ਜਗਰਾਓਂ

ਪੱਛਮੀ ਦੇਸ਼ਾਂ 'ਚ ਫਸੇ ਪੰਜਾਬੀਆਂ ਨੂੰ ਜਲਦ ਸੁਰੱਖਿਅਤ ਵਾਪਿਸ ਲਿਆਂਦਾ ਜਾਵੇ-ਪ੍ਰਧਾਨ ਬਿੰਦਰ ਮਨੀਲਾ

ਅ

ਅਜੀਤ ਡੈਸਕ 11-03-2026

ਜਗਰਾਉਂ, 10 ਮਾਰਚ (ਗੁਰਦੀਪ ਸਿੰਘ ਮਲਕ)-ਇਜ਼ਰਾਈਲ-ਈਰਾਨ ਸਮੇਤ ਪੱਛਮੀ ਦੇਸ਼ਾਂ 'ਚ ਚੱਲ ਰਹੀ ਭਿਆਨਕ ਜੰਗ ਦੌਰਾਨ ਪੰਜਾਬ ਸਮੇਤ ਹੋਰਨਾਂ ਰਾਜਾਂ ਦੇ ਭਾਰਤੀ ਲੋਕ ਖਾੜੀ ਦੇਸ਼ਾਂ 'ਚ ਕਈ ਦਿਨਾਂ ਤੋਂ ਫਸੇ ਹੋਏ ਹਨ | ਜਿੰਨ੍ਹਾਂ ਦੀ ਜਲਦ ਤੋਂ ਜਲਦ ਵਤਨ ਵਾਪਸੀ ਦਾ ਪ੍ਰਬੰਧ ਭਾਰਤ ਸਰਕਾਰ ਨੂੰ ਕਰਨਾ ਚਾਹੀਦਾ ਹੈ | ਇੰਨ੍ਹਾਂ ਸ਼ਬਦਾਂ ਦਾ ਪ੍ਰਗਟਾਵਾ ਕਰਦਿਆਂ ਪ੍ਰਧਾਨ ਬਿੰਦਰ ਮਨੀਲਾ ਨੇ ਕਿਹਾ ਕਿ ਦਿੱਲੀ ਤੋਂ ਵਾਇਆ ਕੁਵੈਤ ਰਾਹੀਂ ਕੈਨੇਡਾ ਜਾ ਰਹੀ ਇਕ ਕੁਵੈਤ ਏਅਰ ਲਾਈਨ ਦੀ ਫਲਾਈਟ ਨੂੰ ਜੰਗ ਲੱਗਣ ਦੇ ਪਹਿਲੇ ਦਿਨ ਕਤਰ ਦੀ ਰਾਜਧਾਨੀ ਦੋਹਾ ਦੇ ਏਅਰਪੋਰਟ ਵਿਖੇ ਉੱਤਰਨ ਦਿੱਤਾ ਗਿਆ ਸੀ | ਇਸ ਜਹਾਜ਼ 'ਚ ਕੈਨੇਡਾ ਜਾ ਰਹੇ ਪਿੰਡ ਮਲਕ ਦੇ ਵਸਨੀਕ ਜਗਮੇਲ ਸਿੰਘ ਛੋਕਰ ਅਤੇ ਉਸਦੇ ਪਰਿਵਾਰ ਸਮੇਤ ਹੋਰ ਸੈਂਕੜੇ ਭਾਰਤੀ ਸ਼ਾਮਿਲ ਸਨ | ਜਿੰਨ੍ਹਾਂ ਨੂੰ ਏਅਰਲਾਈਨ ਵਲੋਂ ਕਤਰ 'ਚ ਹੀ ਛੱਡ ਦਿੱਤਾ ਗਿਆ | ਜਿੱਥੇ ਇਹ ਸਾਰੇ ਮੁਸਾਫ਼ਰ ਪਿਛਲੇ 11 ਦਿਨ ਤੋਂ ਮਹਿੰਗੇ ਹੋਟਲਾਂ 'ਚ ਬੈਠੇ ਆਪੋ-ਆਪਣੇ ਘਰਾਂ ਨੂੰ ਜਾਣ ਲਈ ਭਾਰਤ ਅਤੇ ਕੈਨੇਡਾ ਸਰਕਾਰਾਂ ਨੂੰ ਅਪੀਲਾਂ ਕਰ ਰਹੇ ਹਨ | ਪ੍ਰਧਾਨ ਬਿੰਦਰ ਮਨੀਲਾ ਨੇ ਕਿਹਾ ਕਿ ਇਸ ਤਰ੍ਹਾਂ ਦੇ ਹੋਰ ਹਜ਼ਾਰਾਂ ਲੋਕ ਹਨ ਜੋ ਵੱਖ-ਵੱਖ ਖਾੜੀ ਦੇਸ਼ਾਂ 'ਚ ਫਸੇ ਬੈਠੇ ਹਨ, ਜਿਨ੍ਹਾਂ 'ਚ ਜ਼ਿਆਦਾਤਰ ਪੰਜਾਬੀ ਹਨ, ਜਿਨ੍ਹਾਂ ਦੀ ਵਤਨ ਵਾਪਸੀ ਲਈ ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਨੂੰ ਤੁਰੰਤ ਭਾਰਤ ਸਰਕਾਰ ਨਾਲ ਤਾਲਮੇਲ ਬਣਾਉਣਾ ਚਾਹੀਦਾ ਹੈ ਤਾਂ ਕਿ ਇਹ ਖਾੜੀ ਦੇਸ਼ਾਂ 'ਚ ਕਈ ਦਿਨਾਂ ਤੋਂ ਫਸੇ ਲੋਕ ਆਪਣੇ ਪਰਿਵਾਰਾਂ ਕੋਲ ਪਹੁੰਚ ਸਕਣ |
ਪ੍ਰਧਾਨ ਬਿੰਦਰ ਮਨੀਲਾ ਨੇ ਕਿਹਾ ਕਿ ਉਨ੍ਹਾਂ ਨਾਲ ਕਈ ਮੁਸਾਫ਼ਿਰਾਂ ਨੇ ਰਾਬਤਾ ਕਾਇਮ ਕਰਕੇ ਦੱਸਿਆ ਹੈ ਕਿ ਉਨ੍ਹਾਂ ਕੋਲ ਹੁਣ ਖਰਚ ਕਰਨ ਲਈ ਪੈਸੇ ਵੀ ਮੁੱਕ ਚੁੱਕੇ ਹਨ ਅਤੇ ਹੁਣ ਉਨ੍ਹਾਂ ਕੋਲ ਹੋਟਲਾਂ ਦਾ ਕਿਰਾਇਆ ਭਰਨ ਦੀ ਸਮਰੱਥਾ ਵੀ ਇਕ ਤਰ੍ਹਾਂ ਨਾਲ ਖ਼ਤਮ ਹੋ ਚੁੱਕੀ ਹੈ, ਜਿਸ ਲਈ ਉਹ ਇੱਧਰ-ਉੱਧਰ ਭਟਕ ਰਹੇ ਹਨ | ਪ੍ਰਧਾਨ ਬਿੰਦਰ ਮਨੀਲਾ ਨੇ ਕਿਹਾ ਕਿ ਪੱਛਮੀ ਦੇਸਾਂ 'ਚ ਫਸੇ ਮੁਸਾਫ਼ਿਰ ਚੱਲ ਰਹੀ ਜੰਗ ਦੌਰਾਨ ਆਪਣੀ ਜਾਨ ਨੂੰ ਵੀ ਖਤਰੇ 'ਚ ਦੱਸ ਰਹੇ ਹਨ | ਜਿਸ ਲਈ ਤੁਰੰਤ ਸਰਕਾਰਾਂ ਨੂੰ ਖਾੜੀ ਦੇਸ਼ਾਂ 'ਚ ਫਸੇ ਭਾਰਤੀ ਦੀ ਸਾਰ ਲੈਣੀ ਚਾਹੀਦੀ ਹੈ ਅਤੇ ਉਕਤ ਦੇਸ਼ਾਂ ਦੀਆਂ ਹਕੂਮਤਾਂ ਨਾਲ ਤਾਲਮੇਲ ਕਰਕੇ ਭਾਰਤੀਆਂ ਦੀ ਜਾਨ ਮਾਲ ਅਤੇ ਉਨ੍ਹਾਂ ਦੇ ਰਹਿਣ ਸਹਿਣ ਅਤੇ ਵਤਨ ਵਾਪਸੀ ਦਾ ਤੁਰੰਤ ਪ੍ਰਬੰਧ ਕਰਨਾ ਚਾਹੀਦਾ ਹੈ |

