ਜਲੰਧਰ, 3 ਸਤੰਬਰ (ਜਸਪਾਲ ਸਿੰਘ)-ਜਲੰਧਰ ਵਿੱਚ ਹੜ੍ਹਾਂ ਦੀ ਬਿਗੜਦੀ ਸਥਿਤੀ ਨੂੰ ਦੇਖਦੇ ਹੋਏ, ਸੀ.ਟੀ. ਗਰੁੱਪ ਦੇ ਸਵੈ-ਸੇਵਕਾਂ ਨੇ ਨਕੋਦਰ ਰੋਡ 'ਤੇ ਸਥਿਤ ਪਿੰਡ ਨੰਗਲ ਜੀਵਨ, ਅੱਲੋਵਾਲ ਢੇਰੀਆਂ ਅਤੇ ਮਲੜੀ ਸਾਹਿਬ ਦਾ ਦੌਰਾ ਕੀਤਾ | ਇਹ ਪਹਿਲ ਪਾਣੀ ਭਰਾਅ ਅਤੇ ਵਿਸਥਾਪਨ ਕਾਰਨ ਮੁਸ਼ਕਲ ਹਾਲਾਤਾਂ ਦਾ ਸਾਮਣਾ ਕਰ ਰਹੇ ਪਰਿਵਾਰਾਂ ਨੂੰ ਤੁਰੰਤ ਰਾਹਤ ਅਤੇ ਸਹਾਇਤਾ ਪਹੁੰਚਾਉਣ ਲਈ ਕੀਤੀ ਗਈ ਸੀ | ਇਹ ਮੁਹਿੰਮ ਸੀ.ਟੀ. ਗਰੁੱਪ ਦੇ ਚੇਅਰਮੈਨ, ਚਰਨਜੀਤ ਸਿੰਘ ਚੰਨੀ ਦੀ ਮਾਰਗਦਰਸ਼ਨ ਅਤੇ ਸਰਪ੍ਰਸਤੀ ਹੇਠ ਆਯੋਜਿਤ ਕੀਤੀ ਗਈ | ਡਾਇਰੈਕਟਰ ਐਡਮਿਸ਼ਨਜ਼, ਡਾਕਟਰ ਵਨੀਤ ਠਾਕੁਰ ਨੇ ਫੈਕਲਟੀ ਮੈਂਬਰਾਂ ਅਤੇ ਵਿਦਿਆਰਥੀ ਸਵੈ-ਸੇਵਕਾਂ ਦੇ ਨਾਲ ਮਿਲਕੇ ਪ੍ਰਭਾਵਿਤ ਇਲਾਕਿਆਂ ਦਾ ਖੁਦ ਦੌਰਾ ਕੀਤਾ ਤਾਂ ਜੋ ਸਮੇਂ ਸਿਰ ਸਹਾਇਤਾ ਲੋੜਵੰਦਾਂ ਤੱਕ ਪਹੁੰਚ ਸਕੇ | ਮੁੱਢਲੀ ਸਿਹਤ ਅਤੇ ਸਫਾਈ ਦਾ ਸਮਰਥਨ ਕਰਨ ਦੇ ਨਾਲ-ਨਾਲ ਇਸ ਚੁਣੌਤੀਪੂਰਨ ਸਮੇਂ ਦੌਰਾਨ ਆਰਾਮ ਪ੍ਰਦਾਨ ਕਰਨ ਲਈ ਰਾਹਤ ਸਮੱਗਰੀ, ਜਿਸ ਵਿੱਚ ਸੈਨਿਟਰੀ ਪੈਡ, ਡਬਲਰੋਟੀ, ਰਸਕ, ਬਿਸਕੁਟ, ਦਵਾਈਆਂ, ਤਿਰਪਾਲ ਅਤੇ ਕੱਪੜੇ ਸ਼ਾਮਲ ਸਨ, ਵੰਡੇ ਗਏ | ਇਹ ਪਹਿਲ ਸੀ.ਟੀ. ਗਰੁੱਪ ਦੇ ਇਸ ਵਿਸ਼ਵਾਸ ਨੂੰ ਦਰਸਾਉਂਦੀ ਹੈ ਕਿ ਸਿੱਖਿਆ ਅਕਾਦਮਿਕ ਗਤੀਵਿਧੀਆਂ ਤੋਂ ਪਰੇ ਹਟਕੇ ਦਇਆ, ਜ਼ਿੰਮੇਵਾਰੀ ਅਤੇ ਏਕਤਾ ਨੂੰ ਪੋਸ਼ਣ ਕਰਦੀ ਹੈ | ਸੀ.ਟੀ. ਪਰਿਵਾਰ ਆਮ ਸਥਿਤੀ ਬਹਾਲ ਨਾ ਹੋਣ ਤੱਕ ਕਮਿਊਨਿਟੀ ਦਾ ਸਮਰਥਨ ਕਰਨ ਲਈ ਪ੍ਰਤੀਬੱਧ ਹੈ ਅਤੇ ਆਉਣ ਵਾਲੇ ਦਿਨਾਂ ਵਿੱਚ ਪ੍ਰਭਾਵਿਤ ਲੋਕਾਂ ਨਾਲ ਖੜ੍ਹਾ ਰਹੇਗਾ |
