ਗੁਰਦਾਸਪੁਰ, 19 ਅਪ੍ਰੈਲ (ਅਸ਼ੋਕ ਸ਼ਰਮਾ)- ਮਾਧੋਪੁਰ ਹੈੱਡ ਤੋਂ ਨਿਕਲਦੀ ਨਹਿਰ ਅਪਰਬਾਰੀ ਦੁਆਬ ਤੋਂ ਨਿਕਲਦਾ ਪਿੰਡ ਜੱਟੂਵਾਲ ਦਾ ਸਿਲਟਰ ਇਜੈਕਟਰ ਜਿਸ ਦੀ ਸਬੰਧਿਤ ਵਿਭਾਗ ਵਲੋਂ ਕਈ ਦਹਾਕੇ ਤੋਂ ਸਫ਼ਾਈ ਤੇ ਡੂੰਘਾਈ ਨਾ ਕਰਵਾਉਣ ਕਰਕੇ ਕਿਸਾਨਾਂ ਦੀ ਸੈਂਕੜੇ ਏਕੜ ਜ਼ਮੀਨ ਪ੍ਰਭਾਵਿਤ ਹੋ ਰਹੀ ਹੈ ਜਿਸ ਕਰਕੇ ਕਿਸਾਨ ਪੰਜਾਬ ਸਰਕਾਰ ਤੋਂ ਕਾਫ਼ੀ ਖ਼ਫ਼ਾ ਹਨ | ਇਸ ਸਬੰਧੀ ਇਲਾਕੇ ਦੇ ਬਹੁਤ ਸਾਰੇ ਕਿਸਾਨਾਂ ਨੇ 'ਅਜੀਤ' ਨਾਲ ਗੱਲਬਾਤ ਕਰਦਿਆਂ ਦੱਸਿਆ ਕਿ ਨਹਿਰੀ ਵਿਭਾਗ ਨੇ ਨਹਿਰ ਵਿਚ ਆਉਂਦੀ ਰੇਤਾ ਦੀ ਸਾਂਭ ਸੰਭਾਲ ਲਈ ਸਿਲਟਰ ਇਜੈਕਟਰ ਦਰਿਆ ਬਿਆਸ ਤੱਕ ਬਣਾਇਆ ਸੀ ਪਰ ਸਿਲਟਰ ਇਜੈਕਟਰ ਦੀ ਸਾਂਭ ਸੰਭਾਲ ਨਾ ਹੋਣ ਕਰਕੇ ਹੁਣ ਇਹ ਪੂਰਨ ਤੌਰ 'ਤੇ ਬੰਦ ਪਿਆ ਹੈ | ਜਿਹੜਾ ਪਾਣੀ ਨਹਿਰ ਵਿਚ ਸਿੰਮਦਾ ਹੈ, ਉਹ ਕਿਸਾਨਾਂ ਦੀ ਜ਼ਮੀਨ ਕਾਫ਼ੀ ਖ਼ਰਾਬ ਕਰ ਰਿਹਾ ਹੈ ਅਤੇ ਸੇਮ ਸਮੱਸਿਆ ਵੀ ਕਿਸਾਨਾਂ ਲਈ ਸਿਰਦਰਦੀ ਬਣੀ ਹੈ | ਹੁਣ ਲੋਕਾਂ ਨੇ ਆਪਣੇ ਆਪ ਹੀ ਕਬਜ਼ੇ ਕਰਕੇ ਸਿਲਟਰ ਇਜੈਕਟਰ ਨੰੂ ਬੰਦ ਕਰਕੇ ਉਸ ਵਿਚ ਸਬਜ਼ੀਆਂ ਤੇ ਫ਼ਸਲਾਂ ਬੀਜਣੀਆਂ ਸ਼ੁਰੂ ਕਰ ਦਿੱਤੀਆਂ ਹਨ ਜਿਸ ਨਾਲ ਮਹਿਕਮੇ ਨੰੂ ਕਾਫ਼ੀ ਨੁਕਸਾਨ ਹੋ ਰਿਹਾ ਹੈ ਤੇ ਪੰਜਾਬ ਸਰਕਾਰ ਵੀ ਇਸ ਪਾਸੇ ਕੋਈ ਧਿਆਨ ਨਹੀਂ ਦੇ ਰਹੀ | ਸਿਲਟਰ ਇਜੈਕਟਰ ਵਿਚ ਗੰਦਾ ਪਾਣੀ ਪੈਣ ਕਰਕੇ ਇਲਾਕੇ ਅੰਦਰ ਬਦਬੂ ਫੈਲੀ ਹੋਈ ਤੇ ਪਾਣੀ ਵੀ ਨਾ ਤਾਂ ਪਸ਼ੂਆਂ ਦੇ ਪੀਣ ਯੋਗ ਹੈ ਤੇ ਨਾ ਹੀ ਖੇਤਾਂ ਨੰੂ ਲਗਾਉਣ ਦੇ ਯੋਗ | ਉਨ੍ਹਾਂ ਦੱਸਿਆ ਕਿ ਇਹ ਮਾਮਲਾ ਮੌਜੂਦਾ ਸਰਕਾਰ ਤੇ ਪਹਿਲੀਆਂ ਸਰਕਾਰਾਂ ਕੋਲ ਵੀ ਉਠਾਇਆ ਹੈ ਪਰ ਉਹ ਵੀ ਇਸ ਦੀ ਦੇਖਭਾਲ ਕਰਨ ਤੋਂ ਅਸਮਰਥ ਰਹੀਆਂ ਹਨ | ਉਨ੍ਹਾਂ ਦੱਸਿਆ ਕਿ ਪਹਿਲੀਆਂ ਸਰਕਾਰਾਂ ਨੇ ਇਸ 'ਤੇ ਛੋਟੇ ਬਿਜਲੀ ਡੈਮ ਬਣਾਉਣ ਦੀ ਗੱਲ ਆਖੀ ਸੀ, ਉਹ ਵੀ ਸਿਰੇ ਨਹੀਂ ਚੜ੍ਹ ਸਕੀ | ਹੁਣ ਲੋਕ ਨਿੱਜੀ ਤੌਰ 'ਤੇ ਕਬਜ਼ੇ ਕਰਕੇ ਸਰਕਾਰ ਨੰੂ ਲੱਖਾਂ ਦਾ ਚੂਨਾ ਲਗਾ ਰਹੇ ਹਨ | ਉਨ੍ਹਾਂ ਨੇ ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਪਾਸੋਂ ਮੰਗ ਕੀਤੀ ਕਿ ਜੱਟੂਵਾਲ ਸਿਲਟਰ ਇਜੈਕਟਰ ਨੰੂ ਬਚਾਉਣ ਲਈ ਡਰੇਨਜ਼ ਵਿਭਾਗ ਪੰਜਾਬ ਦੇ ਸੈਕਟਰੀ ਨੰੂ ਸਖ਼ਤ ਨਿਰਦੇਸ਼ ਦਿੱਤੇ ਜਾਣ |