ਪਿਛਲੀ ਖ਼ਬਰ ਕਿਸਾਨ ਮਹਾਂ ਪੰਚਾਇਤ ਲਈ ਕਿਸਾਨਾਂ ਦਾ ਵੱਡਾ ਜੱਥਾ ਬੀ.ਕੇ.ਯੂ. (ਰਾਜੇਵਾਲ) ਦੀ ਅਗਵਾਈ ਹੇਠ ਬਰਨਾਲੇ ਲਈ ਰਵਾਨਾ ਅਗਲੀ ਖ਼ਬਰ ਇਯਾਲੀ ਨੇ ਵਿਧਾਨ ਸਭਾ 'ਚ ਸਮਾਣਾ ਟਾਵਰ ਮੋਰਚੇ ਦਾ ਮੁੱਦਾ ਉਠਾਇਆ

ਪੱਛਮੀ ਦੇਸ਼ਾਂ 'ਚ ਫਸੇ ਪੰਜਾਬੀਆਂ ਨੂੰ ਜਲਦ ਸੁਰੱਖਿਅਤ ਵਾਪਿਸ ਲਿਆਂਦਾ ਜਾਵੇ-ਪ੍ਰਧਾਨ ਬਿੰਦਰ ਮਨੀਲਾ

ਸੰਬੰਧਿਤ ਖ਼ਬਰਾਂ