ਅਮਲੋਹ, 23 ਜੁਲਾਈ (ਕੇਵਲ ਸਿੰਘ)-ਸੇਂਟ ਵਿਨਸੈਂਟ ਤੇ ਗ੍ਰੇਨੇਡਾਈਨਜ਼ ਦੇ ਵਿਦੇਸ਼ ਮਾਮਲੇ, ਵਿਦੇਸ਼ੀ ਵਪਾਰ, ਵਿਦੇਸ਼ੀ ਨਿਵੇਸ਼ ਅਤੇ ਪ੍ਰਵਾਸੀ ਮਾਮਲਿਆਂ ਦੇ ਮੰਤਰੀ ਡਵਾਈਟ ਫਿਟਜ਼ਜੈਰਲਡ ਬ੍ਰੈਂਬਲ ਨੇ ਦੇਸ਼ ਭਗਤ ਯੂਨੀਵਰਸਿਟੀ ਅਮੈਰਿਕਾਜ਼ ਦੇ ਚਾਂਸਲਰ ਡਾ. ਜ਼ੋਰਾ ਸਿੰਘ ਨਾਲ ਮੁਲਾਕਾਤ ਕੀਤੀ। ਇਸ ਮੁਲਾਕਾਤ ਦੌਰਾਨ ਦੋਵਾਂ ਪੱਖਾਂ ਵਿਚਕਾਰ ਆਪਸੀ ਦਿਲਚਸਪੀ ਦੇ ਵੱਖ-ਵੱਖ ਵਿਸ਼ਿਆਂ ’ਤੇ ਉਸਾਰੂ ਵਿਚਾਰ-ਵਟਾਂਦਰਾ ਹੋਇਆ। ਗੱਲਬਾਤ ਦੌਰਾਨ ਮੰਤਰੀ ਬ੍ਰੈਂਬਲ ਨੇ ਸੇਂਟ ਵਿਨਸੈਂਟ ਤੇ ਗ੍ਰੇਨੇਡਾਈਨਜ਼ ਵਿਚ ਦੇਸ਼ ਭਗਤ ਯੂਨੀਵਰਸਿਟੀ ਅਮੈਰਿਕਾਜ਼ ਵਲੋਂ ਕੀਤੇ ਗਏ ਨਿਵੇਸ਼ ਦੀ ਪ੍ਰਸ਼ੰਸਾ ਕੀਤੀ ਅਤੇ ਦੇਸ਼ ਦੀ ਸਿੱਖਿਆ ਦੇ ਵਿਕਾਸ ਲਈ ਯੂਨੀਵਰਸਿਟੀ ਵਲੋਂ ਦਿੱਤੇ ਜਾ ਰਹੇ ਯੋਗਦਾਨ ਦੀ ਭਰਪੂਰ ਸਰਾਹਨਾ ਕੀਤੀ। ਇਸ ਮੌਕੇ ਸਥਾਈ ਸਕੱਤਰ ਸੈਂਡੀ ਪੀਟਰਜ਼-ਫਿਲਿਪਸ, ਵਿਦੇਸ਼ ਨੀਤੀ ਦੀ ਡਾਇਰੈਕਟਰ ਸੁਸ਼ਰੀ ਸ਼ਾਰਮੇਨ ਟੈਪਿਨ-ਜੌਨ, ਦੇਸ਼ ਭਗਤ ਯੂਨੀਵਰਸਿਟੀ ਅਮੈਰਿਕਾਜ਼ ਦੀ ਪ੍ਰੋ-ਚਾਂਸਲਰ ਡਾ. ਤਜਿੰਦਰ ਕੌਰ, ਸੰਚਾਲਨ ਨਿਰਦੇਸ਼ਕ ਅਰੁਣ ਮਲਿਕ ਤੇ ਸਥਾਨਕ ਸੰਚਾਲਨ ਨਿਰਦੇਸ਼ਕ ਕਿਮ ਹੈਲਬਿਚ ਵੀ ਹਾਜ਼ਰ ਸਨ। ਵਿਦੇਸ਼ ਮੰਤਰਾਲੇ ਨੇ ਦੇਸ਼ ਭਗਤ ਯੂਨੀਵਰਸਿਟੀ ਅਮੈਰਿਕਾਜ਼ ਨਾਲ ਆਪਣੇ ਸਾਂਝੀਦਾਰੀ ਸੰਬੰਧਾਂ ਲਈ ਧੰਨਵਾਦ ਪ੍ਰਗਟ ਕੀਤਾ ਅਤੇ ਸੇਂਟ ਵਿਨਸੈਂਟ ਅਤੇ ਗ੍ਰੇਨੇਡਾਈਨਜ਼ ਦੇ ਲੋਕਾਂ ਦੇ ਹਿਤ ਲਈ ਸਿੱਖਿਆ ਦੇ ਮੌਕਿਆਂ ਅਤੇ ਪਹਿਲਕਦਮੀਆਂ ਨੂੰ ਹੋਰ ਅੱਗੇ ਵਧਾਉਣ ਵਾਸਤੇ ਆਪਸੀ ਸਹਿਯੋਗ ਅਤੇ ਤਾਲਮੇਲ ਨੂੰ ਲਗਾਤਾਰ ਜਾਰੀ ਰੱਖਣ ਦੀ ਆਪਣੀ ਵਚਨਬੱਧਤਾ ਨੂੰ ਦੁਹਰਾਇਆ।
