ਧਾਰੋਵਾਲੀ, ਉਦੋਵਾਲੀ, ਸ਼ਾਹਪੁਰ ਜਾਜਨ ਸਮੇਤ ਬਹੁਤ ਸਾਰੀਆਂ ਮੰਡੀਆਂ ’ਚ ਸਰਕਾਰੀ ਖਰੀਦ ਬੰਦ ਇਲਾਕੇ ਦੇ ਆੜਤੀ ਤੇ ਕਿਸਾਨ ਨਿਰਾਸ਼ਾ ’ਚ

ਧਿਆਨਪੁਰ, 21 ਅਕਤੂਬਰ (ਕੁਲਦੀਪ ਸਿੰਘ ਸੋਨੂੰ)-ਅਜੇ ਬਹੁਤ ਸਾਰੀ ਝੋਨੇ ਦੀ ਫਸਲ ਕਿਸਾਨਾਂ ਦੇ ਖੇਤਾਂ ’ਚ ਖੜੀ ਹੋਣ ਤੇ ਧਾਰੋਵਾਲੀ, ਉਦੋਵਾਲੀ, ਸ਼ਾਹਪੁਰ ਸਮੇਤ ਬਹੁਤ ਸਾਰੀਆਂ ਮੰਡੀਆਂ ਅੰਦਰ ਅੱਜ ਦੀ ਤਰੀਕ ’ਚ ਬਹੁਤ ਸਾਰਾ ਝੋਨਾ ਹੋਣ ਦੇ ਬਾਵਜੂਦ ਵੀ ਜ਼ਿਲ੍ਹਾ ਕੰਟਰੋਲ ਖੁਰਾਕ ਸਿਵਲ ਸਪਲਾਈ ਤੇ ਖਪਤਕਾਰ ਮਾਮਲੇ ਗੁਰਦਾਸਪੁਰ ਵਲੋਂ 21 ਅਕਤੂਬਰ ਨੂੰ ਇਕ ਪੱਤਰ ਲਿਖ ਕੇ ਨਾਦਰਸ਼ਾਹੀ ਫਰਮਾਨ ਜਾਰੀ ਕਰਕੇ ਬਹੁਤ ਸਾਰੀਆ ਖਰੀਦ ਨਿਰੀਖਣ ਮੰਡੀਆਂ ਨੂੰ ਸਰਕਾਰੀ ਖਰੀਦ ਨੂੰ ਬੰਦ ਕਰਨ ਦੇ ਹੁਕਮ ਦਿੱਤੇ ਗਏ ਹਨ ਤੇ ਇਸ ਤੋਂ ਇਲਾਵਾ ਪ੍ਰਸ਼ਾਸਨਿਕ ਕਾਰਵਾਈ ਕਰਨ ਦਾ ਆੜ੍ਹਤੀਆਂ ਨੂੰ ਦਬਕਾ ਵੀ ਮਾਰਿਆ ਗਿਆ ਹੈ, ਜਿਸ ਕਰਕੇ ਸਮੁੱਚੇ ਆੜ੍ਹਤੀ ਤੇ ਕਿਸਾਨ ਚਿੰਤਾ ਦੇ ਆਲਮ ’ਚ ਹਨ। ਸਕੱਤਰ-ਕਮ-ਡਾਇਰੈਕਟਰ ਖੁਰਾਕ ਸਿਵਲ ਸਪਲਾਈ ਤੇ ਖਪਤਕਾਰ ਮਾਮਲੇ ਵਿਭਾਗ ਵਲੋਂ ਇਸ ਪੱਤਰ ’ਚ ਖਰੀਦ ਸੀਜ਼ਨ 2026-27 ਦੌਰਾਨ ਪਨਗਰੇਨ ਵਲੋਂ ਦੱਸਿਆ ਗਿਆ ਹੈ ਕਿ ਇਨ੍ਹਾਂ ਮੰਡੀਆਂ ਨੇ ਮਿੱਥੇ ਟੀਚੇ ਤੋਂ ਵੱਧ ਖਰੀਦ ਕਰ ਲਈ ਹੈ, ਜਿਸ ਕਰ ਕੇ ਮੁੱਖ ਦਫਤਰ ਵਲੋਂ ਗੰਭੀਰਤਾ ਨਾਲ ਨੋਟ ਲਿਆ ਗਿਆ ਹੈ ਅਤੇ ਹਦਾਇਤ ਕੀਤੀ ਜਾਂਦੀ ਹੈ ਕਿ ਮੰਡੀਆਂ ਵਿਚ ਟਾਰਗੇਟ ਤੋਂ ਵੱਧ ਖਰੀਦ ਦਾ ਸਪੱਸ਼ਟੀਕਰਨ ਦੇਣ ਲਈ ਨਿਮਨਸਤਾਖਰ ਨੂੰ ਨਿੱਜੀ ਤੌਰ ’ਤੇ ਅੱਜ ਦੁਪਹਿਰ 2 ਵਜੇ ਤੱਕ ਦਿੱਤਾ ਮਿਲਿਆ ਜਾਵੇ।