ਘੱਲੂਘਾਰਾ ਸਾਹਿਬ, 21 ਫਰਵਰੀ (ਪਰਮ ਮਿਨਹਾਸ)-ਸ਼ੁਕਰਵਾਰ ਦੀ ਅੱਧੀ ਰਾਤ ਤੋਂ ਬਾਅਦ ਅਚਾਨਕ ਪਈ ਗਹਿਰੀ ਧੁੰਦ ਕਾਰਨ ਜਿੱਥੇ ਤਾਪਮਾਨ ਵਿਚ ਗਿਰਾਵਟ ਦਰਜ ਕੀਤੀ ਗਈ, ਉੱਥੇ ਇਸ ਗਹਿਰੀ ਧੁੰਦ ਦੇ ਕਾਰਨ ਗੁਰਦਾਸਪੁਰ-ਸ੍ਰੀ ਹਰਗੋਬਿੰਦਪੁਰ ਮੁੱਖ ਮਾਰਗ ਉੱਪਰ 2 ਹਾਦਸੇ ਵਾਪਰ ਗਏ | ਇਕ ਹਾਦਸਾ ਅੱਜ ਸਵੇਰੇ 5:30 ਵਜੇ ਦੇ ਕਰੀਬ ਅੱਡਾ ਸਠਿਆਲੀ ਕੋਲ ਨਹਿਰ ਦੇ ਪੁਲ ਉੱਪਰ ਵਾਪਰਿਆ, ਜਿੱਥੇ ਪੁਲ ਦੇ ਬਿਲਕੁਲ ਵਿਚਕਾਰ ਇਕ ਗੰਨੇ ਨਾਲ ਭਰੀ ਟਰਾਲੀ ਅਤੇ ਟਰੱਕ ਦੀ ਆਪਸ ਵਿਚ ਟੱਕਰ ਹੋ ਗਈ | ਟਰੱਕ ਰੋਪੜ ਤੋਂ ਪਠਾਨਕੋਟ ਵਿਖੇ ਸੀਮੈਂਟ ਲੈ ਕੇ ਜਾ ਰਿਹਾ ਸੀ, ਜਦਕਿ ਪਿੰਡ ਠੱਕਰ ਸੰਧੂ ਵਾਸੀ ਕਿਸਾਨ ਆਪਣੇ ਪਿੰਡ ਤੋਂ ਕੀੜੀ ਮਿੱਲ ਵਿਚ ਗੰਨਾ ਲੈ ਕੇ ਜਾ ਰਿਹਾ ਸੀ, ਜਦੋਂ ਉਹ ਸਠਿਆਲੀ ਨੇੜਲੇ ਨਹਿਰੀ ਪੁਲ ਉੱਪਰ ਪੁੱਜਾ ਤਾਂ ਸਾਹਮਣੇ ਤੋਂ ਆ ਰਹੇ ਟਰੱਕ ਦੀ ਟਰਾਲੀ ਨਾਲ ਸਿੱਧੀ ਟੱਕਰ ਹੋ ਗਈ, ਇਸ ਹਾਦਸੇ ਦੇ ਦੌਰਾਨ ਦੋਵੇਂ ਚਾਲਕ ਵਾਲ-ਵਾਲ ਬਚ ਗਏ, ਪਰ ਕਿਸਾਨ ਦੇ ਟਰਾਲੀ ਵਿਚ ਲੱਦੇ ਗੰਨੇ ਦਾ ਭਾਰੀ ਨੁਕਸਾਨ ਹੋਇਆ | ਕਿਸਾਨ ਨੂੰ ਦੁਬਾਰਾ ਦੂਸਰੀ ਟਰਾਲੀ ਉੱਪਰ ਗੰਨਾ ਲੋਡ ਕਰਵਾਉਣ ਲਈ ਭਾਰੀ ਮੁਸ਼ੱਕਤ ਕਰਨੀ ਪਈ | ਨਹਿਰੀ ਪੁਲ ਦੇ ਵਿਚਕਾਰ ਦੋਨੋਂ ਵਾਹਨ ਆਪਸ ਵਿਚ ਟਕਰਾਉਣ ਦੇ ਕਾਰਨ ਗੁਰਦਾਸਪੁਰ-ਸ੍ਰੀ ਹਰਗੋਬਿੰਦਪੁਰ ਮਾਰਗ ਪੂਰੀ ਤਰ੍ਹਾਂ ਨਾਲ ਬੰਦ ਹੋ ਗਿਆ | ਸਕੂਲ ਜਾਂਦੇ ਬੱਚਿਆਂ, ਅਧਿਆਪਕਾਂ ਅਤੇ ਹੋਰ ਰੋਜ਼ਮਰਾ ਦੇ ਕੰਮ ਧੰਦੇ 'ਤੇ ਜਾਣ ਵਾਲੇ ਲੋਕਾਂ ਨੂੰ ਬਦਲਵੇਂ ਰਸਤਿਆਂ ਦੇ ਰਾਹੀਂ ਆਪਣੀ ਮੰਜ਼ਿਲ ਉੱਪਰ ਜਾਣਾ ਪਿਆ | ਇਸੇ ਹੀ ਮਾਰਗ ਉੱਪਰ ਸੰਘਣੀ ਧੁੰਦ ਦੇ ਕਾਰਨ ਵਾਪਰੇ ਇਕ ਹੋਰ ਹਾਦਸੇ ਦੌਰਾਨ ਇਕ ਟਿੱਪਰ ਅਤੇ ਵੈਨਿਊ ਕਾਰ ਦੀ ਟੱਕਰ ਹੋ ਗਈ | ਇਸ ਟੱਕਰ ਦੇ ਕਾਰਨ ਵੈਨਿਊ ਕਾਰ ਬੁਰੀ ਤਰ੍ਹਾਂ ਨੁਕਸਾਨੀ ਗਈ | ਭਾਵੇਂ ਕਿ ਟਿੱਪਰ ਅਤੇ ਕਾਰ ਵਾਲਿਆਂ ਦਾ ਆਪਸੀ ਸਮਝੌਤਾ ਹੋ ਗਿਆ, ਪਰ ਧੁੰਦ ਕਾਰਨ ਵਾਪਰੇ ਇਸ ਹਾਦਸੇ ਨੇ ਵਾਹਨ ਚਾਲਕਾਂ ਨੂੰ ਚੁਕੰਨੇ ਕੀਤਾ ਹੈ ਕਿ ਧੁੰਦ ਵਿਚ ਬਹੁਤ ਹੀ ਸਬਰ ਅਤੇ ਸੁਰੱਖਿਅਤ ਹੋ ਕੇ ਚੱਲਣ ਦੀ ਲੋੜ ਹੈ |
