ਮਾਧੋਪੁਰ, 8 ਜੁਲਾਈ (ਮਹਿਰਾ)-ਮਾਧੋਪੁਰ ਵਿਖੇ ਅੱਪਰਬਾਰੀ ਦੁਆਬ ਨਹਿਰ ਤੇ ਐਮ.ਬੀ. ਲਿੰਕ ਨਹਿਰ ‘ਤੇ ਬਣੇ ਪੁਲਾਂ ਤੋਂ ਪ੍ਰਸ਼ਾਸਨਿਕ ਮਨਾਹੀ ਦੇ ਬਾਵਜੂਦ ਲੰਘ ਰਹੇ ਭਾਰੀ ਵਾਹਨ ਵੱਡੇ ਹਾਦਸੇ ਨੂੰ ਸੱਦਾ ਦੇ ਰਹੇ ਹਨ। ਜਿਸ ਕਾਰਨ ਸਥਾਨਕ ਲੋਕਾਂ ’ਚ ਪ੍ਰਸ਼ਾਸਨ ਖਿਲਾਫ਼ ਭਾਰੀ ਰੋਸ ਪਾਇਆ ਜਾ ਰਿਹਾ ਹੈ। ਉੱਥੇ ਹੀ ਰਾਹਗੀਰਾਂ ਦਾ ਕਹਿਣਾ ਹੈ ਕਿ ਇਨ੍ਹਾਂ ਪੁਲਾਂ ਦੀ ਸਮਰੱਥਾ ਘੱਟ ਹੋਣ ਕਾਰਨ ਇੱਥੇ ਭਾਰੀ ਵਾਹਨਾਂ ਦੀ ਮਨਾਹੀ ਹੈ, ਪਰ ਰੇਤ ਅਤੇ ਮਿੱਟੀ ਨਾਲ ਲੱਦੇ ਓਵਰਲੋਡਡ ਟਿੱਪਰ ਸ਼ਰੇਆਮ ਇੱਥੋਂ ਲੰਘ ਰਹੇ ਹਨ। ਇਹ ਪੁਲ ਤੰਗ ਹੋਣ ਕਾਰਨ ਕਈ ਵਾਰ ਇਹ ਭਾਰੀ ਟਿੱਪਰ ਆਹਮੋ-ਸਾਹਮਣੇ ਫਸ ਜਾਂਦੇ ਹਨ, ਤਾਂ ਭਾਰੀ ਜਾਮ ਲੱਗ ਜਾਂਦਾ ਹੈ। ਜਿਸ ਨਾਲ ਆਮ ਲੋਕਾਂ ਤੇ ਰਾਹਗੀਰਾਂ ਨੂੰ ਘੰਟਿਆਂ ਬੱਧੀ ਪ੍ਰੇਸ਼ਾਨ ਹੋਣਾ ਪੈਂਦਾ ਹੈ। ਜੇਕਰ ਪ੍ਰਸਾਸ਼ਨ ਵਲੋਂ ਹੁਣ ਵੀ ਧਿਆਨ ਨਾ ਦਿੱਤਾ ਤਾਂ ਲਗਾਤਾਰ ਲੰਘ ਰਹੇ ਇਨ੍ਹਾਂ ਭਾਰੀ ਵਾਹਨਾਂ ਕਾਰਨ ਕੋਈ ਵੀ ਵੱਡਾ ਹਾਦਸਾ ਵਾਪਰ ਸਕਦਾ ਹੈ। ਜਿਸ ਦੀ ਨਿਰੋਲ ਜਿੰਮੇਵਾਰੀ ਪ੍ਰਸ਼ਾਸਨ ਦੀ ਹੋਵੇਗੀ। ਅਖੀਰ ’ਚ ਸਥਾਨਕ ਨਿਵਾਸੀਆਂ ਨੇ ਜ਼ਿਲ੍ਹਾ ਪ੍ਰਸ਼ਾਸਨ ਅਤੇ ਸਬੰਧਿਤ ਵਿਭਾਗ ਤੋਂ ਮੰਗ ਕੀਤੀ ਹੈ ਕਿ ਹਾਦਸਿਆਂ ਨੂੰ ਰੋਕਣ ਲਈ ਪੁਲਾਂ ਦੇ ਦੋਵੇਂ ਪਾਸੇ ਤੁਰੰਤ ਲੋਹੇ ਦੇ ਪੱਕੇ ਬੈਰੀਕੇਡ ਹਾਈਟ ਬੈਰੀਕੇਡ ਲਗਾਏ ਜਾਣ ਤਾਂ ਜੋ ਕੋਈ ਵੀ ਵੱਡਾ ਵਾਹਨ ਇੱਥੇ ਦਾਖਲ ਨਾ ਹੋ ਸਕੇ।
