ਰਾਏਕੋਟ, 13 ਮਈ (ਬਲਵਿੰਦਰ ਸਿੰਘ ਲਿੱਤਰ)-ਪਿੰਡ ਆਂਡਲੂ ਵਿਖੇ ਇੱਕ ਕਿਸਾਨ ਦੇ ਖੇਤ ਵਿੱਚੋਂ ਕਣਕ ਦੀ ਰਹਿੰਦ-ਖੂੰਹਦ ਨਾੜ੍ਹ ਤੋਂ ਤੂੜੀ ਬਣਾ ਕੇ ਤੂੜੀ ਨੂੰ ਚੋਰੀ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ | ਇਸ ਮੌਕੇ ਪਿੰਡ ਆਂਡਲੂ ਦੇ ਸਾਬਕਾ ਪੰਚ ਅਵਤਾਰ ਸਿੰਘ ਗਰੇਵਾਲ ਨੇ ਦੱਸਿਆ ਕਿ ਉਹ ਖੇਤੀਬਾੜੀ ਦਾ ਧੰਦਾ ਕਰਦਾ ਹੈ, ਉਨ੍ਹਾਂ ਹੈਰਾਨੀ ਪ੍ਰਗਟ ਕਰਦਿਆਂ ਆਖਿਆ ਕਿ ਚੋਰਾਂ ਦਾ ਗਰੋਹ ਐਥੋਂ ਤੱਕ ਗਿਰ ਚੁੱਕਾ ਹੈ ਕਿ ਪਿਛਲੇ ਕੁਝ ਮਹੀਨੇ ਪਹਿਲਾਂ ਉਸਦੇ ਖੇਤ ਵਾਲੀ ਮੋਟਰ ਦੇ ਕੋਠੇ ਤੋਂ ਲੋਹੇ ਦਾ ਗੇਟ ਚੋਰੀ ਹੋ ਗਿਆ ਸੀ, ਜਦਕਿ ਹੁਣ ਉਸ ਵੱਲੋਂ ਸਰਪੰਚ ਹਰਵਿੰਦਰ ਸਿੰਘ ਰਾਜਾ ਦੀ ਜ਼ਮੀਨ ਠੇਕੇ ਉੱਪਰ ਲਈ ਹੋਈ ਸੀ | ਜਿੱਥੇ ਕਣਕ ਦੀ ਕਟਾਈ ਦੇ ਬਾਅਦ ਜਦੋਂ ਉਹ ਉਕਤ ਖੇਤ ਵਿੱਚ ਤੂੜੀ ਬਣਾਉਣ ਲਈ ਗਿਆ ਤਾਂ ਹੈਰਾਨੀ ਦੀ ਹੱਦ ਨਾ ਰਹੀ ਕਿ ਕਿਸੇ ਅਣਪਛਾਤੇ ਵੱਲੋਂ ਉਸ ਦੇ ਖੇਤ ਵਿੱਚੋਂ ਤੂੜੀ ਬਣਾ ਕੇ ਚੋਰੀ ਕਰ ਲਈ ਗਈ ਹੈ | ਅਜਿਹੀ ਅਨੋਖੀ ਚੋਰੀ ਦੀ ਘਟਨਾ ਦੀ ਇਲਾਕੇ ਭਰ ਵਿੱਚ ਖੂਬ ਚਰਚਾ ਛਿੜੀ ਹੋਈ ਹੈ | ਉਨ੍ਹਾਂ ਦੱਸਿਆ ਕਿ ਇਸ ਸਬੰਧੀ ਸੂਚਨਾ ਪਿੰਡ ਦੇ ਸਰਪੰਚ ਹਰਵਿੰਦਰ ਸਿੰਘ ਰਾਜਾ ਬਰਾੜ ਨੂੰ ਦਿੱਤੀ ਗਈ ਹੈ |
