ਐਮਾਂ ਮਾਂਗਟ, ਨੌਸ਼ਹਿਰਾ ਪੱਤਣ, 20 ਫਰਵਰੀ (ਗੁਰਾਇਆ, ਭੰਮਰਾ)-ਧਨੋਆ ਪੱਤਣ ਤੋਂ ਪੇਪਰ ਮਿੱਲ ਮੁਕੇਰੀਆਂ ਤੱਕ ਸੜਕ ਦੀ ਮੁਰੰਮਤ ਦਾ ਕੰਮ ਅਤੇ ਉਸ ਉਪਰ ਪੀ. ਸੀ. ਪਾਉਣ ਦਾ ਕੰਮ ਅੱਜ ਸੜਕਾਂ ਅਤੇ ਇਮਾਰਤਾਂ ਵਿਭਾਗ ਦੇ ਅਧਿਕਾਰੀਆਂ ਦੀ ਨਿਗਰਾਨੀ ਵਿਚ ਸ਼ੁਰੂ ਹੋਇਆ | ਉਪ ਮੰਡਲ ਇੰਜੀਨੀਅਰ ਸਰਦਾਰ ਪਰਮਿੰਦਰ ਸਿੰਘ, ਸਹਾਇਕ ਇੰਜੀਨੀਅਰ ਸਰਦਾਰ ਅਮਰਜੀਤ ਸਿੰਘ ਆਪਣੀ ਟੀਮ ਅਤੇ ਠੇਕੇਦਾਰ ਦੇ ਕਰਿੰਦਿਆਂ ਦੇ ਨਾਲ ਆਪਣੀ ਹਾਜ਼ਰੀ 'ਚ ਜਿੱਥੇ ਪਾਏ ਜਾ ਰਹੇ ਮਟੀਰੀਅਲ ਅਤੇ ਗੁਣਵੱਤਾ ਦੀ ਜਾਂਚ ਕਰਦੇ ਰਹੇ ਉੱਥੇ ਉਨ੍ਹਾਂ ਨੇ ਪਿੰਡ ਵਾਸੀਆਂ ਨੂੰ ਵੀ ਚਲਦੇ ਕੰਮ ਦੀ ਨਿਗਰਾਨੀ ਕਰਨ ਵਾਸਤੇ ਆਖਿਆ ਤਾਂ ਕਿ ਇਹ ਸੜਕ ਵਧੀਆ ਢੰਗ ਨਾਲ ਬਣਾਈ ਜਾ ਸਕੇ | ਅਧਿਕਾਰੀਆਂ ਨਾਲ ਹਾਜ਼ਰ ਪਿੰਡ ਵਾਸੀਆਂ ਇੰਜ. ਸਤਨਾਮ ਸਿੰਘ ਧਨੋਆ, ਸਰਦਾਰ ਹਰਪਾਲ ਸਿੰਘ, ਦਿਲਾਵਰ ਸਿੰਘ ਆਦਿਕ ਨੇ ਜਿੱਥੇ ਚਲ ਰਹੇ ਕੰਮਾਂ 'ਤੇ ਤਸਲੀ ਪ੍ਰਗਟ ਕੀਤੀ ਉੱਥੇ ਕੁੱਝ ਮੁਸ਼ਕਲਾਂ ਵੀ ਅਧਿਕਾਰੀਆਂ ਦੇ ਧਿਆਨ ਵਿਚ ਲਿਆਂਦੀਆਂ ਜਿਨ੍ਹਾਂ ਦਾ ਹਲ ਕਰਨ ਦਾ ਅਧਿਕਾਰੀਆਂ ਨੇ ਭਰੋਸਾ ਦਿੱਤਾ |
