ਬਰੇਟਾ, 5 ਸਤੰਬਰ (ਜੀਵਨ ਸ਼ਰਮਾ,ਪਾਲ ਸਿੰਘ ਮੰਡੇਰ)- ਚਾਂਦਪੁਰਾ ਘੱਗਰ ਸਾਈਫਨ 'ਤੇ ਪਾਣੀ ਦਾ ਪੱਧਰ ਵਧ ਕੇ 8 ਫੁੱਟ ਤੋਂ ਵਧੇਰੇ ਹੋ ਗਿਆ ਹੈ ਜਦਕਿ ਘੱਗਰ ਖ਼ਤਰੇ ਤੋਂ ਅਜੇ ਵੀ ਥੱਲੇ ਚੱਲ ਰਿਹਾ ਹੈ | ਸਾਈਫ਼ਨ ਦੇ 21 ਦਰਵਾਜ਼ਿਆਂ ਵਿਚ ਦੀ ਪਾਣੀ ਦਾ ਵਹਾਅ ਬਹੁਤ ਤੇਜ਼ ਹੈ | ਪ੍ਰਸ਼ਾਸਨ ਵੱਲੋਂ ਪਾਣੀ ਦੇ ਪੱਧਰ 'ਤੇ ਲਗਾਤਾਰ ਨਿਗ੍ਹਾ ਰੱਖੀ ਜਾ ਰਹੀ ਹੈ | ਪਾਣੀ 10 ਫੁੱਟ ਉੱਪਰ ਜਾਣ 'ਤੇ ਆਲੇ-ਦੁਆਲੇ ਖ਼ਤਰਾ ਪੈਦਾ ਹੋ ਜਾਂਦਾ ਹੈ ਅਤੇ ਪਾਣੀ ਖਿੱਲਰ ਕੇ ਚਾਂਦਪੁਰਾ ਬੰਨ੍ਹ ਦੇ ਨਾਲ ਜਾ ਲੱਗਦਾ ਹੈ | ਪਿਛਲੇ ਦਿਨੀਂ ਘਨੌਰ ਖੇਤਰ ਵਿਚ ਘੱਗਰ ਦਾ ਪਾਣੀ ਖਿੱਲਰਨ ਕਰਕੇ ਚਾਂਦਪੁਰਾ ਕੋਲ ਪਾਣੀ ਦਾ ਪੱਧਰ ਘਟ ਸਕਦਾ ਹੈ | ਬੰਨ੍ਹ ਨੂੰ ਮਜ਼ਬੂਤ ਕਰਨ ਲਈ ਇਸ ਖੇਤਰ ਦੇ ਲੋਕਾਂ ਨੇ ਪੂਰੀ ਵਾਹ ਲਗਾਈ ਹੋਈ ਹੈ | ਅੱਜ ਬਾਰਿਸ਼ ਦੇ ਰੁਕਣ ਨਾਲ ਕੰਮ ਕਰ ਰਹੇ ਲੋਕਾਂ ਨੂੰ ਵੱਡੀ ਰਾਹਤ ਮਿਲੀ , ਮਿੱਟੀ ਦੀਆਂ ਟਰਾਲੀਆਂ ਆਸਾਨੀ ਨਾਲ ਬੰਨ੍ਹ 'ਤੇ ਜਾ ਰਹੀਆਂ ਹਨ | ਲੋਕ ਵੀ ਬੰਨ੍ਹ 'ਤੇ ਵੱਡੀ ਗਿਣਤੀ ਵਿਚ ਹਾਜ਼ਰੀ ਲਗਾ ਰਹੇ ਹਨ | ਹਲਕਾ ਵਿਧਾਇਕ ਬੁੱਧ ਰਾਮ ਘੱਗਰ ਸਾਈਫਨ ਤੇ ਚਾਂਦਪੁਰਾ ਬੰਨ੍ਹ 'ਤੇ ਲਗਾਤਾਰ ਨਿਗਰਾਨੀ ਰੱਖ ਰਹੇ ਹਨ | ਉਨ੍ਹਾਂ ਦਾ ਕਹਿਣਾ ਹੈ ਕਿ ਸਰਕਾਰ ਵਲੋਂ ਬੰਨ੍ਹ ਦਾ ਲਗਾਤਾਰ ਜਾਇਜ਼ਾ ਲਿਆ ਜਾ ਰਿਹਾ ਹੈ ਪਰ ਅਜੇ ਖਤਰੇ ਵਾਲੀ ਕੋਈ ਗੱਲ ਨਹੀਂ ਅਤੇ ਆਉਣ ਵਾਲੇ 2 ਦਿਨਾਂ ਤੱਕ ਸਾਈਫਨ 'ਤੇ ਪਾਣੀ ਦਾ ਪੱਧਰ ਘਟਣ ਦੀ ਸੰਭਾਵਨਾ ਹੈ |
