ਹੁਣ ਡਰੋਨਾਂ ਰਾਹੀਂ ਹੋਵੇਗੀ ਨਾਲਿਆਂ ਦੀ ਸਫ਼ਾਈ ਦੀ ਨਿਗਰਾਨੀ <br/>
ਅਜੀਤ ਡੈਸਕ
01-06-2025
ਡਰੋਨ ਰਾਹੀਂ ਨਾਲਿਆਂ ਦੀ ਰੁਕਾਵਟ ਦਾ ਵੀ ਪਤਾ ਲਗਾਇਆ ਜਾਵੇਗਾ
ਮੇਅਰ ਸੁਮਨ ਬਾਹਮਣੀ ਅਤੇ ਨਗਰ ਨਿਗਮ ਕਮਿਸ਼ਨਰ ਅਖਿਲ ਪਿਲਾਨੀ ਦੇ ਨਿਰਦੇਸ਼ਾਂ 'ਤੇ ਨਾਲੀਆਂ/ਨਾਲਿਆਂ ਦੀ ਸਫ਼ਾਈ ਦਾ ਕੰਮ ਜੰਗੀ ਪੱਧਰ 'ਤੇ ਕਰਵਾਇਆ ਜਾ ਰਿਹਾ ਹੈ | ਹੁਣ ਡਰੇਨਾਂ ਦੀ ਸਫ਼ਾਈ ਦੇ ਕੰਮ ਦੀ ਨਿਗਰਾਨੀ ਡਰੋਨਾਂ ਰਾਹੀਂ ਕੀਤੀ ਜਾਵੇਗੀ, ਜਿਸ ਤਹਿਤ ਡਰੋਨ ਰਾਹੀਂ ਨਾਲਿਆਂ ਦੀ ਸਫ਼ਾਈ ਦੇ ਕੰਮ ਦੀ ਵੀਡੀਓ ਬਣਾਈ ਜਾਵੇਗੀ | ਇਸ ਤੋਂ ਇਲਾਵਾ ਡਰੋਨ ਰਾਹੀਂ ਇਹ ਵੀ ਪਤਾ ਲਗਾਇਆ ਜਾਵੇਗਾ ਨਾਲੀਆਂ/ਨਾਲਿਆਂ 'ਚ ਕਿਥੇ ਗੰਦਗੀ ਹੈ, ਕਿਥੇ ਨਾਲੇ ਬੰਦ ਹਨ ਤੇ ਕਿਥੇ ਨਾਲਿਆਂ 'ਤੇ ਕਬਜ਼ਾ ਗਿਆ ਹੈ ਤਾਂ ਜੋ ਇਸ ਬਾਬਤ ਜਾਣਕਾਰੀ ਮਿਲਣ ਤੋਂ ਬਾਅਦ ਤੁਰੰਤ ਸੰਬੰਧਤ ਥਾਂ 'ਤੇ ਸਫ਼ਾਈ ਕਰਵਾਈ ਜਾ ਸਕੇ |
ਨਾਲੀਆਂ 'ਚ ਕੂੜਾ ਸੁੱਟਣ ਵਾਲਿਆਂ ਵਿਰੁੱਧ ਵੀ ਹੋਵੇਗੀ ਕਾਰਵਾਈ
ਨਗਰ ਨਿਗਮ ਦੇ ਕਮਿਸ਼ਨਰ ਅਖਿਲ ਪਿਲਾਨੀ ਨੇ ਸ਼ਹਿਰ ਵਾਸੀਆਂ ਨੂੰ ਨਾਲੀਆਂ ਦੀ ਸਫ਼ਾਈ ਦੇ ਕੰਮ ਦੌਰਾਨ ਨਿਗਮ ਕਰਮਚਾਰੀਆਂ ਨੂੰ ਸਹਿਯੋਗ ਦੇਣ ਦੀ ਅਪੀਲ ਕੀਤੀ ਹੈ | ਉਨ੍ਹਾਂ ਕਿਹਾ ਕਿ ਅਕਸਰ ਦੇਖਿਆ ਜਾਂਦਾ ਹੈ ਕਿ ਲੋਕ ਟੁੱਟਿਆ ਹੋਇਆ ਫ਼ਰਨੀਚਰ, ਖ਼ਰਾਬ ਹੋਏ ਬਿਸਤਰੇ, ਪਲਾਸਟਿਕ, ਪੌਲੀਥੀਨ, ਬੈਗ ਤੇ ਕੱਪੜੇ ਆਦਿ ਨਾਲੀਆਂ/ਨਾਲਿਆਂ 'ਚ ਸੁੱਟ ਦਿੰਦੇ ਹਨ, ਜਿਸ ਕਾਰਨ ਪਾਣੀ ਦਾ ਵਹਾਅ ਪ੍ਰਭਾਵਿਤ ਹੁੰਦਾ ਹੈ | ਉਨ੍ਹਾਂ ਕਿਹਾ ਕਿ ਕੁਝ ਕੁ ਲੋਕਾਂ ਦੀ ਇਹ ਆਦਤ ਬਾਕੀ ਜਨਤਾ ਲਈ ਮੁਸੀਬਤ ਦਾ ਕਾਰਨ ਬਣਦੀ ਹੈ | ਉਨ੍ਹਾਂ ਲੋਕਾਂ ਨੂੰ ਅਪੀਲ ਕੀਤੀ ਕਿ ਨਾਲੀਆਂ/ਨਾਲਿਆਂ 'ਚ ਕੂੜਾ ਨਾ ਸੁੱਟਿਆ ਜਾਵੇ, ਸਗੋਂ ਘਰ-ਘਰ ਆਉਣ ਵਾਲੀ ਨਿਗਮ ਦੀ ਗੱਡੀ 'ਚ ਹੀ ਕੂੜਾ-ਕਰਕਟ ਸੁੱਟਿਆ ਜਾਵੇ | ਉਨ੍ਹਾਂ ਚਿਤਾਵਨੀ ਦਿੰਦਿਆਂ ਕਿਹਾ ਕਿ ਹੁਣ ਨਾਲੀਆਂ/ਨਾਲਿਆਂ 'ਚ ਕੂੜਾ ਸੁੱਟਣ ਵਾਲਿਆਂ 'ਤੇ ਵੀ ਡਰੋਨਾਂ ਰਾਹੀਂ ਨਜ਼ਰ ਰੱਖੀ ਜਾਵੇਗੀ ਅਤੇ ਜੋ ਵੀ ਵਿਅਕਤੀ ਕੂੜਾ ਸੁੱਟਦਾ ਫੜਿ੍ਹਆ ਗਿਆ, ਉਸ ਵਿਰੁੱਧ ਕਾਰਵਾਈ ਕੀਤੀ ਜਾਵੇਗੀ |
