ਭਰਵੀਂ ਬਾਰਸ਼ ਨੇ ਲੋਕਾਂ ਨੂੰ ਹੁੰਮਸ ਭਰੀ ਗਰਮੀ ਤੋਂ ਦਿਵਾਈ ਰਾਹਤ

ਮਜਾਰੀ/ਸਾਹਿਬਾ, 20 ਜੁਲਾਈ (ਨਿਰਮਲਜੀਤ ਸਿੰਘ ਚਾਹਲ)- ਬਰਸਾਤ ਦੀ ਪਹਿਲੀ ਭਰਵੀਂ ਹੋਈ ਬਰਸਾਤ ਨੇ ਲੋਕਾਂ ਨੂੰ ਸੁੱਖ ਦਾ ਸਾਹ ਦਵਾਇਆ ਹੈ। ਕਾਫੀ ਦਿਨਾਂ ਤੋਂ ਹੁੰਮਸ ਭਰੀ ਗਰਮੀ ਨੇ ਆਮ ਲੋਕਾਂ ਦਾ ਜਿਊਣਾਂ ਦੂਭਰ ਕੀਤਾ ਹੋਇਆ ਸੀ ਜਿਸ ਨਾਲ ਮਨੁੱਖ ਤੋਂ ਲੈ ਕੇ ਪਸ਼ੂ ਪੰਛੀ ਤੇ ਜਾਨਵਰ ਪੂਰੀ ਤਰ੍ਹਾਂ ਅੱਕ ਚੁੱਕੇ ਸਨ। ਸਵੇਰੇ ਵੇਲੇ ਹੋਈ ਭਾਰੀ ਬਰਸਾਤ ਨਾਲ ਮੌਸਮ ਥੋੜਾ ਠੰਡਾ ਹੋ ਗਿਆ ਤੇ ਬੱਦਲਾਂ ਦੀ ਆਵਾਜਾਈ ਬਣਨ ਨਾਲ ਹੋਰ ਬਾਰਸ਼ ਪੈਣ ਦੀ ਉਮੀਦ ਵੱਧ ਗਈ। ਭਾਰੀ ਬਾਰਸ਼ ਦੇ ਪਾਣੀ ਨਾਲ ਪਿੰਡਾਂ ਦੀਆਂ ਗਲੀਆਂ ਨਾਲੀਆਂ ਤੇ ਸੜਕਾਂ ਦੀ ਵੀ ਸਫਾਈ ਹੋ ਗਈ ਹੈ। ਇਸ ਮੀਂਹ ਨਾਲ ਕਿਸਾਨਾਂ ਨੂੰ ਵੱਡੀ ਰਾਹਤ ਮਿਲੀ ਹੈ। ਝੋਨੇ ਦੇ ਨਾਲ-ਨਾਲ ਪਸ਼ਆਂ ਦੇ ਚਾਰੇ ਤੇ ਮੱਕੀ ਦੀ ਫਸਲ ਨੂੰ ਵੀ ਪਾਣੀ ਲੱਗ ਗਿਆ। ਬਿਜਲੀ ਵਿਭਾਗ ਨੂੰ ਵੀ ਕੁਝ ਰਾਹਤ ਮਿਲੇਗੀ।