ਬੀਣੇਵਾਲ, 5 ਜੂਨ (ਬੈਜ ਚੌਧਰੀ)-ਪਿੰਡ ਖੁਰਾਲਗੜ੍ਹ ਸਾਹਿਬ ਦੀ ਹੱਦ 'ਚ ਗੜ੍ਹੀ ਮਾਨਸੋਵਾਲ ਨੂੰ ਜਾਂਦੀ ਸੜਕ ਨੇੜੇ ਜੰਗਲ 'ਚੋਂ ਅੱਧ-ਸੜੀ 15 ਸਾਲਾ ਲੜਕੀ ਦੀ ਲਾਸ਼ ਥਾਣਾ ਸਿਟੀ ਨਵਾਂਸ਼ਹਿਰ ਦੀ ਪੁਲਿਸ ਵਲੋਂ ਬੀਤੀ ਦੇਰ ਰਾਤ ਬਰਾਮਦ ਕੀਤੀ ਗਈ | ਮਿ੍ਤਕ ਲੜਕੀ ਦੀ ਪਹਿਚਾਣ ਰਾਧਿਕਾ ਪੁੱਤਰੀ ਊਸ਼ਾ ਰਾਣੀ ਹਾਲ ਵਾਸੀ ਪੀਰ ਵਾਲੀ ਗਲੀ ਗੜ੍ਹਸ਼ੰਕਰ ਰੋਡ ਨਵਾਂਸ਼ਹਿਰ ਵਜੋਂ ਹੋਈ ਹੈ | ਐੱਸ. ਐੱਚ. ਓ. ਅਵਤਾਰ ਸਿੰਘ ਦੀ ਅਗਵਾਈ 'ਚ ਆਈ ਪੁਲਿਸ ਪਾਰਟੀ ਲਾਸ਼ ਲੈ ਕੇ ਨਵਾਂਸ਼ਹਿਰ ਰਵਾਨਾ ਹੋ ਗਈ ਹੈ | ਜਾਣਕਾਰੀ ਮੁਤਾਬਿਕ ਮਿ੍ਤਕਾਂ ਦੀ ਮਾਤਾ ਊਸ਼ਾ ਰਾਣੀ (38) ਨੇ ਪੁਲਿਸ ਨੂੰ ਦਿੱਤੇ ਬਿਆਨਾ 'ਚ ਦੱਸਿਆ ਸੀ ਕਿ ਉਹ ਨਗਰ ਕੌਂਸਲ ਰਾਹੋਂ ਵਿਖੇ ਬਤੌਰ ਸੇਵਾਦਾਰਨੀ ਨੌਕਰੀ ਕਰਦੀ ਹੈ | ਪਹਿਲਾਂ ਉਸ ਦਾ ਵਿਆਹ ਜ਼ਿਲ੍ਹਾ ਹੁਸ਼ਿਆਰਪੁਰ ਦੇ ਪਿੰਡ ਠੀਂਡਾ ਦੇ ਗੁਰਜੀਤ ਸਿੰਘ ਨਾਲ ਹੋਇਆ ਸੀ | ਰਾਧਿਕਾ ਮੇਰੇ ਪਹਿਲੇ ਵਿਆਹ ਦੀ ਬੇਟੀ ਹੈ | ਇਸ ਤੋਂ ਬਾਅਦ ਮੇਰਾ ਤਲਾਕ ਹੋ ਗਿਆ ਤਾਂ ਮੇਰਾ ਦੂਜਾ ਵਿਆਹ ਪਿੰਡ ਜਾਡਲੀ ਥਾਣਾ ਸਦਰ ਬਲਾਚੌਰ ਦੇ ਵਿਕਾਸ ਰਾਏ ਨਾਲ ਹੋਇਆ ਅਤੇ ਦੂਜੇ ਵਿਆਹ ਤੋਂ ਇਕ ਲੜਕਾ ਸੀ ਤੇ ਮੇਰਾ ਫਿਰ ਤਲਾਕ ਹੋ ਗਿਆ | ਫਿਰ ਮੈਂ ਤੇ ਮੇਰੀ ਬੇਟੀ ਕਿਰਾਏ ਦੇ ਮਕਾਨ 'ਚ ਗੜ੍ਹਸ਼ੰਕਰ ਰੋਡ ਨਵਾਂਸ਼ਹਿਰ ਵਿਚ ਪੀਰ ਵਾਲੀ ਗਲੀ ਵਿਚ ਰਹਿਣ ਲੱਗ ਪਈ | ਬੀਤੀ 29 ਮਈ ਨੂੰ ਮੇਰੀ ਬੇਟੀ ਰਾਧਿਕਾ ਘਰ 'ਚ ਇਕੱਲੀ ਸੀ | ਜਦ ਮੈਂ ਦੁਪਹਿਰ ਵੇਲੇ ਘਰ ਆਈ ਤਾਂ ਬੇਟੀ ਗ਼ਾਇਬ ਸੀ | ਪਹਿਲਾ ਮੈਂ ਉਸ ਨੂੰ ਰਿਸ਼ਤੇਦਾਰੀ ਵਿਚ ਲੱਭਿਆ ਬਾਅਦ ਵਿਚ ਪੁਲਿਸ ਨੂੰ ਬਿਆਨ ਦਿੱਤੇ, ਜਿਸ ਤੋਂ ਬਾਅਦ ਸਿਟੀ ਥਾਣਾ ਨਵਾਂਸ਼ਹਿਰ 'ਚ ਅਣਪਛਾਤੇ ਦੋਸ਼ੀ 'ਤੇ ਮਾਮਲਾ ਦਰਜ ਕਰ ਲਿਆ | ਪੁਲਿਸ ਨੇ ਊਸ਼ਾ ਰਾਣੀ ਵਲੋਂ ਦੱਸੇ ਸ਼ੱਕੀ ਨੂੰ ਹਿਰਾਸਤ ਵਿਚ ਲੈ ਕੇ ਜਦ ਸਖ਼ਤੀ ਨਾਲ ਪੁੱਛ ਪੜਤਾਲ ਕੀਤੀ ਤਾਂ ਦੋਸ਼ੀ ਦੀ ਨਿਸ਼ਾਨਦੇਹੀ ਤੇ ਲਾਸ਼ ਬਰਾਮਦ ਕੀਤੀ | ਹਾਲ ਦੀ ਘੜੀ ਪੁਲਿਸ ਨੇ ਲਾਸ਼ ਕਬਜ਼ੇ 'ਚ ਲੈ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ਅਤੇ ਇਕ ਨੌਜਵਾਨ ਗੁਰਬਿੰਦਰ ਸਿੰਘ ਉਰਫ਼ ਗੋਪਾ ਨਿਵਾਸੀ ਜਾਡਲੀ ਥਾਣਾ ਸਦਰ ਬਲਾਚੌਰ ਨੂੰ ਹਿਰਾਸਤ ਵਿਚ ਲੈ ਕੇ ਪੁੱਛਗਿੱਛ ਕਰ ਰਹੀ ਹੈ | ਕਤਲ ਦੇ ਕਾਰਨਾਂ ਦਾ ਤੁਰੰਤ ਪਤਾ ਨਹੀਂ ਲੱਗ ਸਕਿਆ ਪਰ ਪਤਾ ਲੱਗਾ ਹੈ ਕਿ ਲੜਕੀ ਦੀ ਹੱਤਿਆ ਕਰਨ ਤੋਂ ਬਾਅਦ ਦੋਸ਼ੀ ਨੇ ਲਾਸ਼ ਇਕ ਵੱਡੇ ਅਟੈਚੀ ਕੇਸ 'ਚ ਬੰਦ ਕਰਕੇ ਰਾਤ ਵੇਲੇ ਜੰਗਲ ਵਿਚ ਲਿਜਾ ਕੇ ਅੱਗ ਲਾ ਕੇ ਸਾੜ ਦਿੱਤੀ ਤੇ ਫ਼ਰਾਰ ਹੋ ਗਏ | ਐੱਸ. ਐੱਚ. ਓ. ਅਵਤਾਰ ਸਿੰਘ ਨੇ ਵਾਰ ਵਾਰ ਕੋਸ਼ਿਸ਼ ਕਰਨ 'ਤੇ ਵੀ ਫ਼ੋਨ ਨਹੀਂ ਚੁੱਕਿਆ |
