ਮੰਡੀ ਗੋਬਿੰਦਗੜ੍ਹ, 22 ਮਈ (ਇਕਬਾਲਦੀਪ ਸੰਧੂ)-ਗੋਬਿੰਦਗੜ੍ਹ ਪਬਲਿਕ ਕਾਲਜ ਵਲੋਂ ਜ਼ਿਲ੍ਹਾ ਰੁਜ਼ਗਾਰ ਬਿਊਰੋ ਫ਼ਤਹਿਗੜ੍ਹ ਸਾਹਿਬ ਦੇ ਸਹਿਯੋਗ ਨਾਲ ਨੌਜਵਾਨਾਂ ਦਾ ਮਾਰਗਦਰਸ਼ਨ, ਕਾਉਂਸਲਿੰਗ ਰਣਨੀਤੀਆਂ ਵਿਸ਼ੇ 'ਤੇ ਇਕ ਕੌਂਸਲਰ ਸਮਰੱਥਾ ਨਿਰਮਾਣ ਵਰਕਸ਼ਾਪ ਦਾ ਆਯੋਜਨ ਕੀਤਾ ਗਿਆ | ਇਸ ਮੌਕੇ ਡਾ. ਇਰਾਦੀਪ ਸਹਾਇਕ ਪ੍ਰੋਫ਼ੈਸਰ ਐਸ.ਡੀ. ਸਰਕਾਰੀ ਕਾਲਜ ਲੁਧਿਆਣਾ, ਹਰਮਨਦੀਪ ਸਿੰਘ ਜ਼ਿਲ੍ਹਾ ਕਰੀਅਰ ਕੌਂਸਲਰ ਰੁਜ਼ਗਾਰ ਵਿਭਾਗ ਫ਼ਤਹਿਗੜ੍ਹ ਸਾਹਿਬ ਅਤੇ ਪ੍ਰੋਫ਼ੈਸਰ ਸੁਭਾਨ ਸਾਗਰ ਸਹਾਇਕ ਪ੍ਰੋਫ਼ੈਸਰ ਜੀ.ਪੀ.ਸੀ. ਸਰੋਤ ਵਿਅਕਤੀ ਸਨ | ਡਾ. ਨੀਨਾ ਸੇਠ ਪਜਨੀ ਪਿ੍ੰਸੀਪਲ ਨੇ ਅਜਿਹੀਆਂ ਵਰਕਸ਼ਾਪਾਂ ਦੇ ਆਯੋਜਨ ਦੀ ਮਹੱਤਤਾ 'ਤੇ ਚਾਨਣਾ ਪਾਇਆ | ਸਕੂਲੀ ਬੱਚਿਆਂ ਲਈ ਤਣਾਅ ਪ੍ਰਬੰਧਨ ਅਤੇ ਸਲਾਹ ਰਣਨੀਤੀਆਂ ਵਿਸ਼ੇ 'ਤੇ ਸੈਸ਼ਨ ਦੌਰਾਨ ਡਾ. ਇਰਾਦੀਪ ਨੇ ਸਕੂਲੀ ਬੱਚਿਆਂ ਵਿਚ ਤਣਾਅ ਦੇ ਮੁੱਖ ਕਾਰਨਾਂ ਬਾਰੇ ਵਿਸਥਾਰ ਨਾਲ ਦੱਸਿਆ ਅਤੇ ਵਿਹਾਰਕ ਸਲਾਹ ਤਕਨੀਕਾਂ 'ਤੇ ਚਰਚਾ ਕੀਤੀ | ਉਨ੍ਹਾਂ ਨੇ ਵਿਭਾਗ ਦੀਆਂ ਵੱਖ-ਵੱਖ ਪਹਿਲਕਦਮੀਆਂ ਜਿਵੇਂ ਕਿ ਕੌਂਸਲਰ ਮੀਟਿੰਗਾਂ, ਰੁਜ਼ਗਾਰ ਮੇਲੇ, ਰੁਜ਼ਗਾਰ ਰਜਿਸਟ੍ਰੇਸ਼ਨ ਸੇਵਾਵਾਂ, ਕਰਜ਼ਾ ਮੇਲੇ ਅਤੇ ਨੌਜਵਾਨਾਂ ਦੇ ਰੁਜ਼ਗਾਰ ਅਤੇ ਕਰੀਅਰ ਮਾਰਗਦਰਸ਼ਨ ਦਾ ਸਮਰਥਨ ਕਰਨ ਦੇ ਉਦੇਸ਼ ਨਾਲ ਕਰੀਅਰ ਕੌਂਸਲਿੰਗ ਸੈਸ਼ਨਾਂ 'ਤੇ ਚਾਨਣਾ ਪਾਇਆ | ਪ੍ਰੋ. ਸੁਭਾਨ ਸਾਗਰ ਨੇ ਬਰਾਬਰੀ ਅਤੇ ਸਮਾਨਤਾ 'ਤੇ ਆਧਾਰਿਤ ਅਰਥਪੂਰਨ ਸੰਵਾਦ ਰਾਹੀਂ ਵਿਦਿਆਰਥੀਆਂ ਨੂੰ ਪ੍ਰਭਾਵਸ਼ਾਲੀ ਢੰਗ ਨਾਲ ਸ਼ਾਮਿਲ ਕਰਨ ਲਈ ਸਲਾਹਕਾਰਾਂ ਲਈ ਕੀਮਤੀ ਸੁਝਾਅ ਸਾਂਝੇ ਕੀਤੇ | ਇਸ ਵਰਕਸ਼ਾਪ ਵਿਚ ਆਲੇ-ਦੁਆਲੇ ਦੇ ਸਰਕਾਰੀ ਸਕੂਲਾਂ ਦੇ ਲਗਪਗ 25 ਭਾਗੀਦਾਰਾਂ ਨੇ ਭਾਗ ਲਿਆ ਅਤੇ ਭਾਗੀਦਾਰਾਂ ਨੂੰ ਪ੍ਰਸੰਸਾ ਪੱਤਰ ਦਿੱਤੇ ਗਏ |
