ਨਵਾਂਸ਼ਹਿਰ 'ਚ ਭਾਰੀ ਮੀਂਹ ਨੇ ਕੀਤੀ ਜਲ-ਥਲ
ਅਜੀਤ ਡੈਸਕ
24-01-2026
ਮੀਂਹ ਨਾਲ ਬਦਲਿਆ ਮੌਸਮ ਦਾ ਮਿਜ਼ਾਜ
ਮੁਕੰਦਪੁਰ, (ਅਮਰੀਕ ਸਿੰਘ ਢੀਂਡਸਾ)-ਹਾੜ੍ਹੀ ਦੇ ਸੀਜਨ ਦੀ ਹੋਈ ਪਹਿਲੀ ਬਾਰਿਸ਼ ਨਾਲ ਲੋਕਾਂ ਨੂੰ ਪੈ ਰਹੀ ਸੁੱਕੀ ਠੰਢ ਤੋਂ ਨਿਜਾਤ ਮਿਲੀ ਹੈ | ਬੀਤੀ ਰਾਤ ਤੋਂ ਰੁਕ-ਰੁਕ ਕੇ ਪੈ ਰਹੇ ਮੀਂਹ ਅਤੇ ਚੱਲੀਆਂ ਤੇਜ਼ ਹਵਾਵਾਂ ਨਾਲ ਕਈ ਥਾਵਾਂ 'ਤੇ ਸੜਕਾਂ ਉੱਤੇ ਦਰਖਤ ਡਿੱਗ ਪਏ ਜਿਸ ਨਾਲ ਆਵਾਜਾਈ ਕਾਫੀ ਪ੍ਰਭਾਵਿਤ ਹੋਈ | ਮੀਂਹ ਪੈਣ ਨਾਲ ਠੁਰ-ਠੁਰ ਭਾਵੇਂ ਹੋਰ ਵਧੀ ਹੈ ਪ੍ਰੰਤੂ ਧੁੰਦ ਅਤੇ ਕੋਰੇ ਕਾਰਨ ਸੁੱਕੀ ਠੰਢ ਦੇ ਚੱਲਦਿਆਂ ਲੋਕ ਬਿਮਾਰ ਹੋ ਰਹੇ ਸੀ, ਖੰਘ ਬੁਖਾਰ ਅਤੇ ਹੋਰ ਅਲਾਮਤਾਂ ਲੋਕਾਂ ਨੂੰ ਚੁੰਬੜ ਰਹੀਆਂ ਸਨ ਜਦ ਕਿ ਇਸ ਪਈ ਪਹਿਲੀ ਬਾਰਸ਼ ਨਾਲ ਜਿੱਥੇ ਲੋਕਾਂ ਨੇ ਸੁੱਖ ਦਾ ਸਾਹ ਲਿਆ ਹੈ ਉਥੇ ਪੂਰੀ ਬਨਸਪਤੀ ਵੀ ਮੌਲਣ ਦੇ ਯੋਗ ਹੋ ਗਈ ਹੈ ਅਤੇ ਖੇਤੀ ਮਾਹਰਾਂ ਨੇ ਇਸ ਬਾਰਸ਼ ਨੂੰ ਫਸਲਾਂ ਖਾਸ ਕਰਕੇ ਕਣਕ ਅਤੇ ਬਰਸੀਮ ਦੀ ਫਸਲ ਲਈ ਕਾਫੀ ਲਾਹੇਵੰਦ ਦੱਸਿਆ ਮਾਹਿਰਾਂ ਅਨੁਸਾਰ ਭਾਵੇਂ ਇਸ ਨਾਲ ਗੰਨੇ ਦੀ ਛਿਲਾਈ ਪ੍ਰਭਾਵਿਤ ਹੋਵੇਗੀ ਪ੍ਰੰਤੂ ਇਸ ਨਾਲ ਕੋਰਾ ਧੋਤਾ ਜਾਵੇਗਾ ਅਤੇ ਦੁਰਘਟਨਾਵਾਂ ਦਾ ਕਾਰਨ ਬਣਦੀ ਧੁੰਦ ਖਤਮ ਹੋ ਜਾਵੇਗੀ ਅਤੇ ਪੂਰੀ ਬਨਸਪਤੀ ਮੌਲਣ ਲੱਗ ਪਵੇਗੀ |
ਮੀਂਹ ਕਾਰਨ ਕਿਸਾਨਾਂ ਦੇ ਚਿਹਰਿਆਂ 'ਤੇ ਛਾਈ ਰੌਣਕ
ਔੜ, (ਗੁਰਨਾਮ ਸਿੰਘ ਸੈਣੀ)-ਸਰਦੀ ਦਾ ਮੌਸਮ ਭਾਵੇਂ ਪੂਰੀ ਤਰ੍ਹਾਂ ਸ਼ੁਰੂ ਹੋ ਚੁੱਕਾ ਸੀ ਪਰ ਜਿਸ ਤਰ੍ਹਾਂ ਦੇ ਮੌਸਮ ਦੀ ਹਾੜ੍ਹੀ ਦੀਆਂ ਫਸਲਾਂ ਨੂੰ ਲੋੜ ਸੀ ਉਹ ਨਹੀਂ ਸੀ ਬਣ ਰਿਹਾ ਜਿਸ ਕਰਕੇ ਹਾੜ੍ਹੀ ਦੀਆਂ ਫਸਲਾਂ ਦੇ ਵਿਕਾਸ ਨੂੰ ਲੈ ਕੇ ਕਿਸਾਨ ਕਾਫੀ ਚਿੰਤਤ ਸਨ | ਬੀਤੀ ਰਾਤ ਤੋਂ ਅਚਾਨਕ ਪੈ ਰਹੇ ਮੀਂਹ ਨਾਲ ਪੂਰੀ ਕਾਇਨਾਤ ਸਾਫ ਸੁਥਰੀ ਹੋਣ ਦੇ ਨਾਲ- ਨਾਲ ਖੇਤਾਂ ਦੇ ਚਾਰੇ ਪਾਸੇ ਹਰਿਆਲੀ ਛਾ ਜਾਣ ਕਰਕੇ ਕਿਸਾਨ ਪੂਰੀ ਤਰ੍ਹਾਂ ਖੁਸ਼ ਹਨ | (ਬਾਕੀ ਸਫਾ 6 'ਤੇ)
