ਲੰਡਨ, 25 ਦਸੰਬਰ (ਮਨਪ੍ਰੀਤ ਸਿੰਘ ਬੱਧਨੀ ਕਲਾਂ)-ਬਰਤਾਨੀਆ ਦੇ ਦੱਖਣੀ ਵੇਲਜ਼ ਦੇ ਇੱਕ ਸਮੁੰਦਰੀ ਤੱਟ ਤੋਂ 19ਵੀਂ ਸਦੀ ਦੀਆਂ 150 ਸਾਲ ਪੁਰਾਣੇ ਸੈਂਕੜੇ ਜੁੱਤੀਆਂ, ਬੂਟ ਮਿਲੇ ਹਨ | ਕਾਲੇ ਚਮੜੇ ਦੇ ਬੂਟ, ਜੋ ਕਿ 19ਵੀਂ ਸਦੀ ਦੇ ਮੰਨੇ ਜਾਂਦੇ ਹਨ, ਸਾਊਥ ਵੇਲਜ਼ ਦੇ ਗਲੈਮੋਰਗਨ ਦੀ ਵਾਦੀ ਵਿਚ ਓਗਮੋਰ ਬਾਈ ਸੀ ਬੀਚ 'ਤੇ ਚੱਟਾਨਾਂ ਦੇ ਪੂਲ ਸਾਫ਼ ਕਰਨ ਵਾਲੇ ਵਲੰਟੀਅਰਾਂ ਦੁਆਰਾ ਲੱਭੇ ਗਏ | ਬੀਚ ਅਕੈਡਮੀ ਸੋਸ਼ਲ ਐਂਟਰਪ੍ਰਾਈਜ਼ ਦੀ ਐਮਾ ਲੈਂਪੋਰਟ ਜਿਸਨੇ ਜੁੱਤੀਆਂ ਲੱਭੀਆਂ, ਨੇ ਕਿਹਾ ਕਿ ਸਥਾਨਕ ਤੌਰ 'ਤੇ ਅੰਦਾਜ਼ਾ ਲਗਾਇਆ ਜਾ ਰਿਹਾ ਹੈ ਕਿ ਇਹ ਇੱਕ ਜਹਾਜ਼ ਦੇ ਤਬਾਹ ਹੋਏ ਇਤਾਲਵੀ ਕਾਰਗੋ ਜਹਾਜ਼ ਤੋਂ ਹੋ ਸਕਦੇ ਹਨ ਜਿਸ ਬਾਰੇ ਕਿਹਾ ਜਾਂਦਾ ਹੈ ਕਿ ਇਹ ਲਗਭਗ 150 ਸਾਲ ਪਹਿਲਾਂ ਟਸਕੇਰ ਰੌਕ ਦੇ ਨੇੜੇ ਟਕਰਾ ਗਿਆ ਸੀ | ਉਸਨੇ ਦੱਸਿਆ ਕਿ ਕੁਝ ਬੂਟ ਕਾਫ਼ੀ ਚੰਗੀ ਹਾਲਤ ਵਿਚ ਹਨ ਅਤੇ ਜੋ ਕਿ ਮਰਦਾਂ ਦੇ ਬੂਟ ਹਨ | ਕੁਝ ਬੂਟ ਛੋਟੇ ਹਨ ਜੋ ਬੱਚਿਆਂ ਦੇ ਜਾਂ ਔਰਤਾਂ ਦੇ ਵੀ ਹੋ ਸਕਦੇ ਹਨ | ਬੈਂਗੋਰ ਯੂਨੀਵਰਸਿਟੀ ਦੇ ਸਕੂਲ ਆਫ਼ ਓਸ਼ਨ ਸਾਇੰਸਜ਼ ਤੋਂ ਅਕਾਦਮਿਕ ਡਾ. ਮਾਈਕਲ ਰੌਬਰਟਸ ਨੇ ਕਿਹਾ ਕਿ ਇਹ ਸੰਭਵ ਹੈ ਕਿ ਵਿਕਟੋਰੀਅਨ ਯੁੱਗ ਦੇ ਜਹਾਜ਼ਾਂ ਦੇ ਮਲਬੇ ਹੁਣ ਖਰਾਬ ਹੋਣੇ ਜਾਂ ਟੁੱਟਣੇ ਸ਼ੁਰੂ ਹੋ ਸਕਦੇ ਹਨ, ਜਿਨ੍ਹਾਂ ਵਿਚੋਂ ਇਸ ਤਰ੍ਹਾਂ ਦਾ ਸਮਾਨ ਪਾਣੀ ਵਿਚ ਵਹਿ ਜਾਂਦਾ ਹੈ |
