ਨਡਾਲਾ, 20 ਦਸੰਬਰ (ਰਘਬਿੰਦਰ ਸਿੰਘ)-ਨਡਾਲਾ ਚੌਕੀ 'ਚ ਇੱਕ ਵਿਅਕਤੀ ਵਲੋਂ ਚੋਰ ਨੂੰ ਕਾਬੂ ਕਰਕੇ ਲਿਆਂਦਾ ਗਿਆ ਜਿੱਥੇ ਉਕਤ ਚੋਰ ਵਲੋਂ ਕੋਈ ਨੁਕੀਲੀ ਚੀਜ਼ ਨਾਲ ਆਪਣੇ ਆਪ ਨੂੰ ਜ਼ਖਮੀ ਕਰ ਲਿਆ | ਜਿਸ ਤੋਂ ਬਾਅਦ ਉਸ ਨੂੰ ਇਲਾਜ ਲਈ ਹਸਪਤਾਲ ਲਿਜਾਇਆ ਗਿਆ | ਨਡਾਲਾ ਚੌਕੀ ਵਿਖੇ ਗੱਲਬਾਤ ਕਰਦਿਆਂ ਗੁਰਪ੍ਰੀਤ ਸਿੰਘ ਪੁੱਤਰ ਜੋਗਿੰਦਰ ਸਿੰਘ ਵਾਸੀ ਪ੍ਰੇਮ ਨਗਰ (ਲੱਖਣ ਕੇ ਪੱਡਾ) ਨੇ ਦੱਸਿਆ ਕਿ ਦੁਪਹਿਰ 2 ਕੁ ਵਜੇ ਪੁਲਿਸ ਵਾਲੇ ਸਾਡੇ ਪਿੰਡ ਆਏ ਤੇ ਕਹਿਣ ਲੱਗੇ ਕਿ ਤੇਰੇ ਭਰਾ ਦੇ ਸੱਟ ਲੱਗ ਗਈ ਹੈ, ਹਸਪਤਾਲ ਵਿਚ ਨਾਲ ਚੱਲ ਪਰ ਉਹ ਉਸ ਨੂੰ ਹੁਣ ਅੰਮਿ੍ਤਸਰ ਲੈ ਗਏ ਹਨ ਤੇ ਅਸੀਂ ਪਿੰਡ ਵਾਲਿਆਂ ਨਾਲ ਇਨਸਾਫ਼ ਲਈ ਚੌਕੀ ਆਏ ਹਾਂ | ਇਸ ਸੰਬੰਧੀ ਫ਼ੋਨ 'ਤੇ ਗੱਲਬਾਤ ਕਰਦਿਆਂ ਨਡਾਲਾ ਚੌਕੀ ਇੰਚਾਰਜ ਬਲਜਿੰਦਰ ਸਿੰਘ ਨੇ ਦੱਸਿਆ ਕਿ ਅੱਜ ਸਵੇਰੇ ਲਿਪਤ ਵਿਰਲੀ ਪੁੱਤਰ ਨਾਨਕ ਚੰਦ ਵਾਸੀ ਲੱਖਣ ਕੇ ਪੱਡਾ ਨੇ ਮਨਦੀਪ ਸਿੰਘ ਉਰਫ਼ ਮੀਪਾ ਪੁੱਤਰ ਜੋਗਿੰਦਰ ਸਿੰਘ ਨੂੰ ਚੋਰੀ ਕਰਦਿਆਂ ਫੜ ਕੇ ਚੌਕੀ ਲਿਆਏ ਸਨ ਕਿ ਇਸ ਨੇ ਸਾਡੀ ਕਣਕ ਚੋਰੀ ਕੀਤੀ ਹੈ ਤਾਂ ਉਕਤ ਫੜੇ ਗਏ ਚੋਰ ਨੂੰ ਅਸੀਂ ਦੂਜੇ ਕਮਰੇ ਵਿਚ ਬਿਠਾ ਕੇ ਲਿਪਤ ਵਿਰਲੀ ਦੀ ਸ਼ਿਕਾਇਤ ਦਰਜ ਕਰਨ ਲੱਗ ਪਏ | ਇਸ ਦੌਰਾਨ ਉਸ ਚੋਰ ਨੇ ਕੋਈ ਨੁਕੀਲੀ ਚੀਜ਼ ਨਾਲ ਆਪਣੇ ਆਪ ਨੂੰ ਜ਼ਖਮੀ ਕਰ ਲਿਆ | ਇਸ ਦੌਰਾਨ ਸਾਥੀ ਕਰਮਚਾਰੀਆਂ ਦੀ ਮਦਦ ਨਾਲ ਉਸ ਨੂੰ ਸੁਭਾਨਪੁਰ ਹਸਪਤਾਲ ਲਿਜਾਇਆ ਗਿਆ ਤਾਂ ਡਿਊਟੀ ਡਾਕਟਰਾਂ ਨੇ ਉਸ ਨੂੰ ਅੰਮਿ੍ਤਸਰ ਲਈ ਰੈਫ਼ਰ ਕਰ ਦਿੱਤਾ | ਚੌਕੀ ਇੰਚਾਰਜ ਨੇ ਦੱਸਿਆ ਕਿ ਉਕਤ ਵਿਅਕਤੀ ਦਾ ਇਲਾਜ ਚੱਲ ਰਿਹਾ ਹੈ ਅਤੇ ਉਹ ਹੁਣ ਖ਼ਤਰੇ ਤੋ ਬਾਹਰ ਹੈ |
