ਗੁਰਦਾਸਪੁਰ, 2 ਫਰਵਰੀ (ਪੰਕਜ ਸ਼ਰਮਾ)-ਐਸ.ਕੇ. ਮਿਸ਼ਰਾ ਵਾਈਸ ਚਾਂਸਲਰ ਸਰਦਾਰ ਬੇਅੰਤ ਸਿੰਘ ਸਟੇਟ ਯੂਨੀਵਰਸਿਟੀ ਗੁਰਦਾਸਪੁਰ ਦੀ ਅਗਵਾਈ ਤੇ ਮਾਰਗ ਦਰਸ਼ਨ ਹੇਠ ਯੂਨੀਵਰਸਿਟੀ ਨੇ ਮਟੀਰੀਅਲ ਇੰਜੀਨੀਅਰਿੰਗ ਮੈਨੂਫੈਕਚਰਿੰਗ 'ਤੇ ਦੂਜੀ ਅੰਤਰਰਾਸ਼ਟਰੀ ਕਾਨਫ਼ਰੰਸ ਦਾ ਸਫ਼ਲਤਾ ਪੂਰਵਕ ਆਯੋਜਨ ਕੀਤਾ | ਕਾਨਫ਼ਰੰਸ ਵਿਚ ਅਕਾਦਮਿਕ, ਖੋਜਕਰਤਾ, ਉਦਯੋਗ ਮਾਹਿਰ ਤੇ ਵੱਖ-ਵੱਖ ਵਿਸ਼ਿਆਂ ਦੇ ਵਿਦਿਆਰਥੀ ਸ਼ਾਮਿਲ ਹੋਏ | ਕਾਨਫ਼ਰੰਸ ਦੇ ਕਨਵੀਨਰ ਡਾ: ਸਰਵਜੀਤ ਸਿੰਘ ਸਿੱਧੂ ਅਤੇ ਡਾ: ਵਿਪਨ ਕੁਮਾਰ ਸੋਪਾਲ ਨੇ ਸਾਰੇ ਵਿਸ਼ੇਸ਼ ਮਹਿਮਾਨਾਂ ਦਾ ਮੁੱਖ ਬੁਲਾਰਿਆਂ ਤੇ ਭਾਗੀਦਾਰਾਂ ਵਜੋਂ ਸਵਾਗਤ ਕੀਤਾ | ਕਾਨਫ਼ਰੰਸ ਦਾ ਉਦਘਾਟਨ ਮੁੱਖ ਮਹਿਮਾਨ ਡਾ: ਲਲਿਤ ਕੁਮਾਰ ਅਵਸਥੀ ਵਾਈਸ ਚਾਂਸਲਰ ਸਰਦਾਰ ਪਟੇਲ ਯੂਨੀਵਰਸਿਟੀ ਮੰਡੀ ਹਿਮਾਚਲ ਪ੍ਰਦੇਸ਼ ਨੇ ਕੀਤਾ ਤੇ ਆਪਣੇ ਭਾਸ਼ਣ 'ਚ ਉੱਨਤ ਸਮੱਗਰੀ ਤੇ ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਦੇ ਸਾਂਝੇਪਣ ਨੂੰ ਸਮਾਜਿਕ ਵਿਕਾਸ ਤੇ ਭਵਿੱਖ ਦੀ ਰਾਸ਼ਟਰੀ ਤਰੱਕੀ ਦਾ ਮੁੱਖ ਆਧਾਰ ਦੱਸਿਆ | ਇਸ ਮੌਕੇ ਡਾ: ਐਸ.ਕੇ. ਮਿਸ਼ਰਾ ਨੇ ਫੈਕਲਟੀ ਮੈਂਬਰਾਂ ਨੂੰ ਖੋਜ ਆਧਾਰਿਤ ਨਵੀਨਤਾ ਵਿਚ ਸਰਗਰਮ ਭਾਗੀਦਾਰੀ ਲਈ ਪ੍ਰੇਰਿਤ ਕੀਤਾ ਤੇ ਉਨ੍ਹਾਂ ਖੋਜ ਨੂੰ ਮਨੁੱਖੀ ਭਲਾਈ ਸਿਹਤ ਸੇਵਾਵਾਂ ਅਤੇ ਰਾਸ਼ਟਰੀ ਮਿਸ਼ਨਾਂ ਨਾਲ ਜੋੜਨ 'ਤੇ ਜ਼ੋਰ ਦਿੱਤਾ | ਕਾਨਫ਼ਰੰਸ ਦੇ ਪ੍ਰਧਾਨ ਡਾ: ਅਨਿਲ ਮਹਾਜਨ ਤੇ ਡਾ: ਬਲਜੀਤ ਕੁਮਾਰ ਨੇ ਕਾਨਫ਼ਰੰਸ ਦੇ ਮੁੱਖ ਵਿਸ਼ਿਆਂ, ਉੱਭਰ ਰਹੀਆਂ ਖੋਜ ਚੁਣੌਤੀਆਂ ਤੇ ਵਿਆਪਕ ਅੰਤਰ-ਸਾਲਾਨਾ ਪ੍ਰਕਿਰਤੀ ਬਾਰੇ ਜਾਣਕਾਰੀ ਦਿੱਤੀ | ਉਨ੍ਹਾਂ ਦੱਸਿਆ ਕਿ ਇਕ ਸਖ਼ਤ ਸਮੀਖਿਆ ਪ੍ਰਕਿਰਿਆ ਤੋਂ ਬਾਅਦ 80 ਉੱਚ-ਗੁਣਵੱਤਾ ਵਾਲੇ ਪੇਪਰ ਪੇਸ਼ਕਾਰੀ ਲਈ ਚੁਣੇ ਗਏ ਸਨ | ਉਦਘਾਟਨ ਸੈਸ਼ਨ ਦੌਰਾਨ ਮੁੱਖ ਮਹਿਮਾਨ, ਮੁੱਖ ਸਰਪ੍ਰਸਤ ਤੇ ਸੰਜੋਯਕ ਨੇ ਕਾਨਫ਼ਰੰਸ ਦੀ ਕਾਰਵਾਈ ਦੀ ਰਸਮੀ ਸ਼ੁਰੂਆਤ ਕੀਤੀ |
