਧਾਨ ਰਜਿੰਦਰ ਕੁਮਾਰ, ਗਗਨ ਗੱਗੂ ਉਚੇਚੇ ਤੌਰ 'ਤੇ ਹਾਜ਼ਰ ਸਨ |
