ਜਲੰਧਰ, 5 ਸਤੰਬਰ (ਸ਼ਿਵ)-ਸ਼ਹਿਰ ਦੇ ਕੂੜਾ ਪ੍ਰਬੰਧਨ ਦਾ ਕੰਮ 143 ਕਰੋੜ ਰੁਪਏ ਵਿਚ ਠੇਕੇ 'ਤੇ ਦੇਣ ਲਈ ਨਿਗਮ ਵਲੋਂ ਟੈਂਡਰ ਜਾਰੀ ਕਰਨ ਤੋਂ ਨਿਗਮ ਯੂਨੀਅਨ ਭੜਕ ਗਈ ਹੈ ਤੇ ਉਸ ਨੇ ਨਾ ਸਿਰਫ਼ ਇਸ ਫ਼ੈਸਲੇ ਦਾ ਵਿਰੋਧ ਦਾ ਐਲਾਨ ਕੀਤਾ ਹੈ ਸਗੋਂ ਦੂਜੇ ਪਾਸੇ ਉਨਾਂ ਨੇ ਕਈ ਖ਼ੁਲਾਸੇ ਵੀ ਕੀਤੇ ਹਨ ਜਿਨਾਂ ਵਿਚ ਵਰਿਆਣਾ ਡੰਪ 'ਤੇ ਖੜੀ ਮਸ਼ੀਨ ਬਾਰੇ ਵੀ ਗ਼ਲਤ ਬਿੱਲ ਬਣਾਉਣ ਦੇ ਦੋਸ਼ ਲਗਾਏ ਹਨ | ਨਗਰ ਨਿਗਮ ਡਰਾਈਵਰ ਅਤੇ ਟੈਕਨੀਕਲ ਵਰਕਸ਼ਾਪ ਯੂਨੀਅਨ ਵੱਲੋਂ ਨਗਰ ਨਿਗਮ ਵੱਲੋਂ ਸ਼ਹਿਰ ਵਿਚ ਕੂੜੇ ਦੀ ਸਮੱਸਿਆ ਹੱਲ ਕਰਨ ਲਈ ਕੂੜਾ ਪ੍ਰਬੰਧਨ ਜੋ ਕੂੜੇ ਦਾ 143 ਕਰੋੜ ਦਾ ਟੈਂਡਰ ਲਗਾਇਆ ਜਾ ਰਿਹਾ ਹੈ ਯੂਨੀਅਨ ਵੱਲੋਂ ਉਸ ਦਾ ਵਿਰੋਧ ਕੀਤਾ ਗਿਆ ਹੈ | ਡਰਾਈਵਰ ਐਂਡ ਟੈਕਨੀਕਲ ਯੂਨੀਅਨ ਦੇ ਪ੍ਰਧਾਨ ਸ਼ੰਮੀ ਲੁਥਰ ਅਤੇ ਮਨੀਸ਼ ਬਾਬਾ ਨੇ ਕਿਹਾ ਹੈ ਕਿ ਪਹਿਲਾਂ ਹੀ ਜਿਹੜਾ ਵਰਿਆਣਾ ਕੂੜੇ ਦੇ ਡੰਪ 'ਤੇ ਕੰਮ ਲਈ ਮਸ਼ੀਨਰੀ ਠੇਕੇ 'ਤੇ ਲਈ ਗਈ ਹੈ ਉਹ ਉਸੇ ਤਰਾਂ ਹੀ ਖੜ੍ਹੀ ਹੈ ਤੇ ਸਿਰਫ਼ ਕੁੱਝ ਸਮਾਂ ਹੀ ਚੱਲਦੀ ਹੈ | ਜੇਕਰ ਇਸ ਦੀ ਜਾਂਚ ਕਰਵਾਈ ਜਾਵੇ ਤਾਂ ਸਾਰੀ ਸਚਾਈ ਸਾਹਮਣੇ ਆ ਜਾਵੇਗੀ | | ਉਨਾਂ ਨੂੰ ਕਿਸੇ ਨੇ ਇੱਕ ਵੀਡੀਓ ਵੀ ਵਰਿਆਣਾ ਡੰਪ ਤੋਂ ਭੇਜੀ ਹੈ | ਡੰਪ ਦੇ ਉੱਪਰ ਜਿਹੜੀ ਪੋਕਲੇਨ ਵੀ ਬਿਨਾਂ ਕੰਮ ਤੋਂ ਖੜ੍ਹੀ ਹੈ | ਯੂਨੀਅਨ ਨੇ ਦੱਸਿਆ ਕਿ ਪੋਕਲੇਨ ਨਾਲ ਰਸਤਾ ਠੀਕ ਨਾ ਕਰਨ ਕਰਕੇ ਸਮੱਸਿਆ ਦਾ ਸਾਹਮਣਾ ਕਰਨਾ ਪੈਂਦਾ ਹੈ ਕਿਉਂਕਿ ਕੂੜੇ ਦਾ ਰਾਹ ਨਹੀਂ ਬਣਦਾ ਹੈ ਇਸ ਕਾਰਨ ਉਨਾਂ ਨੂੰ ਡੰਪ ਉੱਤੇ ਵੀ ਸਮਾਂ ਲੱਗਦਾ ਹੈ | ਸ਼ਹਿਰ ਵਿਚ ਕੂੜਾ ਚੁੱਕਣ ਦਾ ਕੰਮ ਪ੍ਰਭਾਵਿਤ ਰਹਿੰਦਾ ਹੈ | ਯੂਨੀਅਨ ਆਗੂਆਂ ਨੇ ਕਿਹਾ ਕਿ ਯੂਨੀਅਨ ਪ੍ਰਧਾਨ ਬੰਟੂ ਸਭਰਵਾਲ ਦੀ ਅਗਵਾਈ ਵਿਚ ਸੋਮਵਾਰ 8 ਸਤੰਬਰ ਸਵੇਰੇ 11 ਵਜੇ ਨਗਰ ਨਿਗਮ ਟਾਊਨ ਹਾਲ ਵਿਚ ਮੀਟਿੰਗ ਕੀਤੀ ਜਾਵੇਗੀ ਤੇ 143 ਕਰੋੜ ਵਾਲੇ ਪ੍ਰਾਜੈਕਟ ਦਾ ਵਿਰੋਧ ਕੀਤਾ ਜਾਵੇਗਾ | ਇਸ ਮੌਕੇ ਸ਼ੰਮੀ ਲੁੂਥਰ, ਮਨੀਸ਼ ਬਾਬਾ, ਤੇ ਹੋਰ ਆਗੂ ਤੇ ਮੈਂਬਰ ਹਾਜ਼ਰ ਸਨ |