ਬੀਣੇਵਾਲ, 22 ਜੁਲਾਈ (ਬੈਜ ਚੌਧਰੀ)- ਬੀਤ ਇਲਾਕੇ ਵਿਚ ਅੱਡਾ ਝੁੰਗੀਆਂ ਤੋਂ ਮੈਹਿੰਦਵਾਣੀ ਤਕ ਬਣੀ ਸੜਕ ਮੁਰੰਮਤ ਹੋਣ ਤੋਂ ਦੋ ਮਹੀਨੇ ਬਾਅਦ ਹੀ ਕਈ ਥਾਵਾਂ ਤੋਂ ਟੁੱਟ ਗਈ ਹੈ। ਇਕੱਤਰ ਜਾਣਕਾਰੀ ਮੁਤਾਬਿਕ ਬੀਣੇਵਾਲ ਰੋਡ ‘ਤੇ ਜਨਤਾ ਸੀਮਿੰਟ ਸਟੋਰ ਨੇੜੇ ਕਰੀਬ 18 ਫੁੱਟ ਲੰਬੀ ਤੇ ਤਿੰਨ ਫੁੱਟ ਚੌੜੀ ਸੜਕ ਦੀ ਬਜਰੀ ਹੀ ਉੱਖੜ ਗਈ ਤੇ ਸੜਕ ‘ਚ ਖੱਡਾ ਬਣ ਗਿਆ ਜਿਸ ਨੂੰ ਇੰਟਰਲਾਕ ਲਗਾ ਕੇ ਠੀਕ ਕੀਤਾ ਗਿਆ। ਇਸ ਤੋਂ ਇਲਾਵਾ ਅੱਗੇ ਬੀਣੇਵਾਲ ਦੀ ਹੱਦ ਵਿਚ ਚਾਰ ਥਾਵਾਂ ’ਤੇ, ਮੈਹਿੰਦਵਾਣੀ ਦੀ ਹੱਦ ਵਿਚ ਤਿੰਨ ਥਾਵਾਂ ’ਤੇ ਸੜਕ ’ਤੇ ਪਾਈ ਲੁੱਕ ਤੇ ਰੋੜੀ ਅਲੱਗ-ਅਲੱਗ ਹੋ ਗਈ ਹੈ। ਸੰਮਤੀ ਮੈਂਬਰ ਕਮਲ ਕਟਾਰੀਆ, ਅਜੈਬ ਸਿੰਘ ਬੋਪਾਰਾਏ, ਮਾਸਟਰ ਪਵਨ ਸ਼ਰਮਾ ਨੇ ਇਸ ਸੜਕ ‘ਤੇ ਘਟੀਆ ਸਾਮਾਨ ਲਗਾਏ ਜਾਣ ਦੇ ਦੋਸ਼ ਲਗਾਏ ਹਨ ਤੇ ਉੱਚ ਪੱਧਰੀ ਜਾਂਚ ਦੀ ਮੰਗ ਕੀਤੀ ਹੈ।
