ਪਠਾਨਕੋਟ, 1 ਫਰਵਰੀ (ਸੰਧੂ)-ਨੈਰੋਗੇਜ ਰੇਲਵੇ ਲਾਈਨ 'ਤੇ ਰਵਾਨਾ ਹੋਣ ਵਾਲੀਆਂ ਰੇਲਗੱਡੀਆਂ ਕਾਰਨ ਪਠਾਨਕੋਟ ਵਿਚ ਗੰਭੀਰ ਟ੍ਰੈਫਿਕ ਸਮੱਸਿਆਵਾਂ ਆਮ ਨਾਗਰਿਕਾਂ ਤੇ ਕਾਰੋਬਾਰੀ ਮਾਲਕਾਂ ਨੂੰ ਚਿੰਤਤ ਕਰ ਰਹੀਆਂ ਹਨ | ਇਹ ਸਮੱਸਿਆਵਾਂ ਤਾਂ ਹੀ ਹੱਲ ਹੋ ਸਕਦੀਆਂ ਹਨ, ਜੇਕਰ ਹਿਮਾਚਲ ਜਾਣ ਵਾਲੀਆਂ ਰੇਲਗੱਡੀਆਂ ਲਈ ਸਟੇਸ਼ਨ ਨੂੰ ਪਠਾਨਕੋਟ ਤੋਂ ਬਾਹਰ ਤਬਦੀਲ ਕੀਤਾ ਜਾਵੇ | ਸਮਾਜ ਸੇਵਕ ਤੇ ਆਗੂ ਕਾਰਤਿਕ ਵਡੈਹਰਾ ਨੇ ਅੱਜ ਗੁਰਦੁਆਰਾ ਸੰਤ ਆਸ਼ਰਮ ਵਿਖੇ ਸੰਗਤ ਨੂੰ ਸੰਬੋਧਨ ਕਰਦੇ ਹੋਏ ਸਟੇਸ਼ਨ ਸ਼ਿਫ਼ਟ ਕਰਨ ਦੀ ਮੰਗ ਕਰਦੇ ਹੋਏ ਸ਼ੁਰੂ ਕੀਤੀ ਗਈ ਦਸਤਖ਼ਤ ਮੁਹਿੰਮ ਬਾਰੇ ਇਹ ਬਿਆਨ ਦਿੱਤਾ | ਕਾਰਤਿਕ ਵਡੈਹਰਾ ਨੇ ਕਿਹਾ ਕਿ ਪਹਿਲਾਂ ਜਦੋਂ ਹਿਮਾਚਲ ਜਾਣ ਵਾਲੀਆਂ ਰੇਲਗੱਡੀਆਂ ਨੈਰੋਗੇਜ ਰੇਲਵੇ ਲਾਈਨ 'ਤੇ ਰੋਜ਼ਾਨਾ ਕਈ ਵਾਰ ਚੱਲਦੀਆਂ ਸਨ ਤੇ ਫਾਟਕ ਬੰਦ ਰਹਿੰਦੇ ਸਨ, ਤਾਂ ਹਰ ਵਿਅਕਤੀ ਨੂੰ ਟ੍ਰੈਫਿਕ ਜਾਮ ਕਾਰਨ ਹੋਣ ਵਾਲੀਆਂ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪੈਂਦਾ ਸੀ | ਉਨ੍ਹਾਂ ਕਿਹਾ ਕਿ ਸ਼ਹਿਰ 'ਚ ਬਜ਼ੁਰਗਾਂ ਤੋਂ ਲੈ ਕੇ ਬੱਚਿਆਂ ਤੱਕ, ਹਰ ਕੋਈ ਇਸ ਵੱਡੀ ਸਮੱਸਿਆ ਤੋਂ ਤੰਗ ਆ ਚੁੱਕਾ ਹੈ, ਇਸ ਲਈ ਉਨ੍ਹਾਂ ਨੇ ਪਠਾਨਕੋਟ ਨੂੰ ਇਸ ਸਮੱਸਿਆ ਤੋਂ ਛੁਟਕਾਰਾ ਦਿਵਾਉਣ ਲਈ ਇਕ ਮੁਹਿੰਮ ਸ਼ੁਰੂ ਕੀਤੀ ਹੈ | ਉਹ ਪਠਾਨਕੋਟ ਦੇ ਵਸਨੀਕਾਂ ਤੋਂ ਦਸਤਖ਼ਤ ਇਕੱਠੇ ਕਰਨਗੇ ਤੇ ਇਸ ਮੰਗ ਨੂੰ ਕੇਂਦਰੀ ਰੇਲ ਮੰਤਰੀ ਤੱਕ ਲੈ ਜਾਣਗੇ, ਉਨ੍ਹਾਂ ਨੂੰ ਮੁੱਦੇ ਦੀ ਗੰਭੀਰਤਾ ਤੋਂ ਜਾਣੂ ਕਰਵਾਉਣਗੇ ਅਤੇ ਮੰਗ ਕਰਨਗੇ ਕਿ ਹਿਮਾਚਲ ਜਾਣ ਵਾਲੀਆਂ ਰੇਲਗੱਡੀਆਂ ਲਈ ਸਟੇਸ਼ਨ ਨੂੰ ਸ਼ਹਿਰ ਤੋਂ ਬਾਹਰ ਜੰਡਵਾਲ ਤਬਦੀਲ ਕੀਤਾ ਜਾਵੇ | ਇਸ ਸੰਦਰਭ 'ਚ ਉਨ੍ਹਾਂ ਨੇ ਅੱਜ ਗੁਰਦੁਆਰਾ ਸੰਤ ਆਸ਼ਰਮ ਦਾ ਦੌਰਾ ਕੀਤਾ, ਜਿੱਥੇ ਸੰਗਤ ਨੇ ਮੁਹਿੰਮ ਦੇ ਸਮਰਥਨ ਵਿਚ ਦਸਤਖ਼ਤ ਇਕੱਠੇ ਕੀਤੇ ਅਤੇ ਇਸ ਨੰੂ ਮਜ਼ਬੂਤ ਕਰਨ ਵਿਚ ਆਪਣਾ ਪੂਰਾ ਸਮਰਥਨ ਦੇਣ ਦਾ ਭਰੋਸਾ ਦਿੱਤਾ | ਉਹ ਇਸ ਸਭ ਲਈ ਧੰਨਵਾਦੀ ਹਨ |
