ਬੋਹਾ, 5 ਦਸੰਬਰ (ਰਮੇਸ਼ ਤਾਂਗੜੀ)-ਕਸਬਾ ਬੋਹਾ 'ਚ ਲੋਕਾਂ ਵਲੋਂ ਘਰਾਂ ਦਾ ਕੂੜਾ ਵਧੇਰੇ ਕਰਕੇ ਗਲੀਆਂ, ਸੜਕਾਂ, ਨਾਲਿਆਂ ਅਤੇ ਖਾਲੀ ਥਾਵਾਂ 'ਚ ਸੁੱਟਿਆ ਜਾ ਰਿਹਾ ਹੈ | ਭਾਵੇਂ ਨਗਰ ਪੰਚਾਇਤ ਦੇ ਕੁਝ ਮਿਹਨਤੀ ਸਫਾਈ ਕਾਮੇ ਹਰ ਰੋਜ ਆਪਣੀ ਗੱਡੀ ਲੈ ਕੇ ਕਈ ਵਾਰਡਾਂ 'ਚੋਂ ਇਸਨੂੰ ਇੱਕਠਾ ਕਰ ਕੇ ਕੂੜਾ ਡੰਪਾਂ 'ਚ ਸੁੱਟਦੇ ਹਨ | ਪਰ ਵਧੇਰੇ ਲੋਕ ਇਨਾਂ ਕੂੜਾ ਗੱਡੀਆਂ ਦੀ ਉਡੀਕ ਨਹੀਂ ਕਰਦੇ ਅਤੇ ਨਾ ਹੀ ਨਗਰ ਪੰਚਾਇਤ ਦਾ ਕੋਈ ਜਾਬਤਾ ਉਨਾਂ 'ਤੇ ਲਾਗੂ ਹੁੰਦਾ ਹੈ | ਸਬਜੀ ਤੇ ਹੋਰ ਸਮਾਨ ਵਾਲੇ ਪਲਾਸਟਿਕ ਲਿਫਾਫੇ, ਬੋਤਲਾਂ ਅਤੇ ਡਿਸਪੋਜ਼ਲ ਭਾਂਡੇ ਆਦਿ ਵਸਤਾਂ ਵੀ ਨਾਲਿਆਂ 'ਚ ਰੋੜ ਦਿੰਦੇ ਹਨ, ਜੋ ਮਿੰਨੀ ਚੈਂਬਰਾਂ 'ਚ ਫਸ ਜਾਂਦੇ ਹਨ ਤੇ ਚੈਂਬਰ ਬੰਦ ਹੋਣ ਕਾਰਨ ਗੰਦਾ ਪਾਣੀ ਗਲੀਆਂ 'ਚ ਫੈਲ ਜਾਂਦਾ ਹੈ | ਵਾਰਡ ਨੰਬਰ 11 'ਚ ਦੋ ਚੈਂਬਰਾਂ ਕੋਲ ਜਮੀਨਦੋਜ ਪਾਈਪਾਂ ਲੀਕ ਹੋਣ ਕਰਕੇ ਸੀਵਰੇਜ਼ ਦਾ ਪਾਣੀ ਪੀਣ ਵਾਲੇ ਪਾਣੀ 'ਚ ਰਲ ਜਾਂਦਾ ਹੈ, ਜਿਸ ਨਾਲ ਇਲਾਕੇ 'ਚ ਖ਼ਤਰਨਾਕ ਬਿਮਾਰੀਆਂ ਫੈਲਣ ਦਾ ਖ਼ਤਰਾ ਪੈਦਾ ਹੋ ਗਿਆ ਹੈ | ਵਧੇਰੀ ਵਸੋਂ ਨੇ ਜਲ ਘਰਾਂ ਦਾ ਪਾਣੀ ਵਰਤਣਾ ਬੰਦ ਕਰ ਦਿੱਤਾ ਹੈ | ਲੋਕਾਂ ਦਾ ਕਹਿਣਾ ਹੈ ਕਿ ਮੰਡੀ 'ਚ ਕੂੜਾ ਡੰਪਾਂ ਦਾ ਕੰਟਰੋਲ ਨਾ ਹੋਣ ਕਾਰਨ ਲੋਕ ਵੇਲੇ ਕੁਵੇਲੇ ਕੂੜੇ ਦੇ ਝੋਲੇ ਭਰ ਕੇ ਇੱਧਰ-ਉੱਧਰ ਸੁੱਟ ਜਾਂਦੇ ਹਨ | ਮਿੰਨੀ ਚੈਂਬਰਾਂ 'ਚੋਂ ਕੱਢਿਆ ਕੂੜਾ ਵੀ ਚੁੱਕਿਆ ਨਹੀਂ ਜਾਂਦਾ | ਇਸ ਸਬੰਧ 'ਚ ਵਾਟਰ ਸਪਲਾਈ ਤੇ ਸੀਵਰੇਜ ਬੋਰਡ ਦੇ ਅਧਿਕਾਰੀਆਂ ਦੇ ਧਿਆਨ 'ਚ ਲਿਆਂਦਾ ਗਿਆ ਤੇ ਉਹ ਇੱਕ ਵਾਰ ਮੌਕਾ ਵੇਖ ਕੇ ਮੁੜ ਨਹੀਂ ਆਏ | ਹੁਣ ਲੋਕਾਂ 'ਚ ਰੋਸ ਵੱਧਦਾ ਜਾ ਰਿਹਾ ਹੈ |
