ਕਟਾਰੀਆਂ, 9 ਮਾਰਚ (ਪ੍ਰੇਮੀ ਸੰਧਵਾਂ)-ਗੁਰੂ ਨਾਨਕ ਮਿਸ਼ਨ ਹਸਪਤਾਲ ਐਂਡ ਐਜੂਕੇਸ਼ਨਲ ਟਰੱਸਟ ਢਾਹਾਂ ਕਲੇਰਾਂ ਦੇ ਪ੍ਰਧਾਨ ਤੇ ਗਰੀਬਾਂ ਦੀ ਪੈਰ-ਪੈਰ 'ਤੇ ਸਹਾਇਤਾ ਕਰਦੇ ਰਹਿਣ ਵਾਲੇ ਉੱਘੇ ਸਮਾਜ ਸੇਵੀ ਡਾ. ਕੁਲਵਿੰਦਰ ਸਿੰਘ ਢਾਹਾਂ ਨੇ 'ਅਜੀਤ' ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਸੇਵਾ, ਸਿਮਰਨ ਅਤੇ ਸਤਿਸੰਗ ਭਾਗਾਂ ਨਾਲ ਹੀ ਨਸੀਬ ਹੁੰਦੇ ਹਨ, ਕਿਉਂਕਿ ਕਈ ਵਾਰੀ ਮਨੁੱਖ ਮੋਟੀ ਦੌਲਤ ਅਤੇ ਧੀਆਂ ਪੁੱਤਰਾਂ ਦੇ ਘੁਮੰਡ ਵਿੱਚ ਆ ਕੇ ਉਸ ਸਿਰਜਣਹਾਰੇ ਦਾ ਨਾਮ ਵੀ ਦਿਲੋਂ ਕੱਢ ਦਿੰਦੇ ਹਨ | ਡਾ. ਕੁਲਵਿੰਦਰ ਸਿੰਘ ਢਾਹਾਂ ਨੇ ਕਿਹਾ ਕਿ ਕਿਸੇ ਨੂੰ ਵੀ ਮਾਇਆ ਦੇ ਘੁਮੰਡ ਵਿੱਚ ਆ ਕੇ ਵਾਹਿਗੁਰੂ ਤੋਂ ਨਾਤਾ ਨਹੀਂ ਤੋੜਨਾ ਚਾਹੀਦਾ ਕਿਉਂਕਿ ਪ੍ਰਮਾਤਮਾ ਦੇ ਕਰੋਪ ਵਿੱਚ ਆਏ ਝੱਖੜ ਮੋਹ ਮਾਇਆ ਦੀਆਂ ਕੰਧਾਂ ਨੂੰ ਪਲ ਵਿੱਚ ਹੀ ਉਡਾ ਕੇ ਲੈ ਜਾਂਦੇ ਹਨ |
