ਗੜ੍ਹਸ਼ੰਕਰ, 3 ਮਈ (ਧਾਲੀਵਾਲ)-ਗੜ੍ਹਸ਼ੰਕਰ ਤੋਂ ਪਹਿਲੀ ਵਾਰ ਸਾਊਦੀ ਅਰਬ ਦੀ ਹੱਜ ਯਾਤਰਾ ਲਈ ਪਿਓ-ਪੁੱਤਰ ਰਵਾਨਾ ਹੋਏ ਹਨ | ਗੜ੍ਹਸ਼ੰਕਰ 'ਚ ਪਿਛਲੇ ਸਮੇਂ ਤੋਂ ਕਾਰੋਬਾਰ ਕਰ ਰਹੇ ਸਲੀਮ ਆਪਣੇ ਬਾਪ ਅਲੀ ਹਸਨ ਨੂੰ ਨਾਲ ਲੈ ਕੇ ਹੱਜ ਯਾਤਰਾ ਲਈ ਰਵਾਨਾ ਹੋਇਆ ਹੈ | ਗੜ੍ਹਸ਼ੰਕਰ ਤੋਂ ਭਾਜਪਾ ਦੀ ਹਲਕਾ ਇੰਚਾਰਜ ਨਿਮਿਸ਼ਾ ਮਹਿਤਾ ਨੇ ਸਲੀਮ ਅਤੇ ਉਸ ਦੇ ਪਿਤਾ ਅਲੀ ਹਸਨ ਨੂੰ ਸਿਰੋਪਾਓ ਪਾ ਕੇ ਯਾਤਰਾ ਲਈ ਰਵਾਨਾ ਕਰਦਿਆਂ ਸ਼ੁੱਭਕਾਮਨਾਵਾਂ ਦਿੱਤੀਆਂ | ਨਿਮਿਸ਼ਾ ਮਹਿਤਾ ਨੇ ਕਿਹਾ ਕਿ ਇਹ ਯਾਤਰਾ ਕਿਸਮਤ ਵਾਲਿਆਂ ਦੇ ਹਿੱਸੇ ਆਉਂਦੀ ਹੈ | ਉਨ੍ਹਾਂ ਕਿਹਾ ਕਿ ਨੌਜਵਾਨਾਂ ਨੂੰ ਸਲੀਮ ਤੋਂ ਪ੍ਰੇਰਨਾ ਲੈਂਦੇ ਹੋਏ ਆਪਣੇ ਮਾਪਿਆਂ ਨੂੰ ਯਾਤਰਾ 'ਤੇ ਲੈ ਕੇ ਜਾਣਾ ਚਾਹੀਦਾ ਹੈ | ਉਨ੍ਹਾਂ ਦੱਸਿਆ ਕਿ 45 ਦਿਨਾਂ ਦੀ ਹੱਜ ਯਾਤਰਾ ਦੌਰਾਨ ਇਹ 40 ਦਿਨ ਸਾਊਦੀ ਅਰਬ 'ਚ ਵੱਖ-ਵੱਖ ਥਾਵਾਂ ਦੇ ਦਰਸ਼ਨ ਕਰਕੇ ਵਾਪਸ ਭਾਰਤ ਪਰਤਣਗੇ | ਇਸ ਮੌਕੇ ਇਸਲਾਮ ਭਾਈਚਾਰੇ ਦੇ ਹੋਰ ਲੋਕਾਂ ਤੋਂ ਇਲਾਵਾ ਸਾਬਕਾ ਕੌਂਸਲਰ ਪਵਨ ਪੰਮੀ ਵੀ ਹਾਜ਼ਰ ਸਨ |
