ਬੀਣੇਵਾਲ, 31 ਮਈ (ਬੈਜ ਚੌਧਰੀ)-ਬੀਤ ਇਲਾਕੇ 'ਚ ਬਣ ਰਹੀਆਂ ਸੜਕਾਂ 'ਤੇ ਘਟੀਆ ਮਟੀਰੀਅਲ ਵਰਤੋਂ ਕਰਨ ਨਾਲ ਸੜਕਾਂ ਤਾਂ ਟੁੱਟ ਹੀ ਰਹੀਆਂ ਹਨ ਸਗੋਂ ਸੜਕਾਂ ਦੇ ਨਾਲ ਗੰਦੇ ਪਾਣੀ ਦੀ ਨਿਕਾਸੀ ਲਈ ਬਣਾਏ ਖਾਲ਼ੇ ਵੀ ਇਕ ਹਫ਼ਤੇ ਬਾਅਦ ਹੀ ਟੁੱਟਣੇ ਸ਼ੁਰੂ ਹੋ ਗਏ ਹਨ | ਮੌਕੇ 'ਤੇ ਜਾ ਕੇ ਇਕੱਤਰ ਜਾਣਕਾਰੀ ਮੁਤਾਬਿਕ ਅੱਡਾ ਝੁੰਗੀਆਂ ਤੋਂ ਮੈਹਿੰਦਵਾਣੀ ਤੱਕ ਬਣ ਰਹੀ ਸੜਕ ਕਈ ਥਾਵਾਂ ਤੋਂ ਟੁੱਟਣੀ (ਧਸ ਗਈ) ਵੀ ਸ਼ੁਰੂ ਹੋ ਚੁੱਕੀ ਹੈ ਜਦਕਿ ਇਸ ਸੜਕ ਬਣੀ ਨੂੰ ਹਾਲੇ ਇਕ ਹਫ਼ਤਾ ਵੀ ਨਹੀਂ ਹੋਇਆ | ਇਥੇ ਹੀ ਬੱਸ ਨਹੀਂ ਸੜਕ ਦੇ ਨਾਲ ਨਾਲ ਗੰਦੇ ਪਾਣੀ ਦੀ ਨਿਕਾਸੀ ਲਈ ਬਣਾਇਆ ਜਾ ਰਿਹਾ ਖਾਲਾ ਵੀ ਇਕ ਹਫ਼ਤੇ ਬਾਅਦ ਹੀ ਟੁੱਟਣਾ ਸ਼ੁਰੂ ਹੋ ਗਿਆ | ਇਸ ਸੜਕ 'ਤੇ ਅੱਡਾ ਝੁੰਗੀਆਂ ਤੋ ਦੋ ਕੁ ਸੌ ਮੀਟਰ ਤੇ ਕਈ ਥਾਵਾਂ ਤੋਂ ਖਾਲਾ ਟੁੱਟ ਗਿਆ ਹੈ ਅਤੇ ਖਾਲ਼ੇ ਦੇ ਨਾਲ ਨਾਲ ਕਰੀਬ 20 ਮੀਟਰ ਸੜਕ ਬੈਠ ਗਈ ਹੈ | ਕੁਲਭੂਸ਼ਨ ਕੁਮਾਰ ਸਾਬਕਾ ਸਰਪੰਚ, ਅਜੈਬ ਸਿੰਘ ਬੋਪਾਰਾਏ, ਮਾਸਟਰ ਪਵਨ ਸ਼ਰਮਾ, ਅਮਨਦੀਪ ਚੇਚੀ ਬੀਣੇਵਾਲ, ਕਮਲ ਕਟਾਰੀਆ ਸੰਮਤੀ ਮੈਂਬਰ ਨੇ ਡੀ. ਸੀ. ਹੁਸ਼ਿਆਰਪੁਰ ਤੋਂ ਇਸ ਸੜਕ 'ਤੇ ਹੋ ਰਹੇ ਘਟੀਆ ਕੰਮ ਦੀ ਵਿਜੀਲੈਂਸ ਜਾਂਚ ਦੀ ਮੰਗ ਕੀਤੀ ਹੈ |
