ਪਠਾਨਕੋਟ, 7 ਮਾਰਚ (ਵਿਨੋਦ/ਆਸ਼ੀਸ਼ ਸ਼ਰਮਾ)- ਨਾਰਦਰਨ ਰੇਲਵੇ ਮੈਨਸ ਯੂਨੀਅਨ ਸ਼ਾਖਾ ਪਠਾਨਕੋਟ ਨੇ ਬਰਾਂਚ ਪ੍ਰਧਾਨ ਕਾਮਰੇਡ ਸੁਰੇਸ਼ ਮਹਾਜਨ ਦੀ ਪ੍ਰਧਾਨਗੀ ਹੇਠ ਸਟੇਸ਼ਨ ਕੰਪਲੈਕਸ ਵਿਖੇ ਗੇਟ ਮੀਟਿੰਗ ਕੀਤੀ | ਬਰਾਂਚ ਸਕੱਤਰ ਕਾਮਰੇਡ ਲਖਬੀਰ ਸਿੰਘ ਨੇ ਮੀਟਿੰਗ ਦਾ ਸੰਚਾਲਨ ਕੀਤਾ ਅਤੇ ਨੈਰੋਗੇਜ ਸੈਕਸ਼ਨ ਨੂੰ ਡਲਹੌਜ਼ੀ ਰੋਡ 'ਤੇ ਤਬਦੀਲ ਕਰਨ ਦਾ ਵਿਰੋਧ ਕੀਤਾ | ਉਨ੍ਹਾਂ ਮੰਗ ਕੀਤੀ ਕਿ ਸੁਚਾਰੂ ਰੇਲਗੱਡੀਆਂ ਦੇ ਸੰਚਾਲਨ ਨੂੰ ਯਕੀਨੀ ਬਣਾਉਣ ਲਈ ਸਟਾਫ ਦੀ ਘਾਟ ਨੂੰ ਦੂਰ ਕੀਤਾ ਜਾਵੇ | ਮੁੱਖ ਬੁਲਾਰੇ ਡਵੀਜ਼ਨਲ ਸਕੱਤਰ ਕਾਮਰੇਡ ਸ਼ਿਵ ਦੱਤ ਨੇ ਕਿਹਾ ਕਿ ਪ੍ਰਸ਼ਾਸਨ ਨੇ ਨੈਰੋਗੇਜ ਰੇਲਗੱਡੀਆਂ ਚਲਾਉਣ ਦਾ ਆਦੇਸ਼ ਜਾਰੀ ਕੀਤਾ ਸੀ ਪਰ ਸਟਾਫ ਦੀ ਘਾਟ ਨੂੰ ਦੂਰ ਕਰਨ 'ਚ ਅਸਫਲ ਰਿਹਾ ਹੈ | ਉਨ੍ਹਾਂ ਕਿਹਾ ਕਿ ਇਸ ਨਾਲ ਟਰੈਫਿਕ ਸਟਾਫ ਨੂੰ ਅਸੁਵਿਧਾ ਹੋਵੇਗੀ ਤੇ ਕਾਰਜ ਪ੍ਰਭਾਵਿਤ ਹੋਣਗੇ | ਉਨ੍ਹਾਂ ਕਿਹਾ ਕਿ ਬ੍ਰੌਡਗੇਜ ਤੇ ਨੈਰੋਗੇਜ ਓਪਰੇਸ਼ਨਾਂ ਵਿਚ ਅੰਤਰ ਹਨ | ਉਨ੍ਹਾਂ ਨੇ ਡਲਹੌਜ਼ੀ ਰੋਡ 'ਤੇ ਓਪਰੇਸ਼ਨਾਂ ਨੂੰ ਤਬਦੀਲ ਕਰਨ ਦੀ ਨਿੰਦਾ ਕੀਤੀ ਤੇ ਮੰਗ ਕੀਤੀ ਕਿ ਰੇਲਗੱਡੀਆਂ ਸਿਰਫ਼ ਪਠਾਨਕੋਟ ਤੋਂ ਹੀ ਚੱਲਣ | ਉਨ੍ਹਾਂ ਚੈਂਬਰ ਆਫ਼ ਕਾਮਰਸ ਤੇ ਰਾਜਨੀਤਿਕ ਪਾਰਟੀਆਂ ਨੂੰ ਅਪੀਲ ਕੀਤੀ ਤੇ ਸੁਝਾਅ ਦਿੱਤਾ ਕਿ ਬਾਜ਼ਾਰਾਂ ਵਿਚ ਕਬਜ਼ੇ ਹਟਾਏ ਜਾਣ ਤੇ ਗੈਰ-ਕਾਨੂੰਨੀ ਆਟੋ-ਰਿਕਸ਼ਾ 'ਤੇ ਪਾਬੰਦੀ ਲਗਾਈ ਜਾਵੇ | ਪੁਲਿਸ ਪ੍ਰਸ਼ਾਸਨ ਨੂੰ ਸੜਕ 'ਤੇ ਇਕ-ਪਾਸੜ ਪ੍ਰਣਾਲੀ ਨੂੰ ਸਖ਼ਤੀ ਨਾਲ ਲਾਗੂ ਕਰਨਾ ਚਾਹੀਦਾ ਹੈ ਤੇ ਸੁਚਾਰੂ ਆਵਾਜਾਈ ਨੂੰ ਯਕੀਨੀ ਬਣਾਉਣ ਲਈ ਰੂਟ ਯੋਜਨਾਵਾਂ ਸਥਾਪਤ ਕਰਨੀਆਂ ਚਾਹੀਦੀਆਂ ਹਨ | ਡਵੀਜ਼ਨਲ ਸਕੱਤਰ ਨੇ ਕਿਹਾ ਕਿ ਇਹ ਰੇਲਗੱਡੀ ਆਮ ਜਨਤਾ ਜਾਂ ਸੈਲਾਨੀਆਂ ਦੁਆਰਾ ਵਰਤੀ ਜਾਂਦੀ ਹੈ ਤੇ ਇਹ ਹਿਮਾਚਲ ਪ੍ਰਦੇਸ਼ ਦੀ ਵਿਰਾਸਤ ਹੈ | ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਰੇਲਗੱਡੀਆਂ ਨੂੰ ਚਲਾਉਣਾ ਪੂਰੀ ਤਰ੍ਹਾਂ ਗ਼ਲਤ ਹੈ, ਜਦੋਂ ਤੱਕ ਸਟਾਫ ਦੀ ਘਾਟ ਪੂਰੀ ਨਹੀਂ ਹੋ ਜਾਂਦੀ | ਇਸ ਮੌਕੇ ਸਹਾਇਕ ਡਵੀਜ਼ਨਲ ਸਕੱਤਰ ਕਾਮਰੇਡ ਅਸ਼ਵਨੀ ਕੁਮਾਰ, ਰਾਜ ਕੁਮਾਰ, ਰੋਹਿਤ ਸ਼ਰਮਾ, ਰਾਜ ਕੁਮਾਰ ਸ਼ਰਮਾ, ਬੋਧਰਾਜ, ਰਾਜਿੰਦਰ ਸੈਣੀ, ਮਨਮੋਹਨ ਸਿੰਘ, ਰਾਜੇਸ਼ ਅਹੂਜਾ ਤੇ ਈਸ਼ੂ ਬਾਲਾ ਨੇ ਵੀ ਪ੍ਰਸ਼ਾਸਨ ਤੇ ਸਰਕਾਰ ਦੀਆਂ ਕਾਰਵਾਈਆਂ ਦੀ ਨਿੰਦਾ ਕੀਤੀ ਤੇ ਰੇਲਗੱਡੀਆਂ ਨੂੰ ਪਠਾਨਕੋਟ ਤੋਂ ਚਲਾਉਣ ਦੀ ਅਪੀਲ ਕੀਤੀ | ਜ਼ਿਕਰਯੋਗ ਹੈ ਕਿ ਕੁਝ ਦਿਨ ਪਹਿਲਾਂ ਰੇਲ ਰਾਜ ਮੰਤਰੀ ਰਵਨੀਤ ਬਿੱਟੂ ਵਲੋਂ ਪਠਾਨਕੋਟ ਰੇਲਵੇ ਸਟੇਸ਼ਨ ਦਾ ਦੌਰਾ ਕੀਤਾ ਸੀ ਤੇ ਨੈਰੋਗੇਜ ਰੇਲ ਗੱਡੀਆਂ ਨੂੰ ਪਠਾਨਕੋਟ ਸਟੇਸ਼ਨ ਦੀ ਬਜਾਏ ਡਲਹੌਜੀ ਰੋਡ ਸਟੇਸ਼ਨ ਤੋਂ ਚਲਾਉਣ ਦੀ ਗੱਲ ਕਹੀ ਸੀ |
