ਗੁਰਦਾਸਪੁਰ, 14 ਮਈ (ਅਸ਼ੋਕ ਸ਼ਰਮਾ)-ਪੁਲਿਸ ਸਟੇਸ਼ਨ ਪੁਰਾਣਾ ਸ਼ਾਲਾ ਅੰਦਰ ਪੈਂਦੇ ਪਿੰਡਾਂ ਵਿਚ ਰਾਤ ਸਮੇਂ ਧਾਰਮਿਕ ਅਸਥਾਨਾਂ 'ਤੇ ਨਿਰੰਤਰ ਚੋਰੀਆਂ ਹੋਣ ਨਾਲ ਜਨਤਾ ਕਾਫੀ ਪ੍ਰੇਸ਼ਾਨ ਹੈ | ਜਦੋਂ ਕਿ ਇਸ ਤੋਂ ਪਹਿਲਾਂ ਚਾਵਾ ਦੇ ਦੋ ਮੰਦਿਰਾਂ 'ਚ ਚੋਰੀ ਕਰਕੇ ਚੋਰ ਹਜ਼ਾਰਾਂ ਰੁਪਏ ਉਡਾ ਕੇ ਲੈ ਗਏ ਹਨ ਅਤੇ ਇਹ ਚੋਰੀ ਨਸ਼ੇੜੀ ਕਿਸਮ ਦੇ ਲੋਕਾਂ ਵਲੋਂ ਕੀਤੀ ਜਾਪਦੀ ਹੈ | ਬਹਾਦਰ ਨਵਾਂ ਪਿੰਡ ਦੇ ਵਿਅਕਤੀਆਂ ਨੇ ਦੱਸਿਆ ਕਿ ਪਿੰਡ ਅੰਦਰ ਬਾਬਾ ਰਾਂਝੇ ਸ਼ਾਹ ਦੀ ਮਜਾਰ ਹੈ ਅਤੇ ਲੋਕ ਇਸ 'ਤੇ ਕਾਫ਼ੀ ਵਿਸ਼ਵਾਸ ਰੱਖਦੇ ਹਨ, ਹਰ ਵੀਰਵਾਰ ਲੋਕ ਵੱਡੀ ਗਿਣਤੀ 'ਚ ਨਤਮਸਤਕ ਹੁੰਦੇ ਹਨ ਅਤੇ ਜਿਨ੍ਹਾਂ ਪ੍ਰਵਾਸੀ ਭਾਰਤੀਆਂ ਤੇ ਪਿੰਡ ਵਾਸੀਆਂ ਦੀਆਂ ਮਨੋਕਾਮਨਾਵਾਂ ਪੂਰੀਆਂ ਹੋ ਜਾਂਦੀਆਂ ਹਨ, ਉਹ ਖੁੱਲ੍ਹੇ ਦਿਲ ਨਾਲ ਦਾਨ ਕਰਦੇ ਹਨ | ਕਮੇਟੀ ਜਦੋਂ ਪਿੰਡ ਅੰਦਰ ਲੰਗਰ ਲਗਾਉਂਦੀ ਹੋਵੇ ਤਾਂ ਫਿਰ ਕਮੇਟੀ ਨੰੂ ਉਸ ਗੋਲਕ ਨੰੂ ਖੋਲਣ ਦੀ ਲੋੜ ਪੈਂਦੀ ਹੈ | ਨਹੀਂ ਤਾਂ ਪੈਸੇ ਗੋਲਕ ਵਿਚ ਪਏ ਰਹਿੰਦੇ ਹਨ | ਪਿੰਡ ਵਾਸੀਆਂ ਨੇ ਦੱਸਿਆ ਕਿ ਗੋਲਕ ਵਿਚ 25-30 ਹਜ਼ਾਰ ਰੁਪਏ ਸਨ, ਇੱਥੇ ਕਮੇਟੀ ਵਲੋਂ ਹਰ ਸਾਲ ਹਾੜ੍ਹ ਮਹੀਨੇ ਧਾਰਮਿਕ ਸਮਾਗਮ ਵੱਡੇ ਰੂਪ ਕਰਵਾਇਆ ਜਾਂਦਾ ਹੈ ਅਤੇ ਕੱਵਾਲ ਤੇ ਧਾਰਮਿਕ ਗਾਇਕ ਆਉਂਦੇ ਹਨ | ਇਸ ਕਾਰਜ 'ਚ ਪ੍ਰਵਾਸੀ ਭਾਰਤੀਆਂ ਦਾ ਵੱਡਾ ਯੋਗਦਾਨ ਰਹਿੰਦਾ ਹੈ | ਉਨ੍ਹਾਂ ਜ਼ਿਲ੍ਹਾ ਪੁਲਿਸ ਮੁਖੀ ਗੁਰਦਾਸਪੁਰ ਪਾਸੋਂ ਮੰਗ ਕੀਤੀ ਹੈ ਕਿ ਬੇਟ ਇਲਾਕੇ ਅੰਦਰ ਧਾਰਮਿਕ ਅਸਥਾਨਾਂ 'ਤੇ ਹੋ ਰਹੀਆਂ ਚੋਰੀਆਂ ਨੰੂ ਮੁੱਖ ਰੱਖਦੇ ਹੋਏ ਪੁਰਾਣਾ ਸ਼ਾਲਾ ਪੁਲਿਸ ਨੰੂ ਹਦਾਇਤਾਂ ਕਰਕੇ ਰਾਤ ਦੀ ਗਸ਼ਤ ਯਕੀਨੀ ਬਣਾਇਆ ਜਾਵੇ |
